Josue 19
19
Ja slu'ume ja k'ole b'a Simeoni
1Ja schab'il majke yilawe ma'tik oj ko' sb'aj oj yi' b'ajtan ja lu'umi, ja ko' sb'aj b'ajtan ja k'ole sb'a Simeoni. Ja lu'um ko' sb'aje'i, tey b'a yojol ja slu'ume ja k'ole sb'a Juda. 2Ti ay sok ja chonab' sb'a Beerseba, b'a Moladaji, b'a Sebaji, 3b'a Hasar-suali, b'a Balaji, b'a Esemi, 4b'a Eltoladi, b'a Betuli, b'a Hormaji, 5b'a Siclagi, b'a Bet-marcaboti, b'a Hasar-susaji, 6b'a Bet-lebaot sok b'a Saruheni. Ay ox lajune (13)#19:6 jaxa b'a hebreo wax yala ay chan lajune (14). chonab' pilan ja yal ch'in chonab' jumasa.
7Cho yi'aje ja chonab' jumasa, b'a En-rimoni, b'a Eter sok b'a Asani, pilan ja yal ch'in chonab' jumasa. 8Ja lu'um jumasa iti, ti naka ay b'a yojol ja chonab' jumasa sok ja yal ch'in chonab' jumasa it tey b'a ko'el k'inali, man b'a chonab' Rama, it tey b'a takin lu'um k'inal b'a ko'el k'inali. 9Ja Josue ay ya'oj yi niwak lu'um ajyi ja k'ole sb'a Juda mi yuj wax ch'ak makunuk yujile, ja'yuj ja slu'um jumasa, ja ya'yi ja k'ole sb'a Simeoni.
Ja slu'ume ja k'ole b'a Zabuloni
10Ja b'a yoxil ma' ko' sb'aj ja lu'umi, ja ko sb'aj b'ajtan, ja ma'tik smoj alijel sb'aje b'a k'ole b'a Zabuloni. Ja lu'um b'a yi'aje'i, k'ot man ko'el k'inal man b'a Sarid. 11Man tiwi, ja smojone'i, ti wax waj b'a stojol wax och ja k'ak'u, man b'a Marala, ti wax ek' b'a Dabeset sok b'a yal yok ja' it tey b'a stojol wax jak ja k'ak'u yuj ja Jocneami. 12B'a stojol wax jak ja k'ak'u yuj ja Saridi, ja mojoni wax k'ot man b'a Quislot-tabor; man tiwi wax cho waji ti ek' b'a Daberat sok man b'a Jafia. 13Ti wax waj b'a stojol wax jak ja k'ak'u, wax k'ot man b'a Gat-hefer, wax ek' b'a Ita-casin, ti wax waj ya' sututuk man b'a Nea man b'a Rimon. 14Jaxa b'a k'e'el k'inali, ja mojoni ti wax waj ya' sututuk man b'a Hanaton, ti waj k'ot tik'an b'a loman yaman Jefte-el. 15-16Ja lu'um jumasa b'a yi'aje kan ja k'ole b'a Zabuloni, ti lajan ay sok ja lajchawe (12) chonab' sok ja yal ch'in chonab' jumasa. Ja chonab' jumasa jawi, jach' sb'i'il jastal iti: Catat, Nahalal, Simeon, Idala, sok Belen.
Ja lu'um sb'a k'ole b'a Isacari
17Ja schanil ja lu'um yilawe ma oj ko' sb'aj b'ajtan oj yi'i, ja ko' sb'a ja yintil jumasa ja k'ole sb'a Isacari. 18Ja sb'i'il ja chonab' jumasa tey b'a yojol ja lu'um jawi, Jezreel, Quesulot Sunem, 19Hafaraim, Sihon, Anaharat, 20Rabit, Quision, Ebes, 21Remet, En-ganim, En-hada sok Bet-pases. 22Ja mojon b'a k'e'el k'inali, ti wax waj b'a stojol wax jak ja k'ak'u, wax ek' b'a wits Tabor wax k'ot man b'a niwan ja' Jordan, ti wax ek' b'a chonab' jumasa b'a Sahasima sok b'a Bet-semes. 23Spetsanil ja lu'um jumasa iti, ay yi'oj wak lajune (16) chonab' pilan ja yal ch'in chonab' jumasa, ja iti ja' sb'aje ja k'ole b'a Isacari.
Ja slu'ume ja k'ole b'a Aseri
24Ja sjo'il ja lu'umi, yilawe ma oj ko' sb'aj b'ajtan oj yi'e, ja ko' sb'aj ja yintil jumasa, ja k'ole sb'a Aseri. 25Ja mojon b'a ko'el k'inali, ti wax waj b'a chonab' Helcat b'a stojol wax och ja k'ak'u, cho tey ja chonab' jumasa, Hali, Beten, Acsaf, 26Alamelek, Amad sok Misal. Ja mojon b'a stojol wax och ja k'ak'u ja b'a wits Carmelo sok b'a Sihor-libnati. 27Jaxa b'a stojol wax jak ja k'ak'u, ja mojoni, it wax ek' b'a chonab' Helcat k'e'el k'inal wax waji, man Bet-dagon. Man tiwi wax cho ek' b'a slu'um ja k'ole b'a Zabuloni, wax ek' b'a loman yaman Jefte-el man Bet-emek sok b'a Neiel. Tsa'an ti wax ek' b'a Cabul, 28b'a Abdon, b'a Ebron, b'a Rehob, b'a Hamon, sok b'a Cana, ti waj ch'ak b'a Sidon. 29Tsa'an ti wax waj ya' sututuk man b'a Rama, wax k'ot man b'a smakb'al ja chonab' Tiro, wax cho waji ti wax ek' b'a Hosa ti wax waj ch'ak b'a niwan paman ja' Mediterraneo. Ti cho lajan ay sok b'a yojol ja chonab' Mahaleb sok ja Aczibi, 30-31ja Uma, ja Afec sok ja Rehob. Spetsanil ja chonab' jumasa ay jun tajb'e chab'e (22), pilan ja ch'in chonab' jumasa, kechan yuj ja ti lajan ay sok b'a yojol ja lu'um yi'aje ja k'ole b'a Aseri.
Ja lu'um yi'aje ja k'ole b'a Neftaliji
32Ja swakil ja lu'umi, yilawe ma oj ko' sb'aj b'ajtan oj yi'e, ja ko' sb'a ja yintil jumasa ja k'ole sb'a Neftaliji. 33Ja mojon b'a k'e'el k'inali, ti wax ek' b'a chonab' Helef, wax ek' b'a niwan yaxte' mojan sok ja Saanamimi, wax waji ti wax cho ek' b'a chonab' jumasa Adami-nequeb sok b'a Jabneel man b'a Lacum, ti wax waj ch'ak b'a niwan ja' Jordan. 34Ja mojon b'a ko'el k'inali, ti wa stuluyi b'a Jordan; ti wax k'ot b'a stojol wax och ja k'ak'u, man b'a chonab' Aznot-tabor. B'a tiwi ti wax waj ya sututuk man k'e'el, ti wax waj b'a smojone sok ja k'ole b'a Zabuloni, man b'a chonab' Hucoc. Tsa'an ti wax ek' b'a stojol wax och ja k'ak'u, wani sta'a sb'a sok ja smojone sok ja Zabulona. Ja smojone b'a stojol wax och ja k'ak'u, ja wax waj sta' sb'aj sok ja slu'ume ja k'ole sb'a Aseri, jaxa b'a stojol wax jak ja k'ak'u ja wax waj sta' sb'aj sok ja niwan ja' Jordani. 35Ja sb'i'il ja chonab' jumasa b'a makan leki, ja it jumasa, Sidim, Ser, Hamat, Racat, Quineret, 36Adama, Rama, Hasor, 37Quedes, Edrei, En-hasor, 38-39Iron, Migdal-el, Horem, Bet-anat sok Bet-semes. Ja spetsanili ay b'alun lajune (19),#19:38-39 ja b'a k'umal hebreo wax yala ay wak lajune (16). pilan ja yal chonab' jumasa, ja lu'um jumasa iti, ja a'jiyi ja k'ole sb'a Neftaliji.
Ja slu'ume ja k'ole b'a Dani
40Ja sjukil lu'um yilawe ma oj ko' sb'aj b'ajtan oj yi'e ja lu'umi, ja ko' sb'a ja yintil jumasa ja k'ole sb'a Dani. 41Tey b'a yojol ja chonab' jumasa iti, Sora, Estaol, Ir-semes, 42Saalbim, Aialon, Jetla, 43Elon, Timnat, Ecron, 44Elteque, Guibeton, Baalat, 45Jehud, Bene-berac, Gat-rimon, 46Mejarcon sok ja Racon, it tey b'a sti' sat ja chonab' Jope. 47-48Spetsanil ja chonab' jumasa iti, sok ja ch'in chonab' jumasa, ja sb'aje ajyi ja k'ole sb'a Dani. Tsa'an ja kristyano jumasa jawi, sch'aya ja slu'ume'i, ja'yuj ja waj yi'ekan ja chonab' Lesem b'a k'e'el k'inali. Ch'ak smil'e spetsanil ja kristyano ma ti ajyi tiwi, yi'aje kan ja chonab'i. Ja chonab' jawi stukb'ese ja sb'i'ili, ya'we sb'i'iluk Dan, ja' sna'ulab'il ja ma ek' paxta yujile'i.
Ja slu'um a'jiyi ja Josue
49Yajni ch'ak yi'e jujune ja slu'ume ja israelenio jumasa, cho ya'we yi ja sb'aj ye'n ja Josue. 50Ja Dyosi, yala lekni a yi' ja chonab' b'a wa'n sk'anjel ja Josueja, ja ni wan sk'anjel ja chonab' Timnat-sera b'a yaxk'ul b'a tik'an ja slu'um ja k'ole sb'a Efraini. Ja Josue, stojb'es lek ja chonab' jawi sok ti'ni ajyi tiwa.
51Ja Josue ja pagre Eliazar sok ja ma'tik niwak ja ya'tel yuj ja k'ole tatal jumasa ma'tik smoj alijel sb'aje'i, ja yajni mito sk'epawe ja lu'umi sjob'owe yi ja Dyos jastal oj sk'ep'e. Ti stsomo sb'aje b'a sti' ja b'a wax ajyi ocheli b'a lugar tsa'ub'al b'a Siloji. Jach' ch'ak spil'e jastal it ja lu'um jumasa. Jach'ni'a ti ch'aka Amen.
Currently Selected:
Josue 19: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
