Jueces 8
8
Ja stik'anal ch'ayji sna'jel jas swinkil madiani
1Ja k'ole jumasa sb'a Efraini, jel tajkiye sok ja Gedeoni, ja'yuj, stajb'aye:
¿Jasyuj ja mi a wala kab'tikon ta yuj k'a oj tiro'ananik sok ja kristyano jumasa sb'a madiani? ¿Jasyuj ja mi a wala b'a?
2Ti yala ja Gedeoni:
Kechan mi oj slaj ja jastal a k'u'lanex ja we'nlexi, ja ke'n lajan sok mini jas jk'u'lana, ja t'usan a k'u'lanex ja we'nlexi, masto niwan yuj ja jas jk'u'lantikon ja ke'ntikoni. 3Sts'akatal ja Dyosi, b'ob' ya'a yam'ex ja Oreb sok ja Zeeb ma' niwan ja ya'tel yuj ja madianita jumasa, ja jawi jel niwan.
Sok ja jas yala ja Gedeoni, ti kujlaji sk'ujole ja swinik jumasa ja Efraini.
4Jaxa Gedeon sok ja oxe syen (300) soldado smoj sb'aj soki, yajni k'otye b'a niwan ja' Jordani, ek' sk'uts e', jelxa k'umb'ele ti'toni wa'ne yi'jel spatik ja ma' mi lek wax iljiye yuji. 5Yajni k'otye b'a Sucot, ja Gedeoni ti yala yab' ja swinkil chonab'i:
Ts'akatalukexa, a'wikyi jas oj yab' ja jsoldado jumasa, jelxa k'umb'ele. Ja wa'ntikon yi'jel spatik ja Zebah sok ja Salmuna smandaranum ja swinkil madiani.
6Jaxa ma'tik niwak ja ya'tele b'a Sucot ti yalawe'a:
¿Jasyuj ja oj ka'tikon yi swa'el ja wa soldado jumasa b'a? —Mito syamawe ja Zebah sok ja Salmuna tak—
7Ti cho yala ja Gedeoni:
Lek ay. Dyos wa sna'a jastal oj b'ob' jyamtikon ja Zebah sok ja Salmuna. Yajnix yamxi kujtikoni, oj kumxukotikon ja b'a lu'um k'inal iti, kechan ojni katikona tup'ex ja we'nlexa. Ja' oj jle'tikon ja ch'u'uyil te' b'a takin lu'um k'inal b'a oj mak'extikon soki.
8El ja tiw ja Gedeoni, ti waj b'a chonab' Penuel, cho ja'ni sk'anayi ja swinkil ja chonab' jaw ja jastal sk'ana b'a Sucoti, Ja swinkil b'a Penueli, jach'ni yala ja jastal yalawe ja swinkil ja Sucoti. 9Ja'yuj ja Gedeoni, ti yal yab' ja swinkil ja Penueli:
Yajni la kumxiyon ja yajnix kan lamani, oj jip ko man lu'um ja na'its iti—.
10Ja Zebah sok ja Salmuna, ti aye b'a Cancor ja juts'in, sok mojan jo' lajune mil (15,000) soldado, ja soldado jumasa it elye b'a wax jak ja k'ak'u, ja'xta janek' kan ja jawi, yuj ja chamye jun syen sok jun tajb'e (120) soldado. 11Ja Gedeoni, ti k'e' b'a b'ej b'as stojol wax jak ja k'ak'u yuj ja Nobah sok b'a Jogbeha, jun ita ch'ay k'ujol och ja b'a'ye ja chab' mandaranumi. 12Ja Zebah sok ja Salmuna, ojto spak e' ajnel ajyi, jaxa Gedeoni, yi'aj spatik, juts'in syama. Sok ja jawi jel och sxiwele ja soldado jumasa sb'a madiani.
13Yajni kumxi, ja Gedeon b'a tiro'aneli, ti ek' b'a jun chonab' sb'i'il Jeres, 14ti syama jun kerem sb'a Sucot, sjob'oyi chab' oxe lo'il. Ja kerem jawi ch'ak yal ja sb'i'il ja ox tajb'e lajune sok juke (77) ma'tik jel niwak ja ya'tel b'a Sucoti. 15Jaxa Gedeoni, ti waj sk'um sb'aj sok ja winike jumasa jaw b'a Sucoti, ti yala yabye'a: ¿Wa'nto maxa na'awex ja jas a wutajonex ja it mi a koltayonexi? Ja it mi a wa'wex yi swa'el ja jsoldado jumasa ja yajni jelxa k'umb'ele'i, ja'yuj ja me'x yamxi kujtikon ja Zebah sok ja Salmuna. ¿A na'awex ma? Ja jayuj it b'a'yejula.
16Jaxa Gedeoni, ti'xa syama ja ma'tik jel niwak ja ya'tel b'a Sucoti, och smak' lek sok k'ab' k'i'ix sok ch'u'uyil te' sb'a takin lu'um k'inal. 17Cho sjipa ko man lu'um ja niwan na'its b'a Penueli, smila swinkil b'a chonab' jawi.
18Tsa'an ti sjob'oyi ja Zebah sok ja Salmuna:
¿Jastale ja winike it a milawex b'a tabori?
Jaxa ye'nle'i, ti yalawe'a:
Lajane sok jastal ja we'n, lajan sok jastal niwak mandaranume.
19Ti yala ja Gedeoni.
Ja jawi ja moj alijel jumasa, jani yuntikil ye'n ja jnani. B'a sti' sat ja Dyosi, wax kala wabyex ja' lek mokxta a mil'exi, jach'ni ja ke'n a chawanilex mi oj mil'ex.
20Jaxa Gedeoni, ti yala yab' ja Jeter yunin ja b'ankilali: K'e'an tek'an. Milawe.
Jaxa Jeteri, mi b'ob' ya eluk ja smachit yuj ja xiweli, yujni jelto untik ja ye'na. 21Jaxa Zebah sok ja Salmuna, ti yalwe yab' ja Gedeoni: Ta yuj k'a meran ja jel tsatsa, milawotikon we'na.
Ti k'e' tek'an ja Gedeoni smila. Ch'ak ya elyi ja jastik sb'otsoneje b'a snuk' ja scameyo ja Zebah sok ja Salmuna.
22Tsa'an ja israelenio jumasa ti yalawe yab' ja Gedeoni:
Wax k'anatikon we'n oj ochanik mandaranumil kujtikon sok wa wintil jumasa, yuj ja we'n a koltayotikon b'a sk'ab' ja swinkil jumasa b'a madiani, —xchiye.
23Ti yala ja Gedeoni:
Mini a ke'n sok mini ja kunin oj ochkotikon mandaranumil. 24Kechan june ja jas wax k'ana a wi'exi: Jujune a'wik ki' ja yaniyo'e ja ma'tik a yamawexi.
Yujni jachuke'a ja madianita sok ja kristyano jumasa ma' teye b'a takin lu'um k'inali, toj k'anal tak'in ja yaniyo'e'i. 25Jaxa israelenio jumasa ti yalawe'a:
Lek ay, it b'ay jula.
Ti slib'awe jun k'uts ja b'a lu'umi, jujune ya'we och jan jujune aniyo ja b'a sta'awe jani. 26Ja yalal ja k'anal tak'in janek' yi'aj kan ja Gedeoni, ay mojan b'alun lajune (19) kilo. Pilan ja likchikinali, ja lekil k'u'uts jumasa wax makuni yuj ja mandaranum jumasa b'a madiani, ujal jumasa. 27Sok spetsanil ja k'anal tak'in jumasa jawi, ja Gedeoni sk'u'lan sok jun lechan dyos ti ya'a b'a Ofra, b'a spetsanil ja schonab'il ja israelenio jumasa. Sk'okowe ja yab'al ja Dyosi, yuj ja ja' stoyowe ja k'u'lub'al dyos jawi. A'nima ja Gedeon sok ja swinkil snaji, kechan ita makuni b'a lo'lajiye yuj.
28Jach' jastal it b'ob' k'u'lajuke ganar ja madianita jumasa yuj ja israelenio, jachuk mixani t'un sta'a yipe'a. Ja jaye k'ak'u ajyi sak'anil ja Gedeoni, chab' tajb'e jab'il (40) ajyi laman ja kristyano jumasa b'a tiwi.
Cham ja Gedeoni
29Ja Gedeoni, ti kulan b'a schonab'il ye'na, 30ja tiwi, jel jitsan ajyi ja yuntikil sok ja tuktukil sche'umi. 31B'a Siquem ay pilan sche'um ajyi sok jun yalats ya sb'i'iluk Abimelek. 32Ja yajni cham ja Gedeoni, byejoxa lek. Ti smukuwe b'a sk'ejnal ja stat Joasi, ti b'a schonab'il ja Abiezer b'a Ofra.
33Tsa'an yajni cham ja Gedeoni, ja israelenio och sle' smule pilan majke b'a sti' sat ja Dyosi, och stoy'e k'u'lub'al dyos. Stsa'awe ja sdyosil oj sk'u'uke, yalawe ja oj sk'u'uke ja dyos Baal-beriti, 34sch'aya sk'ujole ja Dyos sak'an it koltajiye yuj b'a mi jas oj utjuke yuj ja ma' mi lek wax iljiye yuji, 35mi yilawe lek ja yuntikil ja Gedeoni, mi t'un jak sk'ujole spetsanil ja jas lek k'u'lajiyi'e yuji.
Currently Selected:
Jueces 8: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
