Jueces 3
3
Ja ma'tik ti' kanye b'a Canaani
1-5Ja yajni och yi'ekan ja lu'um jumasa b'a Canaani, jitsan israelenio mitox manxiye ja k'ak'u jawi. Ja'yuj ja Dyosi, ya'kan chab' oxe cananeo, b'a jach' oj sneb' jastal oj tiro'anuk ja israelenio jumasa ma mi sneb'unejuke'i. Cho ya'kan jo'e' ja ma' niwan ja ya'tel yuj ja filisteo jumasa, ti kan spetsanil ja cananeo, ja sidonio sok ja heveo jumasa ma ti ajyiye b'a wits Libano, man b'a wits Baal-hermon man b'a mojan Hamat. Mi kechanuka, ti cho ya'kan ja hitita jumasa, ja amorreo, ja ferezeo ja jebuseo. Sok ja kristyano jumasa jawi, ja ya makunuk ja Dyos b'a oj yil ta meran ja wa'ne sk'u'ajel jan ja israelenio ja ab'al it a'jiyi'e yuj ja Moises ja ma ek' paxta yujile'i. B'aya ja israelenio mini wa sk'u'ane'a, lek wax yilawe ja ye'nle, 6ja wa'ne nupanel ja yuntikile sok ja kristyano jumasa jawi, sok ja'ni oj cho a'ji stoy'e ja sdyose ye'nle'a.
Ja Otonieli
7Ja israelenio jumasa, sch'aya sk'ujole ja Dyos sak'ani, och sle' smule yuj ja lom ja' stoyowe ja k'u'lub'al dyos Baal sok ja sdyose Astarte 8Ja'yuj jel ya'we tajkuk ja Dyosi, yala a ch'ak ochuke a'tijumil ja Cusan-risataim mandaranum b'a Mesopotamia. Tsa'an yajni ek' waxake jab'il a'tijum aye, 9ja israelenio jumasa, ti sk'anawe yi ja Dyos a koltajuke'a, jaxa Dyosi, ti ya'yi niwan ya'tel ja Otoniel smoj alijel ja Calebi. 10Ja yespiritu ja Dyosi, ti ajyi sok ja Otonieli, ye'n sje'a yi ja israelenio jumasa jastal oj tiro'anuk sok ja Cusan-risataimi. Jach' koltaji ja Otoniel yuj ja Dyos b'a yil k'ujola'an ja ma' mi lek wax ilji yuji. 11Tsa'an ajyi laman chab' tajb'e jab'il ja b'a chonab' jumasa jawi, man cham ja Otonieli.
Ja Ehud tiro'ani sok ja Egloni
12Ja israelenio jumasa, cho sle'a smule pilan majke b'a sti' sat ja Dyosi, ja'yuj ja Dyosi, ja ya'yi jitsan yip ja Eglon mandaranum b'a Moab yuj ja israelenio jumasa. 13Ja Egloni, stsomo sb'aj sok ja yuntikil jumasa ja Amon sok ja yuntikil ja Amalek, snol k'ab'ine ja israelenio jumasa, sok yi'aje kan ja chonab' Jerico. 14Tsa'an ek' waxak lajune jab'il a'tijum aye ja israelenio jumasa, 15-16ti sk'anawe yi ts'akatal ja Dyos a koltajuke', ja'yuj ti jekji yi'e ja Ehud yunin ja Guera, ja winik jawi, ja' smoj sb'aj sok ja k'ole sb'a Benjamin. Cho ye'n schol wax waj ya' kan yi ja Eglon ja kontribusyon wax ya'awe ja israelenio jumasa.
Ja Ehud sk'u'lan jun spunyal b'a schab'il sts'e'el ay yej, ek'el yuj ja chab' ch'ile ja snajtili, yuj ja mi lek ay ja stojol sk'ab'i, ja'yuj ti ya'a b'a tiw ja spunyali, smusu lek sok ja sk'u'i. 17-20Ti'xa waj ya' kan yi ja Eglon mandaranum b'a Moab ja kontribusyon ya'we ja israelenio jumasa, yajni ch'ak ya'we kani, ja Ehud sok ja smoj jumasa ti'xa elye ja tiwa. Ti aye mojan b'a Guilgal ja lugar b'a tey ja sk'u'lub'al dyos ja Egloni, ja Ehud spila sb'aj sok ja smoj jumasa, jaxa ye'n ti kumxi ja b'ay ja mandaranum Eglon, yuj ja jel kojleli ja'yuj ti kulan ek' b'a k'ajyelni wax kulani b'a yoj snaji. Ti yala ja Ehud: Kajwal, ay jas nak'ul wax k'ana oj kal a wab'i.
Yajni yab' ja jastal it ja mandaranum Egloni, ti yala yab' ja ya'tijum jumasa a ch'ak eluke ele. Jaxa Ehud, ti och sta' mojana, ti yala yab'a: —Ja jas oj kal a wab'i, b'a sb'a ye'n ja Dyosi. Yajni yab' jas alji yab' ja mandaranumi, swokolta k'e' tek'an. 21-22Jaxa Ehud, syama sok jas pakax sk'ab' ja spunyal yi'oj ochi, sok spetsanil yip sch'ub'u yi b'a slukum ja mandaranum Egloni, man jwera ch'ak ya elyi ja schanlukumi, yuj ja jel kojlel ja Egloni, ja'yuj ti kan mukan sb'aj ja spunyal ja Ehud. 23Yajni ch'ak sk'u'luk ja jastal it ja Ehud, ti slutu kan lek ja spwerta'il snaj ja Egloni, ya' och kan syabe'il jaxa ye'n ti el b'a jun sbentana'il ja na'itsi, 24ti'xa waja.
Yajni kumxiye och ja ya'tijum ja mandaranumi, lutan lek sta'awe ja b'a wax ajyi ocheli, wax yalawe yuj wanuk ya'jel yi spakaxil. 25Smajlaye juts'in lek b'a sti' na'its, yajni mix elk'ote ti'xa och cham sk'ujole'a. Sjamawe ja pwerta waj yil'e' ti b'a'an ek' b'a lu'um chamelxa.
26Ja jaye k'ak'u smajlaye ja ya'tijum jumasa ja Eglon oj elk'oti, ja malan spaka ajnel ja Ehud. Ti ek' ja b'ay ja k'u'lub'al Dyos jumasa, ti waj skolta sb'aj b'a Seirat. 27Yajni k'ot ja b'a syaxk'ul sb'a k'ole b'a Efraini, ti ya ok'uk ja skacho b'a oj stsom ja israelenio jumasa, jaxa ye'nle'i, yajni yabye ja yok'el ja kacho ti ch'ak ko'uke ja b'a witsi, jak sta'e ja Ehud, 28ti alji yabye'a: —Nochowonik. Ja ya'n oj skoltayotik ja Dyos b'a oj kiltik sk'ujol ja swinkil ja Moabi.
Jaxa israelenio jumasa snochowe'nia, stimawe ja b'ej b'a niwan ja' Jordan it wax waj b'a Moabi, mini jun ma yawe ek'uka. 29-30Ja swinkil ja Moabi, jel a'aye sok jel tsatse, a'nima ja k'ak'u jawi, chamye mojan lajune mil ja lekil soldado jumasa, —Mini jun ma b'ob' skolta sb'aj ja.
Tsa'an ajyi laman chan tajb'e (80) jab'il ja swinkil b'a chonab' jumasa jawi.
Ja Samgari, skolta ja israelenio b'a sk'ab' ja filisteo jumasa
31Ja ma slok'olan ja Ehud, ja Samgar yunin ja Anat, ye'n ja yi'aj jun te' b'a ay sni' sok stak'inil, smila sok wake syen (600) filisteo. Jach' skolta jastal jaw ja israelenio jumasa.
Currently Selected:
Jueces 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
