Joel 3
3
Ja Dyosi, oj ya stup ja swinkil ja niwak smul ja chonab' jumasa
1—Yajnix k'ot ja k'ak'u jawi,
ja swinkil ja Judea sok ja Jerusaleni
oj ka kumxuke ja b'a chonab' jumasa
b'a i'jiye b'a ch'ak waj lutjuke'i.
2-3Oj ch'ak jtsom spetsanil ja swinkil b'a chonab' jumasa
b'a loman yaman Josafati,
oj kal yabye yuj ja smul ye'nle
ja jas ch'ak sk'u'luke yi ja
kuntikil israelenio it jex k'ana:
Ch'ak ya'we stik sb'aj chikan b'a'a,
cho ye'n ita yilawe ma ko' sb'aj
ja yajni yilawe ma' oj ko' sb'aj yujile ja slu'ume jumasa;
schonowe b'a oj wajuke yib' k'ab'al
ja yal keremtik sok ja yal ak'ixuk jumasa,
—sok ja tak'in sta'awe'i, smanawe
pajal ya'lel ts'usub' b'a yakb'i ye sok
sok ja cho stupuwe sok ja ixuke b'a sta'a sb'aje soki—
4—Swinkil chonab' Tiro sok Sidon,
mi sb'ejuk oj tajkanik jmok.
Jach'ni ja we'nlex swinkil lu'um Filisteo,
mi sb'ejuk oj ja wa'wex jtup yuj ja tajkelex jmoki,
ja ke'ni ojni ka'a tup'ex ja jastalni ja sb'eji,
jelxa mojan ay yuj ja jastal waxa na'awexi.
5We'n a welk'anex
spetsanil ja k'anal tak'in sok ja sakal takini;
—sok ja jastik jel cha'an sts'akoli
ti ch'aka wi'ex b'a snajtsil tsomjel—
6-7—Ja we'nlex swinkil Tiro sok Sidon,
jel najat a wi'ajex ja swinkil b'a Juda;
ja swinkil ja Jerusaleni
a chonowex b'a yib' k'ab'al oj ajyuke.
Jaxa ke'n ojni ka eluke'a;
oj ka eluke b'a Grecia
b'a a chonowex ja we'nlexi.
—Jaxa ya'n ke'n oj k'u'l a wi'ex
ja jastal ak'u'lanex yi ja kuntikili:
8Oj chonyi wa wuntikilex keremtik sok ak'ixuk
ja swinkil b'a Juda,
jachuk, ja ye'nle'i, oj schon'eyi
ja k'ole jumasa b'a takin lu'um k'inali.
Ja jas wax kala yujni jach' oj k'u'luka—.
Ja aluman Dyosi, yala yuj ja wokoli
9Ja aluman Dyos Joeli, yal yab' ja swinkil ja niwak chonab' jumasa b'a mojan yi'oj sb'aji:
—Chapawik ja wa soldado'ex jumasa—
—Chapawik b'a tiro'aneli—
—Ja Dyosi, yalata ojni ajyuk ja tiro'anela—
10—Tojb'esik wa yam k'ab'ex jumasa
b'a tujk'anub' b'a tiro'anel—
—Tsatsal k'ujolanik ja ma'tik je xiwi
a'wik pax jun winik ma' jel stsats sk'ujol—
11-12—La'ik chonab' jumasa ma'tik mojan ay—
tsomo ab'ajik juts'in b'a loman yaman b'a Josafat.
—Ja tiwi ja Dyosi ye'n oj yil ja smule'i,
oj yal ay ni smule'a.
13Ja Dyosi ye'n oj sk'uts ja trigo
yajni sk'ak'uilxa ja stsomjeli;
oj ch'a st'en ja jastal ja ts'usub'
yajni mojanxa oj nolxuk ja ya'leli.
—Jelxa jelxita ja jas mi lek wa sk'ulane'i—
14—Jitsan kristyano stsomota sb'aje
b'a loman yaman jumasa
yuja ti oj k'ot tiw ja Dyos kujtiki.
—Jelxa mojan ja k'ak'u oj k'otuki—
15Yajnix jul ja Dyosi,
mi oj ijlab'anuk ja k'ak'u sok ja nan ixawi,
cho jach'ni mi oj lijpuk ja k'anal jumasa;
16Oj nijkuk ja satk'inal sok ja lu'umi,
jaxa Dyos kujtiki jel oj tajkuk
ti oj k'umanuk man b'a Jerusalen.
Jayuj ojni stalnan ja israelenio jumasa
ti ojni sta' skoltajele'a—.
K'umani ja Dyosi
17Ja Dyosi, ti yal yab' ja yuntikili:
Yajnix k'ot ja k'ak'u jawi,
ja we'nlexi oj ja na'ex yuj ke'non wa Dyosonexi.
Sok ti oj kankon b'a snajtsil jtsomjel,
jaxa Jerusaleni jani ja chonab' jex k'ana.
—Mixani jun soldado ma' wax na'a sb'aj
oj ya och jun yok ja tiwi—
18—Yajnix k'ot ja k'ak'u jawi,
ja b'a wits jumasa sok b'a loman yaman jumasa
jel oj ajyuk ja ya'lel ts'usub' sok ja lechi;
sok oj ni ajyuk lek ja ya'lel
ja yal uk'um jumasa b'a Juda,
jaxa b'a snajtsil tsomjeli oj b'ojtuk jun yal yok ja'
b'a oj ya po'xuk ja loman yaman jumasa b'a Sitim.
19Ja Egipto sok ja Edomi
oj ka pax kan jun takin lu'um k'inal,
yuj ja lom mey sb'ej snol k'ab'ine
ja swinkil Juda,
yuj ja ti b'a schonab'ile lajani
smilawe kristyano mey smule.
20-21Ja'yuj ke'n oj ka stup'e' ja ma'tik milwani;
ja ma' ye'n smuli, ojni stupa.
Ja chonab' jumasa b'a Juda sok b'a Jerusaleni
oj ni ajyuk swinkil spetsanil k'ak'u'a,
jaxa ke'n ti oj ajyukon b'a snajtsil jtsomjel
b'a oj ka stup ja ma ay smuli
jaxa ma lom wax le'ji smuli oj kolta—.
Currently Selected:
Joel 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
