Jueces 2
2
Ja yanjel Dyos b'a Boquimi
1Ja yanjel ja Dyosi, el b'a Guilgal ti waj b'a Boquim waj yal yab' ja israelenio jumasa, jach' wax yala jastal it ja Dyosi:
Ja yajni ti ajyiyex b'a Egipto ke'n ka elanik k'ab'al, ti ki'ajex b'a lu'um k'inal it jk'apayi'e ja ma ek' paxta a wujilexi, ja ye'nle'i kal yabye: Ja ke'n ojni jk'u'luk a wi'ex ja jas kalunej ja, 2Jaxa we'nlexi, mini jun lo'il oj b'ob' a k'u'lukex sok ja kristyano ma tey tiwi. Mi kechanuk ja jawi, ojni cho b'ob' ch'ak a jom'ex el yi ja yaltare'i.
Jaxa we'nlexi, ¿Jasunk'a a k'u'lanexi? Kechan a k'okowex ja jas kala. 3Ja'yuj ja ya'n oj kala wabyex, a'nima wa'nukex mojxel och ja b'a ye'i, mi oj ka eluk ja kristyano jumasa jawi. Ja ye'nle' sok ja sdyose'i, jel oj ya' wi'ex ja wokoli.
4Jaxa israelenio jumasa, yajni yabye ch'ak k'umanuk ja yanjel ja Dyosi, ti k'e' awaljuke ok'ela. 5Ja'yuj ja k'inal jawi, ya'we sb'i'iluk Boquim,#2:5 ja Boquimi, wa sk'ana yal ja ma' wax ok'i. Sok ti'ni wa stsikawe yi tiw ja smajtan ja Dyosi.
Ja jastal cham ja Josue
6Ja Josueji, spila sb'aj sok ja israelenio jumasa, jaxa ye'nle'i, ti'xa ch'ak wajuke b'a jujune ja b'a a'jiyi'e'i. 7Ja janek' ajyi sak'anil ja Josue sok ja ma'tik ay ya'tel b'a chonab'i, ja israelenio jumasa kechani ja sk'u'ane ja Dyos sak'ana. Ja ma'tik ay ya'teli, yilawe'ni ja jas jel tsamal ch'ak k'u'lajuk yi'e ja israelenio jumasa yuj ja Dyosi.
8Ja k'ak'u cham ja Josue, ay yi'oj jo' tajb'e lajune jab'il. 9Ti mukji b'a slu'um ye'n b'a Timnat-sera, ja jawi, tey b'a syaxk'ul ja k'ole jumasa b'a Efrain b'a k'e'el k'inal yuj ja wits Gaasi. 10Cho jach'ni ja israelenio jumasa b'a smoj sb'aj sok k'i'eli, ch'akni chamuke'a; ja'yuj ja ma'tik ch'ak manxuk tsa'ani, mi ni jas na'awe ja jastal ja Dyos sak'ani, sok mini ja jas jel tsamal k'u'laji yi'e ja israelenio jumasa.
Ja israelenio ya'we kan patikajel ja Dyosi
11-13Ja israelenio jumasa, ya'we kan stoyjel ja Dyos yuj ja ma ek' paxta yujile it a'ji eluke jan yuj b'a Egipto, ja och sk'u'uke ja sdyos ja kristyano it joyb'anub'ale yuji; ja och sk'u'uke ja k'u'lub'al dyos Baal sok ja Astarte. Yuj ja smul sle'a ja israelenio jumasa, jel ya'we tajkuk ja Dyosi. 14Tajkel lek ajyi, sok ja ye'nle ja'yuj a'jiye kan b'a sk'ab' ja ma'tik mi lek wax iljiye yuj b'a oj nol k'ab'ijuke yuj, jach'ni ja jastik sb'aje'i, oj ch'ak elk'ajuk yi'e. Cho a'jiye kan b'a oj ilk'ulajuke yuj ja ma'tik mi lek wax iljiye yuji, jaxa ye'nle'i, mini jas oj b'ob' yal'e'a. 15Yajni wax wajye tiro'aneli, mi lek wax iljiye yuj ja Dyosi, sok mini lek wax elye'a, yujni jach' alub'al yabye yuj ja Dyosi.
Ja'yuj ja israelenio jumasa, jel cham k'ujol aye, 16ja'yuj ja Dyosi, sle'a ma oj sk'el ja ma wax yelk'an ja jas b'aje'i. 17Mini sok ja jachuki, mi skisawe ja ma wax koltajiye yuji, mini sk'u'ane ja Dyosi, ja'ni wajel sk'ujole ja k'u'lub'al dyosi. Ja ma ek paxta yujile'i, sk'u'ane ni ja yab'al ja Dyos sak'ana, jaxa ye'nle'i mini t'un skisawe'a.
18Ja ma'tik niwan ja ya'tel b'a ye'n sle'a ja Dyosi, wani skoltana. Ja janek' ay sak'anil ja jaw jumasa, ja Dyosi, mix ya ixtalajuk ja israelenio jumasa yuj ja ma'tik mi lek wax iljiye yuji, wa stalna sya'ujlal ja yajni yab' wa'ne yaljel ja swokole'i. 19Yajni wax cham ja tatal jumasa jawi, ja israelenio wax cha och sle'e ja smule'i. Jel kistal ja jastal ja ye'nle yuj ja snan state'i, ja' jel wa stoyowe ja k'u'lub'al dyosi, jel ch'u'uy ja sk'ujol'ei, mi sk'ana oj stukb'es ja jastale'i. 20Ja'yuj tajki yujile ja Dyosi, ti yala'a:
Ja kristyano jumasa iti, mini t'un wa skisawe ja lo'il jk'ulan sok ja ma ek' paxta yujile'a. Mini t'un wa sk'u'anone'a, 21Ja yajni mitox cham ja Josue, ay jitsan kristyano ti' aye b'a yoj lu'um b'a mi el kan yuji, cho mini ja ke'n mini jun oj ka eluka. 22Ye'n oj ka makunuke b'a oj kil ta meran ja oj sk'u'ukone ja israelenio jach'ni jastal sk'u'lane ja ma ek' paxta yujile'i.
23Ja'yuj ja Dyosi, mixani jun kristyano ya eluk ja janek' mi b'ob' ya eluk ja Josue, lekxani yi'aj ja ti kanye tiwa.
Currently Selected:
Jueces 2: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
