Josue 17
17
Ja slu'ume ja k'ole sb'a Manasesi
1Ja slu'ume ja k'ole sb'a Manases sb'ajtanil yunin ja Jose, jach' spilawe jastal iti:
Ja k'ole yintil ja Maquiri, ye'nxa ya'ata ja Moises ja lu'um b'a Galaad sok b'a Basani. Ja Maquiri jun tsatsal winik tiro'anum, ja sb'ajtanil yunin ja Manasesi, jaxa Manasesi, ja stat ja Galaadi.
2Jaxa k'ole jumasa yintile ja Abiezeri, ja Heleki, ja Asrieli, ja Siquemi, ja Hefer sok Semida, ye'nxa ak'ub'al yi slu'ume yuj ja Josue. Ja it jumasa ja yuntikil ja Manasesi, cho ja yij jumasa ja Jose.
3Ja Selofhadi, ja yij ja Maquiri, mi a'xiyi slu'um yuj ja mey yuntikil winiki. Kechan ajyi jo'e yuntikil ixuk, ja sb'i'ile'i ja iti: Mahla, Noa, Hogla, Milca sok Tirsa. 4Jaxa ye'nle'i, waj sje' sb'aje b'a sti' sate ja pagre Eliazari, ja Josue sok ja ma'tik ay ya'teli, ti yalawe'a: —Ja Dyosi, yala yab' ja Moises ojni a wa'wex ki'tikon jlu'umtikon ja ke'ntikon jastal ja jmoj alijeltikon winiki.
Ja'yuj, yi'ajni slu'um ja ye'nle'a, jach'ni jastal yalunej ja Dyosi.
5-6Ja'yuj ja Josue ch'akni ya'yi slu'ume'a, ja janek' ya'yi ja ixuke'i, jach'ni cho yi'aj ja winik jumasa yintil ja Manasesi. Ja'yuj ja k'ole b'a Manasesi, yi'aje lajune pedaso ja b'a stojol wax och ja k'ak'u yuj ja Niwan ja' Jordani, pilan ja slu'ume ajyi ja Galaad sok ja Basan b'a stojol wax jak ja k'ak'u yuj ja niwan ja' Jordani.
7Ja slechanal ja slu'um ja Manasesi, ti wa stuluyi b'a wa sts'ajk'an sb'aj sok ja k'ole sb'a Aseri, man Micmetat it tey b'a stojol wax jak ja k'ak'u yuj ja Siquemi. Man tiwi ko'el k'inal wax waji, man b'a wax b'ojti ja' b'a Tapua. 8Ja b'a Tapuah sb'aj ye'n ajyi ja Manasesi, ja chonab' Tapuah, ja wa sts'ajk'an sb'aj sok ja Manasesi, sok ja sb'aj ajyi ja k'ole sb'a Efraini. 9-10Man tiwi, ja smojone sok ja b'a ko'el k'inali, wantox cho waji man b'a stojol wax och ja k'ak'u yuj ja yal yok ja b'a Cana, ti wax k'ot man b'a niwan paman ja' Mediterraneo. Ja sniwanil ja slu'um ajyi ja Manasesi, ti b'a k'e'el k'inal yuj ja yal yok ja' b'a Cana, jaxa b'a sb'aj ye'n ajyi b'a ko'el k'inal yuj ja yal yok ja'i, ay jujuntik chonab' sb'aj ye'n ajyi ja k'ole sb'a Efraini, ja b'a k'e'el k'inal yuj ja yal yok ja'i, ja sb'a Manasesi, ja wa sts'ajk'an sb'aj sok ja Aseri, jaxa b'a k'e'el k'inal yuj ja Aseri, ja sb'a k'ole b'a Isacari. 11B'a yojol ja slu'ume ja k'ole jumasa iti, ajyi tuktukil chonab' sok yal ch'in chonab' jumasa, sb'aj ye'n ajyi ja Manasesi. Ja it jumasa. Bet-sean, Ibleam, Dor, Edor, Taanac sok Meguido. Ja b'a yoxil chonab'i, ja it tey mojan b'a sti' ja niwan paman ja'i. 12Ja k'ole sb'a Manasesi, mi b'ob' ya'we eluk ja swinkil ja Canaan b'a chonab' jumasa jawi, ja'yuj ti'toni aye man ya'n. 13Tsa'an yajni pojxiye lek ja israelenio jumasa, ja ye'nle'i mi ya'we eluk ja kristyano jumasa jawi, kechan wax ch'ak ya'we och b'a ya'tijume.
Ja yintil jumasa ja Jose, wa sk'anawe tuk slu'ume
14Ja yintil jumasa ja Jose, jun k'ak'u yalwe yab' ja Josue:
—Ja Dyosi, jel lek wax yilawotikon ja ya'n jelxa pojxitikonta, sok jel ch'in ja lu'um a wa'ojki'tikoni. Niwan wax k'anatikon.
15Ti yala ja Josue:
—Merani'a, ja we'nlexi jelxani pojxiye xta'a, mixa xa malab'anex ja slu'um ja Efraini, ja'yuj ka'axik ja chonab' b'a'ye ja ferezeo sok ja cha'anil winik refaita jumasa, ochanik loxowik ja k'ul jumasa.
16Ti yalawe ja ye'nle'i:
—Merani ye'na, yujni mixa malanuk kujtik ja yaxk'ul ya'oj ki'tik ja Efraini, jaxa swinkil ja Canaan teye b'a lomani, ay skarro'e b'a toj tak'in, cho jach'ni ja swinkil ja Bet-sean sok ja yal ch'in chonab' jumasa tey b'a sjoyanali, jach' jastal ja ma'tik tey b'a loman Jezreeli.
17Jaxa Josue ti yal yab' jastal it ja yintil jumasa ja Jose'i, la kaltik ja'ni ja Efrain sok ja Manasesi:
Ja we'nlexi jel jitsanex sok jel ja wa wipexi, ja'yuj ojni ka'wi'ex ja lu'um waxa k'anawexi. 18Ja yaxk'ul jumasa nakani a b'ajexa. Ja tiwi ay niwak te', jaxa we'nlexi, oj b'ob' a lox'ex sok oj ja b'ajukex ja lu'um jumasa jawi. Meran ja cananeo jumasa jelni tsatse'a cho ayni skarro'e toj tak'ina, jaxa we'nlexi mi wokoluk oj a wa'wex eluk ja b'a slu'ume'i'.
Currently Selected:
Josue 17: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
