Josue 14
14
Ja lu'um b'a stojol wax och ja k'ak'u yuj ja Jordani
1Ja pagre Eliazar sok ja Josue yunin ja Nuni, cho ti'ni aye ja ma'tik ay ya'tele b'a jujune' k'ole'i, sk'epawe yi ja israelenio ja slu'ume ja cananeo jumasa b'a stojol wax och ja k'ak'u yuj ja niwan ja' Jordani. 2Ja Moisesi, Dyos ni alub'al yab' jastal oj sk'epyi ja slu'um ja b'alun k'ole sok snalani, t'ilan oj yil ma oj ko' sb'aj oj yi' b'ajtan. 3-4Ja b'a yintil jumasa ja Jose spilata sb'aj chab' k'ole: Ja sb'a Manases sok sb'a Efraini. Ja Moisesi, sk'epata ja lu'um b'a stojol wax jak ja k'ak'u yuj ja Jordani, ja ya'yi ja k'ole sb'a Rubeni, sb'a Gadi, sok snalan ja sb'a Manasesi. Ja k'ole sb'a Levi mini xe'n lu'um yi'aje'a, kechan a'jiyi'e ja b'a oj ajyuke'i, cho a'jiyi'e b'a oj yawe ja schanste'e'i. 5Ja israelenio jach'ni sk'epawe ja lu'um jastal alub'al yab' ja Moises yuj ja Dyosi.
Ja chonab' Hebroni, yi'aj ja Calebi
6Jun k'ak'u ja israelenio jumasa, ti aye b'a Guilgal, chab' oxe winike ja k'ole sb'a Juda, jak yil'e ja Josue. Ti ajyi soke ja Caleb yunin ja Jefune Quenesita. Jaxa Calebi, ti ya jak sk'ujol ja Josue:
—Ja we'n waxa na'a lek ja Dyosi, sk'uman ja Moises b'a Cades-barnea yuj ja jchawaniltik ja ke'ntiki. 7Ja ke'n ay ki'oj chab' tajb'e jab'il ja yajni sjekawon ja Moises b'a Cades-barnea b'a oj waj jk'el ja lu'umi. Ja ke'n kalni yab' ja smeranil ja jas kila'a. 8Ja ma'tik waj jmoki, ya'we och sxiwel ja kristyano jumasa; jaxa ke'n ja sniwanil jk'ujol ja Dyosi. 9Ja k'ak'u jawi, yala ja Moisesi, ja ke'n sok ja jmoj alijel jumasa, oj ya'ki'tikon ja lu'um b'a b'ejyiyon yuj tojni jk'u'an ja Dyosi. 10Ja jawi ayxa chab' tajb'e sok jo'e (45) jab'il ek'el, spetsanil ja k'ak'u jawi, ja kristyano jumasa ti wa'ne b'ejyel b'a takin lu'um k'inal, ye'nani wa stalnayon ja Dyosi, yuj ja jach'ni yaluneja. Jaxa ya'n. Ayxa ki'oj chan tajb'e sok jo'e (85) jab'il, 11jaxa ya'n tsats to lek ayon yuj ja yajni sjekawon ja Moises waj k'el ja chonab'i. Ja ya'n ojtoni b'ob' tiro'anukona. 12Ja'yuj wax k'ana ja'xa wa'ki ja yaxk'ul jumasa b'a sk'apaki ja Dyosi. Ja we'n waxa na'a lek ja cha'anil kristyano jumasa yintil ja Anaki, ti aye b'a niwak chonab' b'a makan leki. Yuj ja ye'nani oj skoltayon ja Dyosi, ja'yuj oj b'ob' ka eluk ja kristyano jumasa ma tey tiwi, sok oj ki' kan ja chonab' jumasa jawi, jach'ni jastal yalunej ja Dyosi.
13Jaxa Josue jel tsamal ja jas yal yab' ja Caleb, ja'yuj ja ye'nani a'jiyi'e ja lu'um b'a Hebron sok ja smoj alijel jumasa. 14Jachuk ja lu'um b'a Hebroni, yi'aj kan ja Caleb sok ja yuntikil jumasa, yujni toj lek sk'u'an ja Dyos yuj ja israelenio jumasa'a, ja Calebi, cho sb'ajtoni ja ye'na. 15Ja sb'i'il ja b'ajtani Hebron, Quiriat-arba, yuj ja arbaji, ja sb'i'il ja cha'anil winik it jel niwan wax ilji. Tsa'an jelxa ni laman ek' ja b'a chonab' jumasa ita.
Currently Selected:
Josue 14: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
