Jueces 7
7
Ja Gedeoni, yila sk'ujol ja madianita jumasa
1Ja ma Gedeon sb'i'il ajyi, ja yan Jerubaal, sok spetsanil ja ma' tey sok ja ye'n, sajto lek ch'ak k'e'uke, ti waj sk'u'luk ja snaje b'a jun sat ja' sb'i'il Harod. Jaxa snaje ja kristyano jumasa sb'a madiani, ti wax kan b'a k'e'el k'inal, b'a loman yaman yib' wits More.
2Ti alji yab' yuj ja Dyos ja Gedeoni:
—Jel jitsan ja soldado jumasa a wi'oji, oj ek sk'ujole yuja b'ob' xch'aye' sna'jel ja madianita jumasa yuj ye'n ita b'ob' yujile mi yuj ke'nuk. 3Ja'yuj ja lek tsomowe ala yabye, ja ma oj xiwuki a kumxuk b'a snaj.
Ja Gedeoni, jach' stsa'a jastal it ja kristyano'i. Jun tajb'e sok chab' mil (22,000) soldado kumxiye b'a snaje, lajune mil (10,000) kan sok ja Gedeoni.
4Ja Dyosi, cho sk'uman pilan majke ja Gedeoni, ti yala'a: —Aytoni jitsan ja soldado'a. Ch'akan i'aje uk'uj ja' b'a ti oj kil taj oj b'ob' yujele meran. Ti oj je'awi tiw machunk'a oj wajuk a moki, sok machunk'a mi oj wajuki.
5Jaxa Gedeoni, ch'akni yi' uk'uj ja' ja soldado jumasa'a, ti alji yab' yuj ja Dyosi: A' pilan ja ma'tik oj ko' nujan oj yu' ja ja'i, cho a' pilan spetsanil ja ma b'echub'al oj ya' eluk ja ja' oj yu' jastal wax yu'aj ja' ja ts'i'i—.
6Oxe syen (300) ja soldado ma b'echub'al yu'aj ja ja'i, jach'ni yu'aje jastal wax yu'aj ja' ja ts'i'i. Spetsanil ja tuki nujan ch'ak yu'e'. 7Ja Dyosi, ti yala yab' ja Gedeoni: Sok ja oxe syen (300) soldado iti, oj b'ob' jkoltayex, sok ojni ka'a chay ex najel ja madianita jumasa. Spetsanil ja tuk jumasa ojxa b'ob' wajuk b'a snaje'.
8Jachuk kan sok oxe syen (300) soldado ja Gedeoni. Ch'ak stsom ja ch'ub'i sok ja skacho'e ja tuk jumasa, ja ma kan soki ch'ak ya kumxuk och b'a snaje k'u'lub'al sok k'u'uts. Jaxa madianita jumasa jas snaje k'u'lub'al sok k'u'utsi, ti wax kan ko'el b'a slomanal.
9Ja a'kwal jaw ja Dyosi, ti yala yab' ja Gedeoni:
K'e'anik kax nol k'ab'inik ja madianita jumasa. We'n oj ka'a ch'ay e sna'jele. 10Kechan ta yuj k'a wala xiw yuj ja oj ja nol k'ab'ukexi, ko'anik ko sok ja wa wa'tijum Pura b'a tojb'el ja yal snaje sok k'u'utsi. 11Yajni oj ja wab' jas wa'ne yaljeli, ti oj ja ch'ay tiw ja xiweli.
Ja'yuj ja Gedeon sok ja ya'tijumi, wajye ja b'a snajtsil wax talnaniye ja soldado jumasa ma' mi lek wax iljiye yuji. 12Ja kristyano jumasa sb'a madiani, sb'a amalek sok spetsanil ja kristyano jumasa b'a wax jak ja k'ak'u, ch'ak stik sb'aje spetsanil ja b'a loman jawi. Lajane sok jastal ja k'ujlub' jumasa, jel jitsan yi'oje ja cameyo jumasa, jach' jastal ja jijkab' b'a ti' ja'i. 13Yajni k'ot ja Gedeon ja b'aye'i, ti yab' wa'n yaljel ja swayich jun soldado wa'n yaljel yab' jun smoj soldado'il. Ti wax yala'a:
Wax waychin, jun pan ti wa'n setetuk jan ja b'ay ja najtik tojb'el sok k'u'utsi, tojxta spak'tsun sb'aj sok jun na'its sjipa ko'e.
14Ti yala jas moj soldado'ili:
Ja iti, ja wa sk'ana yal ja soldado jumasa sb'a Gedeoni, Dyos oj koltajuke yuj, b'a mi jas oj b'ob' skuluk ja jsoldado ke'ntiki.
15Yajni yab' ja Gedeon ja wayichal sok ja jas wa sk'ana yali, ti och stoy ja Dyosi. Ti'xa waj ja b'a yal na'its jumasa tojb'el sok k'u'uts yuj ja israelenio jumasa, ti yala'a: K'e'anik a petsanilex. Ye'n ja Dyos oj ya ch'aytik sna'jel ja soldado jumasa sb'a madiani.
16Ja Gedeoni spila ox k'ole ja soldado jumasa ye'n, ch'ak ya'yi skacho sok sch'ub' b'a mey sb'a'al. B'a yojol ja ch'ub'i ya'we och sk'ajk'al. 17Tsa'an ti yala yab' ja soldado jumasa: Yajni la mojxitik och b'a na'its jumasa tojb'el yujile sok k'u'uts ja swinkil madiani, ti'xa k'elawonex ke'na'a, cho k'u'lanik ja jastal oj ja wil'ex oj k'u'luk ja ke'n. 18Yajnix ka'tikon ok'uk ja jkachotikon sok ja jmoj jumasa, jach'ni ja we'nlexi cho a'wik ok'uk ja wa b'ajexi, ti' la awaniyexa: Ja iti, ja yuj ja Dyos sok ja Gedeoni.
19Jaxa Gedeon sok ja syen (100) soldado yi'oj ye'n ochye mojan ja b'a na'its jumasa tojb'el yujile sok k'u'utsi ja ma' mi lek wax iljiye yuji, mojan nalan a'kwal, ja' oj och pilan ja ma wax talnani. Ya'we ok'uk ja skacho'e'i, cho spojowe ja ch'ub' yi'oje och b'a sk'ab'e'i, 20jaxa tuk chab' k'ole'i, jach'ni cho sk'u'lane'a. Ja k'ak'i ja yaman yuj ja spakax sk'ab'e'i, ja'xa skacho'e'i, ja yaman yuj ja stojol sk'ab'e'i, spetsanile awaniye: —Tiro'anel. Sb'a Dyos sok b'a Gedeon—.
21Ja tuk israelenio jumasa, chapanxta aye b'a jujune ja schole'i, sjoyb'uneje ja b'ay ja snaje k'u'lub'al sok k'u'utsi ja ma' mi lek wax iljiye yuji. Yajni yabye och ajyuk ja awanel ja soldado jumasa sb'a madiani, ch'ak spak e' ajnel spetsanile. 22Jaxa israelenio jumasa, mi ch'ajb'ajiye ya'jel ok'uk ja skacho'e'i, ja ma' mi lek wax iljiye yujile'i, ye'nle ita a'ji syamtala'uk sb'aje yuj ja Dyosi, sok ch'akni spak e' ajnela. Ti wajye b'a Bet-sita b'a sb'ejlal Serera, k'otye man b'a tik'an ja slu'um ja Abel-mehola mojan sok ja chonab' Tabat.
23Ti ch'ak spay'e' ja winik jumasa b'a k'ole sb'a Neftali, sb'a Aser sok spetsanil sb'a Manasesi, b'a jach' lajan oj yi'e spatik ja soldado jumasa sb'a madiani. 24Ja Gedeoni sjeka aluman yab' spetsanil ja chonab' jumasa sb'a Efraini, jach' waj yal'e jastal iti: La'ik oj nol k'ab'uktike ja swinkil madiani. K'elawik lek ja ko'elko yuj ja niwan ja' Jordani sok ja yal yok ja' jumasa'i, man b'a Bet-bara, b'a jach' mini b'a oj b'ob' ek'uke ja madianita jumasa.
Ja k'ole jumasa sb'a Efraini, sk'u'ane ja ab'al jumasa iti, 25syamawe ja Orebi, ja Zeebi, ye'n niwan ya'tele yuj ja madianita, ja Orebi ti smilawe b'a jun patak', wax na'xi sb'aj, ja spatak' ja wi Oreb. Jaxa Zeebi, ti smilawe b'a wax pits'xi, ja ya'lel ts'usub'i, wax na'xi sb'aj b'a wax pits'xi ya'lel sts'usub' Zeeb. Yi'aje spatik ja madianita jumasa, tsa'an yi'aje och yi' ja Gedeon ja s'olom ja Oreb sok ja Zeebi, jaxa Gedeoni, tey b'a sti' ja niwan ja' Jordani.
Currently Selected:
Jueces 7: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
