Jueces 13
13
Manxi ja Sansoni
1Ja israelenio jumasa cho sle'a smule jun majke smoj b'a sti' sat ja Dyosi, ja'yuj a'jiye kan b'a sk'ab' ja filisteo jumasa, chab' tajb'e jab'il jel ixtalajiye.
2Ja k'ak'u jumasa jawi, ti ajyi jun winik b'a Sora, sb'i'il Manoa, tey sok ja k'ole sb'a Dani. Ja sche'umi mix b'ob' yil sat untikanel, 3ja'yuj jun k'ak'u je'ji sb'ajyi jun anjel ti alji yab'a:
A'nima me'x b'ob' a wil sat untikanel, yujni mix b'ob'a wila, ja ya'n oj tukb'an satk'inal oj ja man jun yal kerem. 4-5Ja wa yal keremi, man oj manxuk a'yi b'a sk'ab' ja Dyosi, yujni tsa'ub'ala, ja Nazireo.#13:4-5 Nazireo: Wa sk'ana yal tsa'ub'alni'a. Ja'yuj mi sb'ejuk oj ja wu' ya'lel ts'usub', sok mini jas tuk b'a tsats yu'jel. Mi oj b'ob' a wab' wa'el b'a mi lekuk, ja yal keremi, mini oj k'utsxuk yi ja stso'otsil s'olomi. Ja israelenio ja yajni mix b'ob' yujele sok ja filisteo jumasa, jaxa yajnix k'i' ja yal kerem iti, ti'to oj eluke b'a yib k'abala.
6Yajni yab' ja ixuk ja jastal iti, ch'ak waj yal yab' ja statami:
Jun yal yunin Dyos jak sta'on ja b'a'yoni, jel ya cham jk'ujol ja'yuj mi job'oyi ja sb'i'ili, cho mini ja ye'n mi yal kab' b'a jakela. Ja sati lajan sok jastal ja sat ja anjeli. 7Jach' yal kab' jastal iti: Oj tukb'an satk'inal oj ja man jun yal kerem. Masan oj manxuk man oj chamuk, ti'ni oj ajyuk sok ja Dyosi, yujni tsa'ub'ala. Ja'yuj mok a wu' ya'lel ts'usub' ja we'n, mok a wu' b'a jas tsats yu'jel, mok a wab' jas mi lek yab'jel, xyutajon.
8Jaxa Manoa, sk'ana yi ts'akatal ja Dyosi, ti yala'a: Dyos kuj jeka jan jun majke smoj ja winik it jakta sk'umuk ja jche'umi, A jak sje'ki'tikon jas oj k'u'ltikon sok ja yal kerem it oj manxuki.
9Jaxa Dyosi, jach'ni sk'u'lan ja jastal sk'ana ja Manoa, sjeka jan jun majke smoj ja yanjeli, ti sje'a sb'ajyi b'a alaj ja ixuki. Mini ti'uk smoj sb'aj sok ja statama, 10ja'yuj ajnel waj spay jani, ti yala'a:
Manoa. Manoa. Itul ja winik it sk'umanon jun k'ak'u ili.
11Jaxa Manoa juts'in jak sta' ja sche'umi, smojta man b'ay ja winiki, ti sjob'o yi'a:
¿We'n a ma ja it a k'uman ja jche'um ja jun k'ak'u ili?
Ti yala ja winiki, ke'nani'a, 12ti cho yala ja Manoa:
Jas k'ak'u oj k'ot smeranil ja jas a wala, ¿Jastal oj ka'tikon k'i'uk ja yal keremi? ¿Jasunk'a oj k'u'luktikoni?
13Jaxa yanjel ja Dyosi, ti yala yab' ja Manoa:
Ja wa che'umi, t'ilan oj ch'ak sk'u'l spetsanil ja jas kaloj yab'i. 14Mi oj b'ob' yab' jastik tojb'el sok sat ts'usub', mi oj b'ob' yu' ya'lel ts'usub', sok mini ja b'a paji, mi oj b'ob' yab' b'a mi lekuk jas wa'el. Jel t'ilan oj sk'u'l spetsanil ja iti, jach'ni jastal kaloj yab'i.
15-16Mini t'un wax jak sk'ujole ta yuj jun yanjel Dyosuk ja winik jawi, ti yala ja Manoa:
Kanan jmoktikon oj wa'kotik lajan, oj miltikon jun yal chivo b'a oj kab'tik.
Ti yala ja anjeli:
A'nima la kanyon amokex, mini oj b'ob' kab' ja wa'el oj ja chap'exa. Kechan taxa k'anawex oj b'ob' a wa'wex yi b'a smajtan ja Dyosi.
17Jaxa Manoa ti sjob'oyi ja anjeli:
¿Jas a b'i'il b'a? Ala kab'tikon, b'a jach' oj b'ob' ka'tikon a wi ts'akatal ja yajnix k'ot smeranil ja jas a walunej kab'tikoni.
18Ja anjeli ti yala'a:
Ja jb'i'ili, nak'ul ay, ¿Jas lom waxa job'o ki'i?
19Jaxa Manoa ti'xa yi'aj ja yal chivo sok ja yal sat te' jumasa ya' kajan b'a sat toni, ti ya'yi ja smajtan ja Dyosi. Ja k'ak'u jawi jel tsamal ja jas yilawe'i: 20-21Yujni ti wa'ne sk'eljel ja Manoa sok ja sche'um jastal wa'n ajlel ja b'a ton jawi, ti yilawe k'ek'e ja anjel b'a yoj yajlel ja k'ak'i. Ti'to jak sk'ujole ja winik jawi jun yanjel Dyos, jaxa ye'nle'i snujts'in ja s'olome man sta'a k'ot ja lu'um ja spatane'i. Jaxa anjel jawi, mixani sje'a sb'aj yi' ja Manoa sok ja sche'uma.
22Ti yala yab' ja sche'um ja Manoa:
Ja ya'ni, ojni chamkotik yuj ja kilatik ja Dyosi.
23Ti yala jas che'umi:
Yuj wanuk sk'ana oj smil'otik ja Dyosi, mi oj yi' lek ja smajtan ka'tik yi' sok yal sat te' jumasa. Cho mi oj b'ob' sje'ki'tik ajyi ja milagro jumasa iti, sok mi oj b'ob' yal kab'tik spetsanil ajyi ja jas ch'ak yal kab'tiki.
24Ja sche'umi, ajyi jun yal skerem ya sb'i'iluk Sanson. Ja yal keremi k'i'i, jel lek ilji yuj ja Dyosi. 25Jun k'ak'u ti ay b'a karpa jumasa b'a Dan, b'a nalanajel yuj ja Sora sok ja Estaol, ja yespiritu ja Dyosi, och a'tijuk sb'aj ja Sansoni.
Currently Selected:
Jueces 13: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
