Jueces 6
6
Ja Gedeoni
1Tsa'an ja israelenio jumasa, cho sle'a smule b'a sti' sat ja Dyosi, ja'yuj ye'nani ja Dyos yal yab' ja swinkil madian ye'n oj a'tijuke juke jab'il. 2Yuja lom jel wax yixtalane ja israelenio ja'yuj ti wax waj snak' sb'aje b'a k'e'en jumasa b'a wits. 3Ja yajni ay ja sts'unan yujile ja israelenio jumasa, wax jak jas swinkil madiani, sb'a Amalek sok wax jak ja ma'tik ti aye b'as tojol wax jak ja k'uk'u, wax ch'ak jak sch'ak e'; 4-6ti wax jak sk'u'luk ja yal snaje b'a yoj alaj jumasa jawi, jach' ti wa sch'akawe el ja sb'a'ali, mi kechanuka, wax ch'ak yi'e ja scheje jumasa, ja swakaxe' sok ja sburro'ei. Mi jas wax a'ji kani b'a oj yab' ja ye'nle'i. Jel jitsan ja ma' ti' jakume sok ja cameyo jumasa, mix b'ob' yajtab'ajel ja chante jumasa, lajan sok ja jastal jel a'ay wax jak ja k'ujlub' jumasa, wa sch'akawe spetsanil ja jastik jumasa, jel wax ya'we yi wokol ja israelenio jumasa. Spetsanil ja jastal iti, cho jach'ni wa'n ek'el yuj ja ma'tik tey b'a niwan paman ja'i jumasa mojan b'a Gaza.
7Jaxa israelenio jumasa, sk'anawe yi ts'akatal ja Dyos a koltajuke yuj ja jastal jel wax ixtalajiye yuj ja madianita jumasa, 8jaxa Dyosi, sjeka jun aluman Dyos, b'a oj aljuk yabye yuj:
Ja Dyos yuj ja israelenio ye'n ya elanik b'a Egipto b'a yib k'ab'al ayex ajyi. 9Mi kechanuk ja skoltayex yuj ja egipsiano jumasa, cho skoltayex yuj ja tuk chonab' jumasa jastal mix yilawex leki, sok ja jastal wax ch'ak yelk'aye wa jastik a b'ajexi. Yajni wa'nex mojxel ja we'nlexi, wan snutsjel spetsanil ja kristyano jumasa jawi, b'a oj ya'wi'ex we'nlex ja lu'um jumasa jawi. 10Ja Dyosi, yala wabyex kechani ye'n Dyos smeranila, yala mok a toy'ex ja sk'u'lub'al dyose ja amorreo jumasa b'a ayex ja juts'in. Mini a kisawexa.
11Ti jak ja yanjel ja Dyosi, ti och kulan b'a yib' yaxte it tey b'a Ofra. Ja te' jawi, sb'aj ye'n ajyi ja Joas yintil ja Abiezeri. Ja k'ak'u jaw ja Gedeon yunin ja Joasi, wa'n yajel el tsilelil trigo ajyi, ja b'a it wax tojb'i ja ya'lel ts'usub'i, yuj xta nak'ul yuj ja wax xiw yuj jas swinkil madiani. 12Ja yanjel ja Dyosi, sje'a sb'aj yi ja Gedeoni, ti yala yab'a:
Ja we'n jel tsatsa. Ja'yuj ja ti'ni ay a mok ja Dyosi.
13Ti yala ja Gedeoni:
—Kajwal, ts'akataluka'a, ta yuj k'a tey jmoktikon ja Dyosi, ¿Jasyuj ja jach' wa'n ek'el kujtikon spetsanil ja it b'a? ¿Jasyuj ja mi sk'u'lan jun milagro, ja jastal sk'u'lan b'a Egipto b'a? Ja ma ek' paxta kujtikoni, yalawe kan kab'tikon ja jastal jel tsamal sk'u'lan jan ja Dyosi; jas yuj jel juts'in sch'ayawotikon sk'ujol b'a, ya'awotikonta b'a sk'ab' ja swinkil jumasa b'a madiani.
14Ja'yuj ye'nani ja Dyos stsa'a ja Gedeoni, ti yala ya b'a:
Yujni, we'n oj ja kolta ja israelenio b'a sk'ab' ja madianita jumasa'a. A'yi ja janek' oj b'ob'uk a wuji, jaxa ke'n ojni cho jkoltaya'a.
15Jaxa Gedeoni, ti sjob'oyi ja Dyosi:
Jaxa Dyos kuji, ¿Jastal oj b'ob' jkolta ja israelenio jumasa? Ja janek' aytikon ja k'ole ke'ntikon b'a Manasesi, jel ajula jb'ajtikon, sok ke'nani ja jel ajula jb'aj ja b'a jpetsaniltikon ja janek' aytikoni.
16Ti alji yab' yuj ja Dyosi:
—Oj b'ob'uk a wuj, ja ke'n ti oj ajyukon a mok b'a oj koltaya'a. Oj ja ch'ay sna'jel spetsanil ja madianita jumasa, lajan sok june ita ja ma wa'na sch'ayjel sna'jeli.
17Jaxa Gedeoni, ti och sta' mojan ja anjeli, ti yala yab'a:
Ta yuj k'a ye'n wax yala kab' ja Dyos ja jas oj jk'u'luki, je'a ki jun senya ta yuj k'a ye'n meran ja sk'umanonta. 18Ts'akataluka'a, mokto wajan t'ani, ojto jchapawi t'un jas oj ja wab'i.
Ti yala ja yanjel ja Dyosi:
Ti oj majluka ili, —xchi.
19Jaxa Gedeoni, ti waj schapyi ja jas oj yab' ja anjeli. Smila jun yal chivo, schapa lajune kilo arina sk'u'lan pan b'a mey slevadura'il. Ja b'ak'eti ti ya'a b'a jun mo'och, jaxa ya'leli, ti ya'a b'a jun oxom. Ti yi'aj och b'a yib' niwan yaxte, ti ya'yi ja smajtan ja Dyosi. 20Ja anjeli ti yala'a, ja b'ak'et sok ja pani, ti'xa wa'a kajan b'a sat ton, jaxa ya'leli, tixa pek'a b'a sat ja b'ak'et sok ja pani. Ja Gedeoni, jach'ni sk'u'lana. 21Jaxa ye'n ja anjeli, schuku sok ja snajb'ante' ja b'ak'et sok ja pan it mey slevadura'ili, jaxa ton b'a kajan ek'i, ajli ch'ak stsike; jaxa yanjel ja Dyosi, ti'ta sak ch'aya. 22Ja k'ak'u jawi, ti'to jak sk'ujol ja Gedeon ja schol ja yanjel ja Dyosi, jel och ja sxiweli, ti yala'a:
—Dyos kuj, ja ya'n ojni chamkon yuj ja kila jb'aj sok satilajel ab'al ja wa wanjeli.
23Ti alji yab' yuj ja Dyosi:
Mok xiwan mi oj chaman, ja ke'n jakelon b'a oj ka ajyan laman.
24Ja'yuj ja Gedeoni, stojb'es jun yaltar ja Dyos ja tiwi, ya sb'i'iluk Ja Dyosi, wax ya'wotik laman. Man ya'n ja lo'il iti, jach'toni wax ts'ijb'axi'a, ja altar jawi, man ya'n tey b'a Ofra b'a schonab'il ja k'ole jumasa sb'a Abiezeri.
25Ja a'kwal jaw ja Dyosi, yala yab' ja Gedeoni:
Ka'ax ja b'ay ja swakax ja wa tati, i'aj junuk ja b'a kojlel leki. Ch'akan jomo'el ja yaltar ja dyos Baal it yi'oj wa tati, jach'ni ja sk'u'lub'al dyos Asera it tey sok lajan ja yaltar ja Baali, ch'akan jomo'ele. 26Jaxa we'n ti'xa k'u'lan jun kaltar sok laja ton b'a man sni' ja witsi. I'aj ja wakax it kala wab'i, mila ti'xa tsikaki tiwi, a makunuk sb'a si' ja k'u'lub'al dyos it ch'aka jomi.
27Ja Gedeon ja a'kwal jawi, yi'aj lajune ja ya'tijumi, sk'u'lan ja jastal alji yab' yuj ja Dyosi. Mi yala oj sk'u'l b'a sat k'ak'u yuj ja lom wa xiw yuj ja smoj alijel jumasa, cho jach'ni yuj spetsanil ja kristyano jumasa b'a chonab'i.
28Jaxa yajni sakb'i, ch'ak k'e'uke ja kristyano jumasa, waj yil'e' jomelxa ja yaltar ja Baali, cho jach'ni ja k'u'lub'al dyos Asera jomel. Jaxa b'a ajk'ach altari, tsikjita jun wakax. 29Ti wa sjob'talan sb'aje'a: ¿Machunk'a jach' sk'u'lani?
Tsa'an yajni ch'ak smak e' yab'alil machunk'a jach' sk'u'lani, ti yabye ye'n ja Gedeon ja ma jach' sk'u'lani. 30Ja'yuj sle'awe ja stat ja Gedeoni, ti yalawe yab'a:
I'ajan il ja wa wunini. Oj miltikon yuj ja lom ch'ak sjom ja yaltar ja Baali, cho jach'ni ja ixuk dyos Asera, ch'akni sjoma.
31Jaxa Joasi, ti yala yab' spetsanil ja kristyano'i:
A petsanilex ja we'nlexi, yuj ja ti ayex sok ja dyos Baali, ja'yuj waxa k'ana oj ja koltayex. Chikan ma' wa sk'ana oj skolta ja ya'n sakb'eli ojni chamuka. Yuj k'a yuj dyos ja Baali, a skolta sb'aj stuch'il. Jaxa altar it jomeli, sb'ajni ye'n ajyi'a.
32Man k'ak'u jawi, stukb'ese yi ja sb'i'il ja Gedeoni, yawe sb'i'iluk Jerubaal, yuj jach' yala jastal it ja Joasi: —A skolta sb'aj stuch'il ja Baali. Jaxa altar it jomeli sb'ajni ye'n ajyi'a—
33Tsa'an spetsanil ja madianita, ja amalesita, sok ja kristyano jumasa ma ti aye b'a wax jak ja k'ak'u. Ch'ak ek' sk'uts e' ja niwan ja' Jordani, ti stojb'es ja snaje b'a loman yaman b'a Jezreel. 34Jaxa Gedeoni, ja'ni tey sok ja yespiritu ja Dyosi, ya ok'uk ja skacho b'a oj stsom sb'aj ja kristyano jumasa sb'a Abiezeri. 35Sjeka aluman yab' spetsanil ja swinkil ja chonab' jumasa, ja k'ole sb'a Manasesi, b'a jach' oj b'ob' cho stsom sb'aje ja k'ole jumasa jawi. Cho sjeka aluman yab' ja k'ole jumasa sb'a Aseri, sb'a Zabulon sok sb'a Neftali, jach'ni ja ye'nle'i, ch'akni stsom sb'aje'a.
36Jaxa Gedeoni, ti yala yab' ja Dyosi:
Wax k'ana oj na' ta meran oj makunukon a wuj b'a oj ka el k'ab'al ja israelenio jumasa ja'ni ja jastal a waloj kab'i. 37Ja k'u' chej iti, ti oj ka'kan b'a wax ju'xi ja sat ja trigo, yuj k'a po'xel ja sakb'eli, jaxa lu'umi takin k'a ay sjoyanal, ti oj na' yujni oj makunukon a wuj meran b'a oj kolta ja israelenio jumasa'a.
38Ja jastal sk'ana oj yil ja Gedeoni, jach'ni je'ji yi'a. Ja Gedeoni sajto lek k'e' ja pilan k'ak'u, waj yil ja k'u' chej jawi, po'xel lek sta'a, spits'a b'ut' jun niwan tasa ja ya'leli. 39Tsa'an ja Gedeoni, ti yala yab' ja Dyosi: ¿Mok tajkan jmok yuj ja jas oj job' a wi'i? Ts'akataluka'a, cho je'aki pilan senya. Ja majke iti, wax k'ana takin oj kanuk ja k'u' cheji, jaxa lu'umi, a po'xuk.
40Ja Dyosi, jach'ni sk'u'lan ja a'kwal ja wa. Yajni el ja k'ak'u takin lek ja k'u' cheji, jaxa lu'umi po'xel lek.
Currently Selected:
Jueces 6: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
