Jueces 10
10
Ja Tola
1Tsa'an yuj ja Abimelek ay jun winik sb'i'il Tola, tey sok ja k'ole b'a Isacari. Ja ye'n jel skolta ja israelenio jumasa. Ja stat ja Tola sb'i'il Pua, ja stat aweli sb'i'il Dodo, ti kulan b'a Samir b'a yaxk'ul jumasa sb'a Efrain. 2Jun tajb'e jab'il a'tiji sok ja israelenio jumasa, yajni chami ti smukuwe b'a chonab' Samir.
Ja Jair
3Tsa'an yuj ja tola, ye'n och mandaranumil ja Jair sb'a Galaad. A'tiji sok jun tajb'e sok chab' jab'il ja israelenio jumasa. 4Ajyi jun tajb'e sok lajune ja yuntikili, spetsanile jel niwan wax iljiye, ay yi'oje ajyi jun tajb'e sok lajune chonab' b'a Galaadi, man ya'n wax na'xi sb'aj ja schonab' jumasa sb'a Jair. 5Yajni cham ja Jair, ti smukuwe b'a jun lu'um sb'i'il Camon.
Ja swinik Amoni yilawe sk'ujol ja israelenio jumasa
6Ja israelenio jumasa cho sle'a smule pilan majke b'a sti' sat ja Dyos yuj ja lom stoyowe ja Baal sok ja Astarte, cho jach'ni stoyowe yi ja sdyose ja swinkil ja Siria, jaxa swinkil ja Sidoni, ja Moabi, ja Amoni, sok ja filisteo jumasa. Ya'we kan patikajel ja Dyosi, mixa stoyowe. 7Ja'yuj ja Dyosi, jel tajki sok ja israelenio jumasa, a'jiye kan b'a sk'ab' ja filisteo sok ja amonita jumasa, b'a chikan jas utjuke. 8Waxak lajune jab'il jel ixta iljiye yuj ja filisteo sok ja amonita jumasa, ja israelenio jumasa ti kulane b'a Galaad b'a stojol wax jak ja k'ak'u yuj ja niwan ja' Jordani, ja'ni b'a slujmale ja amorreo jumasa. 9Ja swinkil ja amoni, sk'utsuwe ja niwan ja' Jordan b'a waj snol k'ab'uke ja k'ole jumasa sb'a Juda, sb'a Benjamin sok sb'a Efrain, jaxa israelenio jumasa ti'ni ch'ikane b'a yoj niwak wokola.
10Ja'yuj ja israelenio jumasa sk'anawe yi ja Dyos a koltajuke yuj, ti yalawe'a:
Jta'a jmultikon a mok yuj ja ka'watikon kan patikajel yuj ja lom waj toytikon pilan dyosi.
11Ti yala ja Dyosi:
Ke'n ka elanik b'a yib' sk'ab' ja egipsiano, ja amorreo, ja amonita, sok ja filisteo jumasa, ¿Mi ma meranuk ja it b'a? 12Yajni a k'anawex ki ts'akatal oj koltayexi, ka'ni elanik b'a yib sk'ab' ja kristyano jumasa sb'a Sidoni, b'a amalek sok b'a madiani. 13Jachuk cho a jipawonex kan ja ke'n waj ja toy'ex pilan dyos, ja'yuj ja ya'n mixa oj koltayex. 14Kax alawik yab' ja tuk dyos jumasa a skoltayex yuj ja we'n a tsa'awex ye'n oj ya elanik b'a wa wokolexi.
15Ja israelenio jumasa cho yalwe yab' jun majke smoj ja Dyosi:
Wax na'atikon jta'atani jmultikona, ja'yuj wax ka'a jb'ajtikon b'a wa k'ab', k'u'lan ja jas waxa k'ana oj a k'u'lki'tikoni. Kechan wax k'anatikon a wi koltayotikonxa b'a.
16Ja'yuj ch'ak yawe eluk ja sk'u'lub'al dyose'i, ja'xa och stoy'e' ja Dyos sak'ani. Jaxa ye'n ja Dyosi, jel cham sk'ujol yuj wax yila jastal wa'n yi'jel wokol ja yuntikili.
17Jaxa kristyano jumasa sb'a amoni, schapa sb'aje b'a oj wajuke b'a tiro'aneli, ti sk'u'lan ja snaje tojb'el sok k'u'uts b'a Galaad. Jaxa ye'nle ja israelenio jumasa stsomo sb'aje ti sk'u'lan ja snaje tojb'el sok k'u'uts ye'nle b'a Mispa. 18Jaxa ma'tik ay ya'tel yuj ja israelenio it ti aye b'a Galaadi, slaja lek sb'aje, ti yalawe'a: Ja ma oj stsatsal k'ujoluk sb'aj oj ek' b'ajtan b'a oj tiro'anukotik sok ja kristyano jumasa sb'a amoni, ye'n oj och niwan ya'tel kujtikon ja janek' ti aytikon b'a Galaad.
Currently Selected:
Jueces 10: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
