Jueces 14
14
Nupani ja Sansoni
1Ja Sansoni, ti waj b'a jun chonab' sb'i'il Timna, ja tiwi ti yila jun ak'ix filistea jel tsamal yila. 2Yajni kumxi ti yala yab' ja snan stati:
Ja b'a chonab' Timna, ti kila jun ak'ix filistea'a, wax k'ana oj nupanukon sok. Jaxa we'nlexi chapawik ja jastik oj makunuk b'a nupaneli.
3Jaxa snan stati, ti sjob'o weyi'a:
¿Jasyuj ja jun ixuk filistea oj nupanan soki, mi sk'u'unejuk ja Dyos ta? ¿Yuj ma mey ixuk ja b'a jchonab'iltik b'aj, ma yuj mey ixuk b'a spetsanil ja israelenio jumasa?
Jaxa Sansoni, ti yala'a:
Ja ak'ix jawi, yujni jel tsamal wax kila'a. Kax k'anawik, yujni ye'n wax k'ana oj che'umuka.
4Ja snan stati, mi t'un wa sna'awe ta yuj ye'n jach' wa sk'ana ja Dyosi, ja Dyosi, yuj wa'n sk'ejel jastal oj ko' sk'ab' ja filisteo jumasa. Ja k'ak'u jumasa jawi spetsanil ja israelenio ti aye b'a yib' sk'ab' ja filisteo jumasa, 5jachuk ja Sanson sok ja snan stati, ti wajye b'a Timna.
Jaxa Sansoni, yajni ti wa'n ek'el b'a yoj tek'ulaltiki, ti yab' wa'n awanel jun tan chan, waj yile jun tan niwan choj jak ta'juk yuj b'a oj k'uxjuk. 6Jaxa yespiritu ja Dyosi, a'tiji sb'aj ja Sansoni, a'jiyi jitsan yip. Syama ja tan choji, ch'ak sch'i'tala'uk xe'ntiyaman, jach' yila jastal jun yal chivo. Ja jas sk'u'lani mi yala yab' ja snan stati. 7Tsa'an t'usan k'otye b'a Timna, jaxa Sansoni waj sk'umuk ja ak'ix it wa sk'ana oj nupanuk soki. 8Ek' chab' oxe k'ak'u, jaxa Sansoni cho waj jun majke smoj ja'xa b'a oj nupanuk sok ja ak'ix jawi, ti spila sb'aj ja, waj sk'el ja b'a smila kan tan choji, jasa waj yili tey jun b'ots'e chajnul chab' ja b'a yoj sb'ak'tel ja chamel choj jawi, sok jun ako b'a jel yi'oj ja chab'i. 9Jaxa Sansoni, ya eluk ja chab' jawi, ti wa'n slo'jel och waj ja b'a b'eji. Yajni k'ot ja b'ay ja snan stati, cho ya'yi ja chab'i, jaxa ye'nle'i, slo'owe'ni'a; kechan mi yala b'a ya' eljana.
10Ja stati, waj ja b'a snaj ja ak'ixi, jaxa Sansoni sk'u'lan jun k'in ja tiwi, yuj ja jach' kulan wax k'u'laxi, sb'a ja keremtik sok ja ak'ixuki. 11Yajni yilawe ja filisteo jumasa, ti yi'aje och jun tajb'e sok lajune keremtik b'a oj smojtaye. 12Jaxa Sansoni, ti yal yab' ja keremtik jumasa jawi:
Oj kal a wabyex jujuntik lo'il mixa na'awex. Ta yuj k'a a walawex jasunk'a, b'a yojol ja juke k'ak'u oj alb'uk ja k'ini, jujune'ex oj ka'wi'ex jun a chompa'ex b'a lek lek, sok a k'u' awexex b'a wax makuni b'a k'ini. 13Kechan ta yuj k'a mi a na'awex jasunk'a, jujunex we'n oj ja wa'wexki spetsanil ja jas wax kala ke'n oj ka'wi'exi.
Ti yalawe ja keremtik jumasa:
Ala kab'tikon b'a. Wax k'ana oj maklatikon.
14Ja'yuj ti yala ja Sansoni:
Ja jas wax k'uxwani, el sb'aj jas lek yab'jel,
jaxa b'aj jel tsatsi,
jel chi' ja jas el sb'aji.
Ek' oxe k'ak'u ja keremtik jumasa mi sna'awe jasunk'a. 15B'a schanil k'ak'u ti yalwe yab' ja smakb'en ixuk ja Sansoni:
La jneb'tik lajan ja sb'ej ja jas wax yala. Ka'ax ja b'ay ja Sansoni, job'oyi ja sb'ej. Kechan ta mik'a oj wajan oj tsik a'tikon el ja we'n sok spetsanil ja swinkil wa naji. ¿Ma yuj wa sk'ana jach' b'asan oj ya'wotikon kani?
16Ja'yuj ja ak'ixi, ti waj ja b'ay ja Sansoni, wa'n ok'el yala yab'i:
Ja we'n mixa k'anawon meran. Mi lekxa wilawon. Ja jmoj jumasa a wal yabye ay jas oj sk'intaye, jaxa ke'n me'xa wala kab' ja sb'ej.
Jaxa Sansoni, ti yala yab'a:
K'elawil ak'ix. Mini ja jnan jtati, me'x kal yabye ja sb'ej, ¿Jasyuj ja we'n oj kal a wab' ja sb'eji?
17Ojxa ch'ak ja semana, ti'ni wa'n ok'el ja ak'ixi, sok ti'ni wa'n sjob'jel yi ja sb'ej ja jas yala, b'a sjukil k'ak'u ti yala ja sb'ej ja jas yala. Yajni yab' aj ak'ixi, ti waja waj yal yab' ja smoj jumasa. 18B'a sjukil k'ak'u b'a och k'ak'u, ja filisteo jumasa ti waj yal'e yab' ja Sansoni:
Mi jas tuk jek chi' yuj ja chab'i,
sok mey tuk ma' jel ja yip yuj ja choji.
Ti yala ja Sansoni:
Sts'akatal ja ak'ix it jex k'ana
jachuk a nawex ja sb'ej ja jas kala.
19Jaxa yespiritu ja Dyosi, cho ya'yi jitsan yip ja Sansoni. Jaxa ye'n ti waj b'a Ascalon, ja tiwi smila jun tajb'e sok lajune winik. Ch'ak ya elyi ja sk'u' swexi, ja ya'yi ja ma sna'awe ja sb'ej ja jas yala ja Sansoni. Tsa'an ti kumxi b'a snaj ja snan stati, tajkel yuj ja jas ch'ak ek'uki. 20Jaxa ak'ix it jel wa sk'ana ja Sansoni, ja stat ja ak'ixi ya nupanuk sok pilan winik, ja ya nupanuk sok june ja ma lok ay ja b'a k'ini.
Currently Selected:
Jueces 14: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
