Josue 20
20
Ja chonab' jumasa sb'a oj jta'tik koltajeli
1Tsa'an ti alji yab' ja Josue yuj ja Dyosi:
2—A jul sk'ujole ja israelenio jumasa, t'ilan oj ya'we kan junuk ja chonab' b'a yi'oj je'i, b'a oj makunuk b'a oj skolta sb'aj ja kristyano jumasa. Ja iti, alub'alxa ni yabye yuj ja Moisesa. 3Chikan ma oj sta'a smul smila jun winik mi yujni jach' wa'nuk yaljel oj sk'u'luka, oj b'ob' waj skolta sb'a b'a chonab' jumasa jawi, b'a jach' oj b'ob' spak ajnel yuj ja smoj alijel jumasa ja cham winik ma wax kan tajkuki. 4Yajnix k'ot junuk ja b'a chonab' jumasa jawi, oj waj sje' sb'ajyi ja ma'tik ay ya'tel it wa stsomo sb'aje b'a wax ajyi ochel ja chonab'i, oj ch'ak yal spetsanil ja jas sk'u'lunej kani. Jaxa ye'nle'i, ojni ya'we ochuka, ojni ya'we yi b'a oj ajyuka. 5Jaxa smoj alijel jumasa ja cham winiki, ta wan k'ax k'otye man tiw ja sle'jeli, ja ma'tik ay ya'tel b'a chonab' jawi mini oj sje'e'a. Ojni stalnaye lek yuj ja lom milwanel jach' mi sneb'unejuki, mi yuj mi lek wa yila sb'aje. 6Ja ma waj sle' skoltajeli, ti b'a sti' sat spetsanil ja kristyano oj k'eljuk yi ja smuli, ti'ni oj kan b'a chonab' jaw man oj chamuk ja pagre ay ja ma' niwan ja ya'tel yuj ja pagre jumasa ja ma' wa sk'ela ajyi ja mulali. Cho kechani jachuk oj b'ob' kumxuk ja b'a schonab'il ajyi.
7Ja' chonab' jumasa it stsa'awe ja israelenio jumasa:
B'a Quedes, b'a Galilea, b'a yaxk'ul jumasa sb'a k'ole b'a Neftali.
B'a Siquem, b'a yaxk'ul jumasa sb'a k'ole b'a Efrain.
B'a Ebron, b'a yaxk'ul jumasa sb'a k'ole b'a Juda.
8B'a Beser, sb'a k'ole b'a Ruben, b'a takin lu'um k'inal it tey b'a stojol wax jak ja k'ak'u yuj ja Jerico, b'a pilan k'ax yuj ja niwan ja' Jordani.
Ja b'a Ramot sb'a k'ole Gad, ti b'a chonab' Galaad.
Ja b'a Golan sb'a k'ole b'a Manases, ti b'a chonab' Basan.
9Ja chonab' jumasa it stsa'awe'i, ja'ni sb'aj spetsanil ja israelenio jumasa'a, cho sb'ajni ja polestero jumasa ma' tey soke'i. Chikan ma wa smila jun winik mi jach' was k'ana, oj b'ob' waj skolta sb'aj ja tiwi. B'a jach' mi jas oj b'ob' sk'u'luk ja smoj alijel ja cham winiki, jaxa ma waj sle' skoltajeli, ojni b'ob' k'eljuk yi ja smul b'a sti' sat spetsanil ja kristyano'i.
Currently Selected:
Josue 20: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
