Josue 18
18
Ja Josue ch'ak spil ja lu'um janek'to kani
1Yajni ch'ak yi'ekan ja lu'um jumasa ja israelenio, ti stsomo sb'aje spetsanile b'a lu'um Silo. Ti yawe k'e' tiw ja na'its b'a wax ajyi tsomjeli it tsa'ub'ali. B'a wa stsomo sb'aje sok ja Dyosi. 2Kechan, ayto sk'ana juk k'ole oj yi' slu'ume.
3Ti alji yabye yuj ja Josue:
—¿Jas k'ak'u oj ja wa'tel tayex ja lu'um it ya'ta a wi'ex ja sDyos ja ma ek' paxta a wujilexi? 4jujune k'ole wax k'ana a stsa' oxe winik b'a oj jek e' oj waj sb'ejtaye spetsanil ja lu'um b'a mitox k'epxi, tsa'an oj jak yal'e kab' jastal oj b'ob' sk'ep sb'aje. 5Jel t'ilan oj sk'ep'e juke sepe, ja k'ole jumasa sb'a Juda a'xita yi'e ja ye'nle b'a ko'el k'inali, jaxa yintil jumasa ja Jose ja yi'aje b'a k'e'el k'inali. 6Yajni xjak a wal'ex kab' jas a k'u'lanexi, jaxa ke'n oj job' yi ja Dyosi, b'a jach' oj na' ta lek ja jastal a k'epawexi. 7Jaxa yintil jumasa ja Levi, mini xe'n lu'um oj yi'e'a. Ja ya'tel ja ye'nle'i, pagre'il kechan ja oj ya'teltaye ja Dyosi. Jaxa k'ole sb'a Gadi, sb'a Rubeni, snalan ja sb'a Manasesi, ja ch'ak yi'e ja lu'um b'a stojol wax jak ja k'ak'u yuj ja niwan ja' Jordani. Ye'n ch'ak a'juk yi'e yuj ja Moisesi.
8Ja winik jumasa ma'tik tsajiye b'a oj waj yil'e ja lu'umi, schapa sb'aje b'a ojxa wajuke. —Ti alji yabye yuj ja Josue: B'ejtesik spetsanil ja lu'um jawi, yajni la kumxiyexi la alawik kab' jastal a wilawex, jaxa ke'n oj job' yi jas oj k'u'luk ja Dyosi.
9Ja winike jumasa jawi, ch'akni sb'ejtaye spetsanil ja lu'uma, yajni waj yal'e yab' ja Josue, ch'akni yal'e jastal ay ja lu'uma, ay juk sepe pilan pilan. Cho yawe och ju'un jaye chonab' ay b'a jujune sepe. Ti'xa wajye ja b'a chonab' Silo ja b'ay ja Josue, 10jaxa Josue, yajni sjob'otayi ja Dyos jas oj sk'u'luki, ti'xa och sk'ep ja lu'uma, b'a jujune k'ole ya'yi slu'um.
Ja slu'ume ja k'ole sb'a Benjamini
11Ja ma ko' sb'aj oj yi' b'ajtan ja lu'umi, ja k'ole sb'a Benjamini. Ja lu'um jumasa b'a ko' sb'aje'i, ti' ay b'a sts'e'el ja slu'ume ja Juda, ja Efrain sok ja Manasesi. 12Ja smojone b'a k'e'el k'inali, ti wa stuluyi b'a niwan ja' Jordan ti wax k'e' och b'a wits, ti wax kan yuj k'e'el k'inal ja Jerico. Man tiwi ti wax waj b'a stojol wax och ja k'ak'u b'a yoj yaxk'uli, man b'a wits Bet-aben. 13Tsa'an ti ek' b'a wits b'a ko'el k'inal b'a Betel, ti waj ko' k'ot man b'a Atarot-adar, b'a ko'el k'inal b'a wits Bet-horon. 14Ja mojoni, toj ko'el k'inal wax waji, man b'a stojol wax och ja k'ak'u yuj ja witsi, wax k'ot man b'a Quiriat-jearim. Ja chonab' jawi ye'n sb'aje ja k'ole sb'a Juda. Ja mojon jumasa it b'a wax och ja k'ak'u.
15Ja mojon b'a ko'el k'inali, ti wa stuluyi b'a Quiriat-jearim, ti wax ek' b'a sat ja' b'a Neftoah. 16Ti ko' ko'n b'a wits b'a k'e'el k'inal yuj ja loman yaman b'a Refaimi, ja b'a wa stuluyi ja loman yaman Ben-hinomi. Ti'ni wax ek' och b'a loman yaman b'a ko'el k'inal yuj ja wits Jebusi. Man b'a sat ja' En-roguel. 17Tsa'an, k'e'el k'inal wax waj b'a En-semes, man b'a tiwi, ti wax ek' b'a Guelilot, ja it tey b'a sti' sat ja chonab' Adumimi. Ti waj ko' k'ot man b'a niwan patak' sb'a Bohan yunin ja Rubeni, 18ti wax ek' b'a k'e'el k'inal yuj ja wits b'a sti' sat ja loman yaman Jordani. Man tiwi ti wax ko' k'ot b'a loman yaman, 19ti wax ek' b'a k'e'el k'inal yuj ja Bet-hoglaji, sok ti wax ch'ak b'a bahia b'a wa sta'a sb'a sok ja ch'in yok ja' ja niwan ja' Jordani, b'a k'e'el k'inal yuj ja paman ja' it mix nijki. Ja' mojon jumasa b'a ko'el k'inali.
20Ja b'a niwan ja' Jordani, ti wa stuluyi ja mojon b'a stojol wax jak ja k'ak'u. Ja iti ja mojon jumasa ja b'a lu'um a'ji yi'e ja k'ole sb'a Benjamini.
21Ja chonab' b'a ko' sb'aje ja yintile jumasa ja k'ole sb'a Benjamini, ja it jumasa, b'a Jerico, b'a Bet-hogla, b'a Emec-quesis, 22b'a Bet-araba, b'a Semaraim, b'a Betel, 23b'a Avim, b'a Para, b'a Ofra, 24b'a Quefar-haamoni, b'a Ofni sok Gueba, ay lajchawe chonab' pilan ja yal ch'in chonab' jumasa. 25Cho ayto chan lajune chonab' sok pilan ja yal ch'in chonab' jumasa: It tey ja Gabaoni, b'a Rama sok b'a Beeroti, 26Mispa, Quefira, Mosa, 27Requem, Irpeel, Tarala, 28Sela, Elef, Guibea, Quiriat, sok Jebus tsa'an ya'we sb'i'iluk Jerusalen. Ja' lu'um jumasa it ja a'ji yi'e' ja k'ole jumasa sb'a Benjamini.
Currently Selected:
Josue 18: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
