Josue 12
12
Ja mandaranum jumasa ma'tik yila sk'ujol ja Moisesi
1Yuj ja jas yala ja Moisesi, ja'yuj ja israelenio jumasa smilawe chab' smandaranum b'a stojol wax jak ja k'ak'u yuj ja niwan ja' Jordani. Sb'ajane kan ja lu'um man b'a niwan ja' Arnon b'a ko'el k'inal man b'a wits Hermon b'a k'e'el k'inal, cho jach'ni ja lu'um jumasa b'a stojol wax jak ja k'ak'u b'a Jordani. 2June ja mandaranum jawi ja Sihoni, ja smandaranum ja amorreo jumasa, it ti ajyiye b'a Hesboni, ja b'a wa'n a'teli, snalan ja slujmal ja Galaadi; ja spetsanil b'a wa'n a'teli, man b'a niwan ja' Jaboc, b'a k'e'el k'inal, man b'a niwan ja' Arnon b'a ko'el k'inal. Ja b'a sts'ajk'an sb'aj sok b'a ko'el k'inali, ja chonab' Aroer b'a mojan sti' niwan ja' Arnoni. B'a ko'el k'inali, ti wax k'ot tik'an man b'a snalan b'a loman yaman Arnon, wa stulu yi man b'a Aroer man b'a niwan paman ja' it laman ayi. 3Jaxa b'a wa sts'ajk'an sb'aj sok b'a stojol wax och ja k'ak'u ja'ni ja niwan ja' Jordani, wa stulu yi b'a paman yaman ja' b'a Galilea, b'a k'e'el k'inali, man b'a it laman ay b'a ko'el k'inali. Cho ja'ni smoj sb'aj sok ja iti, ja b'a stojol wax jak ja k'ak'u yuj ja niwan paman ja' it laman ayi, man b'a chonab' Bet-jesimot sok man b'a wits pisga.
4Ja pilan mandaranum ye'n b'ob' yuj ja Moises sok ja israelenio jumasa, ja Og mandaranum b'a Basani, kechan xta ye'n ti ajyi yuj ja refaita jumasa.#12:4 refaita jumasa: Ja yintil jumasa ja kristyano jumasa jawi, jel cha'anik ajyi. Ja Og ti mandaranum ay ajyi b'a Astarot sok b'a Edrei. 5Ja spetsanil ja lu'um yi'oji, ti wa stuluyi b'a wits Hermon b'a k'e'el k'inali, jaxa b'a stojol wax och ja k'ak'u ti b'a chonab' Salca, ti wax ch'ak kan b'a yojol ja slujmal Basani, man b'a sts'ajk'an sb'aj sok ja slujmal ja Guesuri, sok ja Maaca, b'a stojol wax och ja k'ak'u. Cho ye'nani mandaranum ajyi b'a k'e'el k'inal yuj ja Galaadi, man b'a ay b'a sk'ab ja Sihon mandaranum b'a Hesboni.
6Yuj ja ye'n yala ja Moisesi, ja'yuj yilawe sk'ujol chab' mandaranum ja israelenio jumasa. Ja Moisesi, sk'epayi ja slu'ume ja k'ole jumasa sb'a Rubeni, sb'a Gadi, sok snalan ja k'ole sb'a Manasesi.
Ja mandaranum jumasa ma yila sk'ujol ja Josue
7Yuj ja ye'n yala ja Josue ja'yuj b'ob' yuj sok spetsanil ja mandaranum jumasa, b'a stojol wax och ja k'ak'u yuj ja niwan ja' Jordani, ti wa stuluyi b'a Baal-gad b'a loman yaman b'a Libano, man b'a wits Halac b'a ko'el k'inal b'a Edom. Ja Josue sk'epa ja lu'umi, ya'yi slu'um b'a jujune' k'ole. 8Ja lu'um jumasa jawi, ti lajan ay sok ja yaxk'ul jumasa, ja wits jumasa b'a stojol wax och ja k'ak'u, ja loman yaman jumasa b'a Jordani, ja wits jumasa b'a stojol wax jak ja k'ak'u, sok ja takin lu'um k'inal jumasa b'a ko'el k'inali. Ja b'ajtani ye'n sb'aje ajyi ja hitita jumasa, ja amorreo, ja cananeo, ja ferezeo, ja heveo sok ja jebuseo jumasa. 9Ja mandaranum jumasa it ja b'ob' yuj ja israelenio, ti sb'aje b'a chonab' jumasa iti: Jerico, Ai, ja it tey mojan b'a Beteli, 10Jerusalen, Hebron, 11Jarmut, Laquis, 12Eglon, Guezer, 13Debir, Gueder, 14Horma, Arad, 15Libna, Adulam, 16Maqueda, Betel, 17Tapuah, Hefer, 18Afeki, Saron, 19Madon, Hasor, 20Simron-meron, Acsaf, 21Taanac, Meguido, 22Cedes, Jocneam b'a wits Carmelo, 23ja Dor b'a sti' ja niwan paman ja', ja Goim b'a Guilgali, 24sok ja Tirsa. Ja spetsanil ja mandaranum jumasa, ay jun tajb'e sok juluche.
Currently Selected:
Josue 12: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
