Josue 21
21
Ja chonab' jumasa sb'a yintil ja Leviji
1-2Ja israelenio jumasa ti ajyiye b'a snaje k'u'lub'al sok k'u'uts b'a mojan sok ja chonab' Silo b'a slujmal Canaani. Jun k'ak'u ja tatal jumasa, yuj ja ma'tik smoj alijel sb'aje ja b'a k'ole sb'a Leviji, waj sk'umuke ja ma'tik b'ankilal ay yuj ja tuktukil k'ole' jumasa, ja Josue sok ja pagre Eliazari. Ti yalawe'a: Ja Dyosi, yala yab' ja Moisesi, oj yal a wabyex oj ja wa'wex ki'tikon lu'um b'a oj ajyukotikona, sok oj cho ja wa'wex ki'tikon lu'um b'a oj ajyuk ja jwakaxtikoni.
3Ja'yuj, jach'ni jastal yalunej ja Dyosi, jach'ni sk'u'lan ja israelenio'a, ya'we yi slu'ume ja k'ole jumasa b'a Leviji, sok ya'awe lu'um b'a oj ajyuk ja chante jumasa.
4Ja b'ajtan ya'we yi slu'um ja k'ole jumasa yintil ja Quehati, ja k'ole jumasa jawi, ja yintilan jan ja pagre Aaroni, a'ji yi'e ox lajune (13) chonab', ja chonab' jumasa jawi, ti ay b'a yoj slu'ume ja Juda, ja Simeon sok ja Benjamini. 5Jaxa tuk smoje jumasa yi'aje, lajune (10) chonab' b'a yoj slu'ume ja Efraini, ja Dan sok ja Manases it tey b'a stojol wax och ja k'ak'u: Jach' wax na'ji sb'aj ja nalan k'ole sb'a Manases it tey b'a stojol wax och ja k'ak'u yuj ja niwan ja' Jordani.
6Ja k'ole jumasa yintil ja Guersoni, yi'aje ox lajune (13) chonab' b'a sb'aje ajyi ja Isacari, ja Aseri, ja Neftali sok ja Manases it tey b'a stojol wax och ja k'ak'u:
7Ja k'ole jumasa yintil ja Merari, yi'aje lajchawe chonab' ja b'a sb'aj ye'nle ajyi ja Rubeni, ja Gad sok ja Zabuloni.
8Jach' sk'u'lane jastal it ja israelenio jumasa, ch'ak ya'we yi b'a oj ajyuke ja kristyano jumasa yintil ja Leviji, cho ya'we yi b'a oj ajyuk ja swakaxe'i, yujni jach' alub'al yab' ja Moises yuj ja Dyosi.
9-10Ja sb'ajtanil yilawe' ma' oj ko' sb'aji, ye'n ko' sb'aje ja yintile ja quehatita jumasa, ja chonab' a'ji yi'e'i, tey b'a yoj slu'ume ja k'ole sb'a Juda sok ja Simeoni: 11Ja b'a yaxk'ul sb'a Juda, ja ya'awe ja chonab' sb'a Arbaji, ja'ni ja Hebroni. Ja Arbaji, ja stat ja Anaki. B'a sjoyanal ja chonab'i, ti a'jiyi'e b'a oj ajyuk ja swakaxe'i, 12Jaxa spetsanil ja lu'um jumasa mini xe'n a'ji yi'e ja k'ole sb'a Levi yuj ja ye'n ak'ub'al xa yi ja Caleb yunin ja Jefune.
13Ja Hebroni, jun chonab' b'a ti wa skolta sb'aj ja ma wa sta'a smuli, jaxa yintil jumasa ja Leviji, ja yi'aje ja chonab' jumasa iti: B'a Libna, 14b'a Jatir, b'a Estemoa, 15b'a Holon, b'a Debir, 16b'a Ain, b'a Juta sok b'a Bet-semes, tey sok lajan ja lu'um b'a wax wa' ja wakax jumasa. Ja b'alune (9) chonab' jumasa iti, ti lajan ay sok b'a yoj slu'ume ja Juda sok ja Simeoni. 17Ja b'a slu'ume ja Benjamini, a'jiyi'e chane (4) chonab': Ja sb'i'il ja chonab' jumasa jawi ja iti, Gabaon, Gueba, 18Anatot sok Almon, tey sok lajan ja lu'um b'a oj ajyuk ja swakaxe'i. 19Ja spetsanil ja chonab' a'jiyi'e ja pagre jumasa yintil ja Aaroni, ox lajune, (13) kechan tey sok ja lu'um jumasa sb'a wakaxi. 20Jaxa tuk kehatita jumasa, a'jiyi'e chane (4) chonab' b'a yoj slu'ume ja k'ole b'a Efraini. 21June (1) ja chonab' jawi, sb'i'il Siquem, tey b'a yoj yaxk'ul, sok jun (1) chonab' b'a wa skolta sb'aj ja kristyano'i. Ja pilan oxe'i (3), sb'i'il: Guezer, 22Quibsaim sok Bet-horon. 23Jaxa b'a slu'ume ja k'ole sb'a Dani, yi'aje chane (4) chonab': Ja sb'i'ili, ja iti, Elteque, Guibeton, 24Aialon sok Gat-rimon, b'a jujune ay yi'oj lu'um b'a oj ajyuk wakax. 25B'a slu'ume ja Manases b'a stojol wax och ja k'ak'u yi'aje chab' chonab': Ja sb'i'ili, ja iti, Taanac sok Gat-rimon. 26Spetsanil ja chonab' jumasa yi'aje ja quehatita jumasa lajune (10), b'a jujune tey sok ja lu'um b'a oj ajyuk ja swakaxe'i.
27Jaxa kristyano jumasa yuntikil ja Guerson yintil jumasa ja Levi, a'jiyi'e chab' (2) chonab' b'a yoj slu'um ja Manases b'a stojol wax och ja k'ak'u. Jaxa chonab' Basani, Ja yi'aje kan ja chonab' Beetera sok b'a Golani, ja chonab' jumasa iti, chonab' b'a wax b'ob' skolta sb'aj ja winiki. 28Ja b'a slu'ume ja k'ole sb'a Isacari, yi'aje chane (4) chonab': ja sb'i'ili ja iti, Quision, Daberat, 29Jarmut sok En-ganim. 30Ja' slu'ume ja k'ole sb'a Aseri, yi'aje tuk chane (4) chonab' ja sb'i'ili ja iti, Misael, Abdon, 31Helcat sok Rehob. 32Ja slu'ume ja k'ole sb'a Neftaliji, yi'aje oxe (3) chonab': ja' sb'i'ili ja iti, Hamot-dor, Cartan sok Quedes, b'a chonab' Galilea. 33Spetsanil ja chonab' yi'aje ja yintil jumasa ja k'ole b'a Guersoni, ox lajune (13) tey sok ja lu'um b'a oj ajyuk ja swakaxe'i.
34Ja t'usan yintil ja Leviji, cho ja'ni yuntikil ja Merari, a'jiyi'e chane (4) chonab' b'a yoj slu'um ja k'ole sb'a Zabuloni: Ja sb'i'il ja chonab' jumasa jawi ja iti, Jocneam, Carta, 35Dimnaj sok Nahalal. 36Ja b'a slu'ume ja k'ole sb'a Rubeni, cho a'jiyi'e chane (4) chonab': Ja sb'i'ili ja iti, Beser, Jahas, 37Cademot sok Mefaat. 38-39Ja b'a slu'ume ja k'ole sb'a Gadi, cho yi'aje chane (4) chonab': ja sb'i'ili ja iti, Mahamaim, Hesbon, Jazer sok Ramot, tey chonab' Galaad, jun chonab' b'a wa skolta sb'aj ja kristyano ajyi. 40Spetsanil ja chonab' yi'aje ja yintil jumasa ja Merari lajchawe (12) tey sok ja lu'um b'a oj ajyuk ja swakaxe'i. 41Ja b'a yoj slu'ume ja israelenio jumasa, yi'aje chab' tajb'e waxake (48) chonab' ja k'ole jumasa sb'a Levi, jujune' chonab' kan sok lu'um b'a oj ajyuk wakax. 42Ja lu'um jumasa sb'a wakaxi, ti sjoyb'unej ajyi ja chonab' jumasa.
Ja Dyosi, sk'u'lan spetsanil ja jas yaluneji
43Jach' sk'u'lan jastal it ja Dyosi, ch'ak ya'yi b'a sk'ab' ja israelenio jumasa spetsanil ja lu'um it yalunej oj ya'i. Jaxa ye'nle'i scholo sb'aje ti'xani ajyiye tiwa. 44Ja Dyosi, cho yala yab' ja kristyano jumasa it jel laman oj ek' yujile, jach'ni sk'u'lana. Mini ma b'ob' iljuk sk'ujole yuj ja spetsanil ja ma' mi lek wax yila sb'aje soki, ch'ak sch'ay'e sna'jel, mini jun ma b'ob' och mojan soke'a. 45Ja Dyosi, spetsanil ja jas yaloj yab' ja israelenio jumasa, ch'akni sk'u'luka, mi jas kan mi sk'u'lan.
Currently Selected:
Josue 21: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
