Jueces 12
12
Ja Jefte sok ja k'ole b'a Efrain
1Ja k'ole kristyano jumasa sb'a Efraini, schapa sb'aje b'a oj wajuke tiro'anel. Ek' sk'uts e' ja niwan ja' Jordani, ti wajye b'a Safon. Ti yalwe yab' ja Jefte:
¿Jastal lek ek' a k'uts ja niwan ja' Jordan waj tiro'anan sok ja kristyano jumasa sb'a Amon ja mi a wala oj koltayatikoni? Yuj ja jach' a k'u'lani, oj laptikon sk'ajk'al ja wa naji, ti la cham kan yoj k'ak' ja we'ni.
2Ti yala ja Jefte:
Ja ke'ntikon sok ja kristyano jumasa sb'a amoni, k'e'tikon jun tsatsal k'umal sok ja ye'nle'i, jpayawextikon mi jak a koltayotikonex. 3Yajni kila mix jak koltananiki, ti kala'a, a'nima ti la chamyona, ojni k'e'kon soke'a. Ta yuj k'a Dyos skoltayon ja yuj ja b'ob' kuji, ¿Jasyuj ja wax jak a nol k'ab'ukonex ja we'nlex ja juts'in b'a?
4Ti yalawe ja swinkil sb'a Efraini:
Ja we'nlex sb'a Galaad, kechan polestero ayex ja b'a jlu'umtikoni, yuj ja ti jakelex ja b'a k'ole jumasa sb'a Efrain sok b'a Manasesi.
Jaxa Jefte, stsomo spetsanil ja kristyano jumasa b'a Galaadi, och k'e'uke tiro sok ja kristyano jumasa sb'a Efraini, b'ob'ni yujile'a. 5Jaxa b'a mi oj spak e' ajnel ja kristyano jumasa sb'a Efraini, ya'we och tanuman ja b'a mi jel cha'anuk ja niwan ja' Jordani.
Yuj k'a jun swinkil sb'a Efrain wa'n spakjel ajnel sok oj ek' sk'uts ja niwan ja'i', jaxa swinkil sb'a Galaadi, wa sjob'owe yi: ¿Ja'ma a moje ja k'ole sb'a Efraini? Ta yuj k'a yala miyuk, 6ti wax yalwe yab' a yal: Muchacho. Jaxa ye'n yuj k'a mushasho jach yala yuj ja mix b'ob' el yuj leki. Wa syamawe ti'ita wa smilawe tiwi. Ja k'ak'u jumasa jawi, smilawe chab' tajb'e mil (42,000) swinkil sb'a Efraini.
7Ja Jefte, wake jab'il och niwan ya'tel yuj ja israelenio jumasa, yajni chami ti smukuwe b'a Galaad cho ja'ni b'a manxi'i.
Ja Ibsani
8-9Tsa'an yuj ja Jefte, juke jab'il och niwan ya'tel yuj ja israelenio jumasa ja Ibsan b'a Beleni. Ja yuntikil winiki, ajyi jun tajb'e sok lajune, jach'ni ja yuntikil ak'ixi, ajyi jun tajb'e sok lajune, spetsanil ya nupanuk sok tuk kristyano mi ja'uk ja b'a sk'ole ye'n. 10Yajni cham ja Ibsani, ti smukuwe b'a Belen.
Ja Eloni
11Tsa'an yuj ja Ibsani, lajune jab'il och jel niwan ja ya'teli yuj ja israelenio jumasa ja Elon b'a k'ole sb'a Zabuloni. 12Yajni chami, ti smukuwe b'a Aialon, b'a slujmal ja sk'ole jumasa ye'n.
Ja Abdoni
13-15Tsa'an yuj ja Eloni, waxake jab'il och niwan ya'tel yuj ja israelenio jumasa ja Abdoni, ja Abdoni ja stat ja Hileli. Ajyi chab' tajb'e yuntikil sok jun tajb'e lajune yij, spetsanil ja it jumasa jel niwan wax iljiye. Yajni cham ja Abdoni ti smukuwe b'a Piraton, yuj ja ti cho manxi tiwi, ja Piratoni tey b'a yoj slu'um ja Efraini, ti b'a yaxk'ul b'a kulane ja kristyano jumasa sb'a Amalek.
Currently Selected:
Jueces 12: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
