Jueces 4
4
Ja Debora sok ja Barac
1Tsa'an yajni chamta ja Ehud, ja israelenio jumasa cha och sle' smule pilan majke b'a sti' sat ja Dyosi. 2Ja'yuj a'jiye b'a sk'ab ja mandaranum Jabin yuj ja Dyos b'a oj ilk'ulajuke yuj, ja winik jawi, ye'n mandaranum ay yuj ja cananeo jumasa, ti wa'n a'tel b'a chonab' Hasor. Ja ma' niwan ja ya'tel yuj ja soldado jumasa sb'a jabini, sb'i'il Sisara, ti kulan b'a chonab' Haroset-goim. 3Ja mandaranum Jabini, ay yi'oj b'alune syen (900) karro toj tak'in, b'a yojol jun tajb'e (20) jab'il jel yixtala'an ja israelenio jumasa, man sk'anawe yi ja Dyos ja israelenio oj koltajuke.
4Ja k'ak'u jumasa jawi, ay jun ixuk aluman Dyos yuj ja israelenio sb'i'il Debora, ye'n jel niwan ja ya'tel yuj ja israelenio jumasa. Ja statam ja Debora sb'i'il Lapidot, 5ti jel k'ajyel wax kulani b'a yib'el jun ib'e xa'an, sok na'ub'al sb'aj ja xa'an jawi ja' sb'a Debora, ja te' jawi, tey b'a yaxk'ul b'a yi'oje kan ja k'ole sb'a Efraini, tey b'a nalanajel yuj ja Rama sok ja Beteli. Jaxa israelenio jumasa ti wax waj yil'e tiw ja yajni wa sk'ana oj tojb'esjuk yi'e ja swokole'i.
6Jun k'ak'u sjeka spayjel ja Barac yunin ja Abinoam it tey b'a Quedes b'a jun schonab'ile ja k'ole sb'a Neftali, ti yala yab'a:
—Ja Dyos yuj ja israelenio jumasa it sak'an leki, wax yala a wab' oj ja tsom lajune mil winik ja k'ole jumasa sb'a Neftali sok sb'a Zabuloni. 7Ye'n ja Dyos oj ya jak sk'ujol ja Sisara ma' mas niwan ja ya'tel yuj ja soldado jumasa sb'a Jabin tix waj och b'a uk'um Quison, b'a ti oj snol k'ab'uka tiw sok ja soldado jumasa, jaxa we'nlexi ye'n ja Dyos oj ya'a wil k'ujola'ukex.
8Ti yala ja Barac:
Ta yuj k'a oj ja mojtayon oj wajkon, kechan ta yuj k'a miyuk mini oj wajkona.
9Jaxa Debora ti yala'a:
Lek ay oj mojtaya, kechan wax k'ana oj ja na' lek mi we'nuk ja oj ja mil ja Sisara. Ja' Dyosi, jun ixuk oj ya sk'u'luk ja a'tel jawi.
—Jachuk ti' wajye b'a Quedes ja Debora sok ja Barac, 10Ja Barac, stsomoni ja lajune mil winika, ja k'ole jumasa sb'a Zabulon sok sb'a Neftali. 11Jaxa Heberi, tey sok ja quenita jumasa, sok ja yintil ja sni'al ja Moisesi, spila sb'aj sok ja sk'ole jumasa, ti waj kulan mojan b'a Quedes, mojan sok ja yaxte b'a Saanaimi.
12Yajni sna'a ja Sisara ti wajum ja Barac b'a wits Tabor, 13stsomo ja b'alune syen (900) skarro toj tak'ini, sok spetsanil ja soldado jumasa yi'oji. Ti elye b'a Haroset-goim b'ejyel wajye man b'a uk'um Quison. 14Jaxa Debora ti yala yab' ja Barac: Ja ya'n tulu a b'aj yuj ja ya'n k'ak'u oj ya'a b'a a k'ab' ja Dyos ja Sisara. Sok ye'nani ja Dyos ti wajum b'a sti' sat ja wa soldado jumasa.
Jaxa Barac ti'xa ko' jan ja b'a wits Tabori, ti waj b'a sti' sat spetsanil ja soldado jumasa ye'n. 15Yajni ochye ja Barac b'a oj tiro'anuke sok ja swinik jumasa, ja Dyosi, ch'ak sjom yi s'olom ja ma'tik yi'oj ja karro jumasa sok spetsanil ja soldado jumasa sb'a Sisara. Jaxa Sisara ko' ja b'a skarro spaka ajnel sok yok. 16Jaxa Barac, yi'aj spatik ja soldado jumasa sok ja skarro'e'i, man b'a Haroset-goim. Ja k'ak'u jawi ch'ak cham spetsanil ja soldado jumasa sb'a Sisara. Mini jun ma kan yujile sak'ana.
17Ja Sisara spaka ajnel, sok yok k'ot ja b'a skarpa ja Jael sche'um ja Heberi, ja mandaranum Jabin jel yamigo sb'aje sok ja yuntikil ja Heberi. 18Jaxa Jaeli, ajnel waj sta'e ti yalwe yab'a: Kajwal ochan jan ili, mi lom la xiwi.
Jaxa Sisara ochni ja b'a karpa jawa, jaxa ixuk jawi, ti snak'a lek b'a jun lib'an k'u'uts. 19Yuj ja jel takin sti' ja Sisara, ja'yuj ti sk'ana yi t'un ya'al ja Jael b'a oj yu'. Jaxa Jaeli sjama yi sti' ja lechi ya yue. Yajni ch'ak yu' ja ya'ali, ti cho waj snak' kana, 20ti yala ja Sisara: Ti la ajyi mojan b'a wax ajyi ochel. Ta ay k'a ma sjob'o machunk'a tey b'a yoj na'itsi, ala yab' mi mach' ay.
21Yuj ja jel k'umb'el ja Sisara toj ochel swayel waji. Jaxa Jaeli, ti yi'aj jun martiyo'a sok jun te' b'a ay sni' b'a wax makuni yujile b'a karpa, ch'ab'anxta och ja b'ay ja Sisara; ti slapayi b'a s'olom ja estaka yi'oji, man ek' toj man b'a lu'um. Jach' cham ja Sisara.
22Jaxa yajni k'ot ja Barac wa'n sle'jel ja Sisara ajnel eljan ja Jaeli, jak sta oche ti yala yab'a: La' oj je'awi ja winik ma wa'na sle'jeli. Ti och ja Barac ja b'a yoj na'itsi, waj yile ti b'a'an ek' b'a lu'um ja Sisara, ti'to lapan sb'aj ja estaka b'a s'olomi. 23-24Ja Dyosi jach' ya skolta jastal it ja israelenio jumasa, ja k'ak'u jawi, man ja mandaranum Jabin, snol k'ab'ine man smilawe.
Currently Selected:
Jueces 4: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021