Jueces 9
9
Ja Abimelek
1Ja Abimelek yunin ja Gedeoni, waj b'a Siquem wa sk'um sb'aj sok ja smoj alijel jumasa, ti yala'a: 2Alawik yab' ja swinkil b'a Siquem ke'n oj a'tijukon ja b'a schonab'ile'i, smoj alijelone, mok lom ya'we ochuk ja tuk yuntikil ja Gedeoni.
3Ja'yuj ja smoj alijel jumasa, waj sk'umuke ja swinkil b'a Siquemi. Jaxa ye'nle'i yalawe wa sk'anawe ja Abimelek, 4cho a'jiyi'e jitsan tak'in, ja tak'in jawi, ti ya'we el b'a snajtsil stsomjel ja Baal-berit, ja b'a oj makunuk b'a oj smil'e ja tuk yuntikil ja Gedeoni. Jaxa Abimelek, stupu chab' oxe milwanum b'a oj mojtajuk yuj, 5ti waj b'a schonab'il ja stati. B'a jun ita ton ti ch'ak smil kan ja smoj alijel jumasa. Kechan ye'n kan sak'an ja Jotam tsa'an yunin ja Gedeoni, yuj ja snak'a sb'aji. 6Ja'yuj spetsanil ja swinkil b'a Siquemi, ch'ak stsom sb'aj sok ja sb'a Bet-milo, ti stsomo sb'aje b'a niwan yaxte tsa'ub'ali it tey b'a Siquem, ti ya'we och mandaranumil tiw ja Abimelek.
Ja lo'il sb'a Jotami
7Yajni k'ot schikin ja Jotam a'jita och mandaranumil ja Abimelek, ti k'e' ja b'a cha'anil wits b'a Guerizim, man tiwi, tsats lek awani:
Maklayik ja jas oj kal a wabyex kristyano jumasa b'a Siquem, Ja jachuki b'ob'ta oj smaklayex ja Dyos ja we'nlexi.
8Jun k'ak'u ja te' jumasa stsomo sb'aje b'a oj stsa'e' ma oj och ya'tel yujile. Ti yalwe yab' ja olivo ye'n oj och ya'tel yujile, 9jaxa olivo ti yala'a: B'a oj ochkon smandaranumil ja te' jumasa, t'ilan oj ka'kan ja jastal wala satiniyon yuj ja aceite it wax makuni b'a wax toyxi sok ja sdyos ja kristyano jumasa.
10—Ti cho yalwe yab' ja higo ye'n oj ochuk ja smandaranumili, 11jaxa higo ti yala'a: B'a oj ochkon smandaranumil ja te' jumasa, t'ilan oj ka'kan ja jastal jel chi' sok jex ajb'ani ja higo jumasa wax satini.
12Tsa'an ti yalwe yab' ja ste'il ja ts'usub'i, ye'n oj och smandaranumile, 13jaxa ye'n ti yala'a: B'a oj ochkon smandaranumil ja te' jumasa, t'ilan oj ka'kan ja jastal ke'n wax satin ja ya'lel ja ts'usub' it ja wax ya tsamalb'uk ja dyos jumasa sok ja winik jumasa—.
14Jachuk spetsanil ja te' jumasa, yalwe yab' ja ch'in k'i'ix ye'n oj och ya'tel yujile, 15jaxa te' jawi b'ut'el sk'i'ixil ja sb'ak'teli, ti yala'a: Ta meran k'a waxa k'anawex ke'n oj och ka'tel awujilexi, la b'a jijlanik ja b'a kaxub'ili. Kechanta yuj k'a mi oj jakanik, a'nima jun yal ch'inukon wilawex, ja b'a jb'ak'teli, oj el k'ak' oj ch'ak stsik spetsanil ja niwak segro jumasa b'a Libano.
16¿Lajan sok we'nlex ja lek a wilawex ja Abimelek ja oj och mandaranumili? ¿Jach' ma lek waxa wilawex ja Gedeon sok ja yuntikil ja jastal lek yilawex ja we'nlexi? 17Ye'nani tiro'ani ja jtat yuj ja we'nlexi, man ti ya'a sbida yuj ja skoltayex b'a sk'ab' ja kristyano jumasa sb'a madiani. 18Jaxa we'nlex ja yajni mixa lekuk ja jas a k'u'lanexta yi ja yuntikil ja jtati, yuj ja lom ti ch'ak a mil'ex kan b'a jun ita ton, cho jach'ni yuj ja a wa'wexta och mandaranumil b'a Siquem ja Abimelek, ja'ita yuj ja lom a moj alijel a b'ajex soki. 19Ta yuj k'a lek meran ja jas a k'u'lanex yi ja Gedeon sok ja yuntikili, tsamal ajyanik sok ja Abimelek, cho jach'ni ja ye'n a ajyuk tsamal a mokex. 20Kechan ta mik'a jachukuk jastal jawi, oj ajluk jun k'ak' ja b'a sb'ak'tel ja Abimelek, oj ch'ak sch'ak spetsanil ja swinkil b'a Siquem sok b'a Bet-milo, b'a schab'il ja chonab' jumasa jawi oj ajluk b'a jach' oj tsikjuk el ja Abimelek.
21Yajni chak yal ja jastal it ja Jotami, ti spaka ajnela, ti waj kulan b'a jun chonab' sb'i'il Poso, yuj ja wa'n xiwel yuj ja sb'ankil Abimelek.
Mi lek ilji ja Abimelek
22Yajni ek' oxe jab'il wa'n a'tel ja Abimelek, 23jaxa Dyosi, ya sna' k'inal ja kristyano jumasa b'a Siquemi, mok yil'e' lek ja Abimelek. 24Jachuk a'jini stup ja Abimelek yuj ja lom smila ja smoj alijel jumasa'a, jach'ni ja swinkil ja Siquem cho a'jini stup'e' yuj ja lom skoltane'i. 25Ay chab' oxe ja swinkil ja Siquemi, ti wax ajyiye nak'an b'a yaxk'ul, ja' schole wax yelk'ane yi ja jas sb'aj ja ma wax ek' ja tiwi. Jaxa Abimelek, k'ot schikin ja iti.
26Jun k'ak'u ja Gaal yunin ja Ebed, ti ek' b'a Siquem sok ja smoj alijel jumasa, jel lek yila sb'aje sok ja swinkil ja chonab' jawi, 27lajan ch'ak wajuke b'a alaj waj stul'e' sat ts'usub' b'a oj spits' e' ja ya'leli. Sk'u'lane jun niwan k'in, wa'ye yu'aje pajal yalel ts'usub' b'a snajtsil stsomjel ja sdyose'i, mini jun sb'ej ja jastal och sta'e ti' ja Abimelek. 28Jaxa Gaali, ti yala'a:
¿Jastal wax yala sb'aj ja Abimelek b'a? ¿Jasyuj ja ke'ntik swinkil Siquem ja ke'n t'ilan oj ochkotik a'tijumil b'a? Jel niwan wax ya'a sb'aj yuj ja ja' stat ja Gedeoni, ja smeranil ja Gedeon sok ja Zebuli, jun lom koltanum ochye sok ja Hamori, jaxa Hamori, ye'n ja ma niwan ya'tel b'a Siquemi. Ja'yuj ja ke'ntiki, ja' sb'ej oj ka'teltatik ja Hamori, jaxa Abimelek, mey sb'ej oj ka'teltatik. 29Ja lek ke'nuk xta mandaranumukon a wujilexi, juts'in wax ka eluk ja Abimelek ja ili, oj kal yab' a stsom spetsanil ja soldado janek' oj sta b'a oj tiro'anuk jmoki.
30Ja Zebul mandaranum b'a chonab'i, yajni yab' ja jas ch'ak yal ja Gaali, jel tajki. 31Ja'yuj sjeka ma oj waj aljuk yab' yuj ja Abimelek ja lo'il iti, jaxa Abimelek, tey b'a jun chonab' sb'i'il Aruma, ti alji yab'a:
Ja Gaal sok ja smoj alijel jumasa ti k'otye b'a Siquem, wa'ne sjomjel yi s'olom ja kristyano'i, wa'ne yaljel mok yil'a lek ja kristyano'i. 32Elan sok ja wa soldado jumasa ja ya'n a'kwali, ti'xa nak'a a b'ajex b'a wits, 33yajnix sakb'i, ti'xa joyb'anex ja chonab'i. Jaxa yajni oj eluk ja Gaal sok ja swinik b'a oj tiro'anuk a moki, k'u'lanyi'e ja jas waxa k'ana oj ja k'u'luki.
34Ja'yuj ja Abimelek sok spetsanil ja ma tey soki, ch'ak eluke ja a'kwal jawi, spila sb'aje chan k'ole, ti snak'a sb'aje b'a sjoyanal ja chonab' Siquem. 35Yajni elk'ot ja Gaal b'a wax ajyi ja chonab'i, ti'xa el ja Abimelek sok ja swinik jumasa b'a snak'unej sb'aje'i. 36Yajni yila ja Gaali, ti yal yab' ja Zebuli:
K'elawil. Ja wits jumasa wa'ne ko'el kon kristyano.
Ti yala ja Zebuli:
Mi kristyano'uk. Ja yaxub'il ja witsi.
37Jaxa Gaali, cho yala pilan majke:
K'ela lek, ja winik jumasa ti ko'um jan b'a nalan witsi. Jaxa b'a sb'ejlal ja yaxte'altik b'a wax ajyi ja k'intanum jumasa, cho jakum pilan k'ole ja tiwi.
38Ja'yuj ti yala ja Zebuli:
¿K'umanan ja yan b'a? ¿Jach' jastal a wala machunkiluk ja Abimelek ja oj ya ochkotik ya'tijumili b'a? Tey jaw ja winik jumasa ma mi a kisa. Elan jani, la tiro'anan soke.
39Jachuk ye'n el jan b'ajtan ja Gaal yuj ja swinkil b'a Siquem b'a oj tiro'anuk sok ja Abimelek. 40I'ji spatik yuj ja Abimelek, jaxa Gaali, spaka ajnel. Snajtil ja b'eji jel jitsan ja ma yajb'esji, k'otye man b'a wax ajyi ja chonab'i. 41Ja Zebuli, snutsu el ja Gaal sok ja smoj alijel jumasa b'a Siquemi, mini ya'kan ja tiwa. Jaxa Abimelek ti'ni kan b'a Aruma.
42Jaxa swinkil ja Siquemi, yalawe oj eluke b'a wits ja jecheli. Yajni yab' ja Abimelek, 43spila ox k'ole ja soldado jumasa yi'oji, ti snak'a sb'aje b'a wits. Yajni yila ja Abimelek ti'xa jakum ja kristyano'i, elye ja ye'nle b'a snak'unej sb'aje'i, waj snol k'ab'uke. 44Jaxa Abimelek sok ja swinik jumasa ye'n juts'in waj stim'e' ja b'a wax ajyi ochel ja chonab'i, jaxa chab' k'ole'i, ja' wa'ne smiljel ja ma ti aye ek' b'a yoj witsi. 45Ja Abimelek snajtil ja k'ak'u wa'n tiro'anel man yi'aj kan ja chonab'i, ch'ak smil spetsanil ja kristyano ma tey tiwi. Sjomo el ja na'its jumasa b'a chonab' jawi, stika yats'mil ja jipub'al na'its jumasa.
46Ja ma'tik tey b'a niwan na'its b'a Siquemi, yajni yabye ja jastik ch'akta ek'uki, ti ch'ak waj snol sb'aje b'a na'its b'a wax ajyi ja tsomjel b'a El-berit. 47Cho juts'in yab' ja Abimelek ti'xa wajta snol sb'aje tiwi, 48ja'yuj ti ch'ak waj sok spetsanil ja swinik b'a wits Salmon. Sk'utsu jujuntik k'ab' te' sok echej, sk'echa oche cho yal yab' ja swinik jumasa, jach' a cho sk'u'luke ja ye'nle'i. 49Spetsanile sk'utsuwe jujune k'ab' te' ti wajye sok ja Abimelek b'a na'its wax ajyi ja tsomjel b'a snolonej sb'aj ja kristyano jumasa. Ti ch'ak yawe och tiw ja k'ab' te' jumasa, schimawe yi sk'ajk'al. Jach' stsikawe jastal jaw ja niwan na'itsi, spetsanil ja matik ti aye b'a yojoli ch'ak chamuke, ay mojan jun mil ay winik sok ixuk.
50Tsa'an ja Abimelek ti waj b'a Tebes, sjoyb'an sok syama kani. 51Ja b'a yoj chonab'i ajyi jun niwan na'its talnanub'al lek. Spetsanil ja swinkil sb'a chonab'i winik ixuk ti ch'ak snak' sb'aje tiwi. Slutuwe kan lek ja b'a wax ajyi ochel jumasa, jaxa ye'nle'i ti ch'ak k'e'uke b'a s'olom ja na'itsi. 52Jaxa Abimeleki och mojan ja b'a wax ajyi ochel ja niwan na'its b'a oj sch'ay sna'jel, ja'xa wa'n schapjel sb'aj b'a oj ya ajluk ja k'ak' b'a oj stsiki, 53jun ixuk sjipa kon jun k'ab' cha'. Ti ko' kajan b'a s'olom ja Abimelek, poj el ja s'olomi. 54Juts'in spaya june ja smoj ma yi'oj ja stujk'anub'i, ti yal yab'a: A el juts'in ja wa punyali milawon. Mix k'ana ma oj yal jun ixuk ja ma smilawoni.
Ti jak ja smoji slapayi ja spunyali, jach' cham jastal it ja Abimelek. 55Yajni yabye ja israelenio jumasa chamta, ti'xa ch'ak kumxuke b'a snaje'a.
56Ja Dyosi, jach' ya stup jastal it ja smul ja Abimelek yuj ja lom ja sk'u'lan yi ja stati, sok yuj lom ch'ak smil ja smoj alijel jumasa. 57Cho jach'ni ja Dyosi, ya stup ja smul ja kristyano jumasa sb'a Siquem yuj spetsanil ja jas mi sb'ejuk sk'u'lane'i, jach'ni jastal yala jan ja Jotam ja yajni mi sb'ejuk ja jastal sta'a ti' ja kristyano jumasa jawi.
Currently Selected:
Jueces 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
