Jueces 11
11
Ja Jefte
1Ja Jefte, jun soldado jel tsats ti' sb'aj b'a Galaad, ja snani jun ixuk tuktukil winik ay sok. Ja stati sb'i'il Galaad, 2Ja Galaad ajyi tuk yuntikil sok ja sche'umi, yajni k'i'ye'i, snutsuwe el ja Jefte b'a snaj ja stati. Ti yalawe yab'a: Ja wa tati, mi oj ya'wi a dote yuj ja lom tuk ixuk ja wa nani, —xyutaje—.
3Jachuk sjipakan ja smoj alijel jumasa ja Jefte, ti waj b'a jun chonab' sb'i'il Tob. Ja b'a chonab' jawi ti sta'a sb'aj sok chab' oxe elk'anum, sok ja ye'nle'i, lajanxa wax elye ja elk'aneli.
4Tsa'an ja swinkil sb'a amoni, snol k'ab'ine ja israelenio jumasa. 5Ja ma'tik ay ya'tel b'a Galaad ch'ak wajuke b'a chonab' Tob waj sle'e ja Jefte, 6ti yalwe yab'a:
Wax k'anatikon we'n oj och niwan a wa'tel kujtikon b'a tiro'anel sok ja swinkil ja amoni. La' jmoktikon.
7Ti yala ja Jefte:
Jel a taklayonex tak, man a nutsuwonex el ja b'a snaj ja jtati, ¿Jasyuj ja man yan yuj ja ay a wokolex ti wax jak a le'onex b'a?
8Jaxa ye'nle'i, ti yalawe'a:
Ja smeranili, yuj ja ti aytikon b'a yoj wokoli, ja'yuj wax k'anatikon oj wajan jmoktikon b'a oj nol k'ab'uktik ja swinkil ja amoni. Wax cho jk'anatikon we'n oj och niwan a wa'tel kujtikon ja janek' ti aytikon b'a Galaad.
9Ti alji yabye yuj ja Jefte:
Lek ay oj wajkon a mokex, jaxa ta Dyos oj yaj b'ob' kujtik ja kristyano jumasa sb'a Amon b'a ¿Smeranil ma ja ke'n jel niwan oj ajyuk ja ka'teli?
10Jaxa ma'tik ay ya'teli, ti yalawe'a:
Ti wax yab' ja Dyosi, spetsanil ja jas oj ja wali, ojni jk'u'ltikona, —xchiye—.
11Ja'yuj ja Jefte, waj sok ja ye'nle'i, jaxa kristyano jumasa yawe och niwan ja ya'teli cho ya'we och mandaranumil. Jaxa Jefte, yala yila ja Dyos ja lo'il sk'u'lane b'a Mispa.
12Tsa'an ja Jefte, ti sjeka chab' oxe winike ja b'ay ja smandaranume ja swinkil ja amoni, b'a waj yalwe yab'i:
¿Jasunk'a a wi'oj moktikoni? ¿Jasyuj ja wax jak a nol k'ab'ukotikoni?
13Jaxa smandaranume ja kristyano jumasa sb'a amoni, ti yala'a:
Jakyon b'a oj ch'ak ki'kan spetsanil ja jlu'umtikon b'a ch'ak a jap'ex ki'tikoni, man b'a niwak ja' Arnon masan b'a niwak ja' Jaboc, sok b'a Jordani. Ja yajni elyex jan b'a Egipto we'n ch'ak a wi'ex kani, jaxa ya'an t'ilan oj ja wa'wex kumxuki lekil ab'al.
14Jaxa Jefte, cho sjeka ma oj ya' kumxuk ja lo'il jawi 15jach' yalawe jastal iti:
Ja ke'ntikoni me'x japatikon slu'um swinkil Moab cho mini ja swinkil amoni. 16Ja jas ek'i, ja yajni eltikon b'a Egipto, ek' jk'utstikon ja takin lu'um k'inali, man b'a niwan paman ja' it jel yakili, ti k'otikon b'a jun chonab' sb'i'il Cades. 17Ti jekatikon ma' waj sjob' yi ja mandaranum b'a Edom ta mi oj yal oj ekotikon ja b'a yoj slu'umi, mini sk'ana oj ek' kotikona. Cho jach'ni jekatikon ma waj sjob' yi ja mandaranum b'a Moabi, jach'ni ja ye'n mini ya' sk'ana oj ek' kotikona, yuj ja mi ya'we e'kotikoni, ja'yuj ti kantikon b'a Cades.
18Tsa'an ti b'ejyitikon b'a takin lu'um k'inal joyb'antikon ja slu'um jumasa b'a Edom sok b'a Moabi. Yajni k'otikon b'a Moab b'a wax jak ja k'ak'u, ti jtojb'estikon tiw ja jnajtikoni, b'a sk'axil ja niwan ja' Arnon yuj ja ja' mojon ay ja niwan ja' jawi, jachuk mi ochtikon ja b'a lu'um jumasa b'a Moabi. 19Cho jekatikon ma waj sjob' yi ja Sihon smandaranum ja amorreo jumasa b'a Hesboni, ta oj ya' oj ekotikon b'a yoj slu'umi. 20Jaxa mandaranum Sihoni, mini t'un skisawotikona, ja'yuj mi ya' e'kotikon ja b'a yoj slu'umi. Yuj ja yab' ti oj e'kotikon tiwi, ja'yuj ti jak sk'u'luk ja snaje k'u'lub'al sok k'u'uts ja soldado jumasa b'a Jak snol k'ab'inotikone. 21Jel niwan ja Dyos kujtikoni, yaj b'ob' kujtikon spetsanil ja soldado jumasa sb'a Sihoni. Ja'yuj ch'ak ki'tikon kan yi spetsanil ja slu'um ja amorreo jumasa ma'tik ti' ajyi tiwi, 22man b'a niwan ja' Arnon masan b'a niwan ja' Jaboc, man b'a takin lu'um k'inal masan b'a Jordan. 23¿Jaxa ya'n ja we'n waxa k'ana oj ja wi'kan ja lu'um it sjapa a wi'ex ja Dyos yuj ja israelenio, it ke'n ya' ki'tikoni? 24Ja jas ya'oj a wi'ex ja wa dyosex Quemosi, yujni a b'aj we'nexa, jaxa jas ya'oj ki'tik ja Dyos kujtikoni, yujni cho jb'aj ke'ntikona.
25¿Yuj waxa wala yuj jel niwana ja we'n yuj ja Balac mandaranum b'a Moabi? Ja ye'n mini t'un yala oj sch'ay sna'jel ja israelenio jumasa, sok mini t'un b'a tiro'ani soke'a. 26Oxe syen (300) jab'il teytikon b'a Hesbon sok b'a Aroer b'a yal chonab' jumasa b'a sjoyb'uneji, ja chonab' jumasa b'a sti' niwan ja' Arnoni; ¿Jasyuj ja lom a wa'wex ek' spetsanil ja k'ak'u jumasa jaw ja mi a wi'ajex kan b'a? 27Ja ke'n mi jas mi sb'ejuk jk'u'lunej a wi'ex. We'nlex ja mi lekuk ja jas wa'nex sk'u'lajel ja wax jak a nol k'ab'ukotikonexi. Ja sb'eji, a sk'el ye'n ja ma Dyos yuj ja israelenio ja jas wa'nex sk'u'lajel ki'tikoni.
28Jaxa mandaranum b'a Amoni, mitoni t'un skisa ja jas alji yab' yuj ja Jefte.
Ja jas sk'apa ja Jefte
29Tsa'an ja yespiritu ja Dyosi, ti a'tiji sok ja Jefte, a'ji sb'ejtes spetsanil ja lu'um jumasa sb'a Galaad sok sb'a Manasesi, tsa'an cho a'ji kumxuk jan b'a Mispa b'a Galaad. Tsa'an cho waj ja b'a slu'um ja kristyano jumasa b'a amoni, 30ti sk'apa yi ja Dyosi: Ta oj k'a wa b'ob' yuj ja kristyano jumasa sb'a amoni, 31oj milawi' sok oj ka'wi b'a a majtan junuk ja swinkil naj ma' b'ajtan oj jak sta'oni.
32Ja Jefte, ti'xa sk'utsu ja niwan ja' b'a oj snol k'ab'uke ja kristyano jumasa sb'a amoni, sok a'jini b'ob' yuj sok ja Dyosi. 33Jel jitsan smila ja ma'tik mi lek wax yila sb'aj soki, jun tajb'e chonab' yi'aj kani, man b'a Aroer masan b'a Minit k'ot man b'a Abel-queramim. Jach' mi oj b'ob' yujele ja kristyano jumasa sb'a Amon yuj ja israelenio.
34Yajni kumxi jan b'a snaj ja Jefte, el jan ja yak'ix it kechan ye'n jak ta'juk yuj, wa'nxta cha'nel jani, wa'n ya'jel ok' jan jun yal setan tak'in. Ja Jefte me'y pilan yuntikil kechan ye'na ja yak'ix jawi, 35yajni yila eljan ja yak'ixi, jel cham ja sk'ujoli, ch'ak sch'i' ja sk'u' yuj ja mi kulanuk ja sk'ujoli. Ti yala'a:
Kala ak'ix. Jex cham k'ujol ja wax kilawa. Yuj ja we'n ja'yuj lajan sok wa syats'a sb'aj ja kaltsili, yuj ay ja sk'apunej yi ja Dyosi, sok ojni jk'u'luka.
36Ti yala ja ak'ixi:
Tat, yuj k'a ay jas a k'apunej yi ja Dyosi, a'awon ke'n ja jas a k'apunej yi' ja Dyosi, yuja ye'n ya'tani a wil sk'ujol ja ma'tik mi lek wax yilawa. 37Kechan june ja jas wax k'ana a wi kala tat: Jekawon sok ja jmoj ak'ixil jumasa oj wajkotikon chab' ixaw b'a yaxk'ul jumasa. Jel wax cham jk'ujol ja mi nupanelukon oj chamkoni, wax k'ana oj waj kok'eltan jb'aj.
38Alji yab' yuj ja stat a wajuk, ja'yuj ti waj sok ja smoj ak'ixil ja b'a yaxk'uli. Ja tiwi jex ok'i, jel yaj wax yab' yuj ja lom mi nupani.
39Yajni ek' ja chab' ixawi, ti'xa kumxi ja b'ay ja stati, jach'ni jastal alji yab' yuj ja Dyosi, jach'ni sk'u'lana, ya'ani ja yak'ixa. Jaxa ak'ixi mini nupaneluk chama. Ja k'ak'u jumasa jawi ti k'e yawe kujlajuk jachuka 40b'a spetsanil ja jab'il jumasa, k'e' snol'e' chane k'ak'u ja untik jumasa israelenio, b'a sna'ulab'il ja yak'ix ja Jefte.
Currently Selected:
Jueces 11: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
