Ezequiel 46
46
Ja slimosna jumasa ja mandaranum sok ja kristyano'i
1—Snajtil ja wake k'ak'u b'a a'teli, ja b'a wax ajyi ochel b'a stojol wax jak ka k'ak'u b'a yoj sti' na'itsi, lutan oj ajyuk; kechan ja oj jamxuk ja sk'ak'u'il jijlel sok ja k'ak'u ya'aw ja nan ixawi. Ja iti, yujni jach' oj b'ob'uka.
2—Ja mandaranumi, ti oj och b'a niwan wax ajyi ochel b'a oj sk'el ja sti' na'its b'a jwera, ti oj k'ot tek'an b'a mojan b'a wax ajyi t'an ochel ochi. Ti'ni b'a wax ajyi ocheli, ti' oj ko' mek'an ja mandaranumi, man oj sta' k'ot ja lu'um ja spatan yuj ja oj stoy'oni; jaxa pagre jumasa oj stsik e ja chante jumasa yuj ja wa stoyowone'i, oj cho ya'we ki ja jmajtan b'a oj sk'an'e sak'anile sok slekilale'i. Tsa'an oj el ja mandaranumi, jaxa b'a wax ajyi ocheli lutan oj ajyuk man oj och ja a'kwali.
3—Ja sk'ak'u'il jijlel jumasa sok ja yajni ya'aw ja nan ixawi, spetsanil ja kuntikil jumasa, ti oj stoy'one b'a mojan wax ajyi ocheli. 4Jaxa ye'n ja mandaranumi, jel t'ilan oj ya'ki b'a jmajtan ja chante jumasa iti:
—B'a sk'ak'u'il jijlel jumasa oj smilki wake chej, sok jun swaw b'a mini jun syajb'el ay. 5B'a jujune ja waw chej jawi, oj ya'ki sok jun tajb'e kilo k'ilub'al sat te', jaxa sok ja tuk chej jumasa, kechan ja oj ya'ki ja janek' oj b'ob' ya'i. B'a jujun tajb'e kilo k'ilub'al sat te' oj ya'ki sok oxe prasko (litro) sok snalan aceite.
6—B'a ixaw jumasa yajni ya'aw ja nan ixawi, oj smilki jun yal wakax, wake yal chej sok jun swaw b'a mini jun syajb'el ay. 7B'a jujune yal wakax sok b'a jujune waw chej oj ya'ki sok jun tajb'e kilo k'ilub'al sat te'; jaxa sok ja yal chej jumasa ja oj ya'ki ja janek' oj b'ob' ya'i. B'a jujun tajb'e kilo ja k'ilub'al sat te'i, oj cho ya'ki sok oxe prasko (litro) sok snalan aceite.
8—Ja mandaranumi, ti' oj ochuk sok oj el b'a niwan wax ajyi ochel b'a wax ajyi t'an ocheli, 9jaxa janek' oj alb'uk ja k'in jumasa, yajni oj ochuk ja kristyano oj stoy'e ja Dyosi, jach' oj k'u'laxuk jastal iti:
—Ja ma ti oj och b'a wax ajyi ochel b'a stojol wax jak ja k'ak'u ti'xa oj el b'a wax ajyi ochel b'a ko'el k'inal, jaxa ma ti' oj och b'a wax ajyi ochel b'a ko'el k'inali, ti oj el b'a wax ajyi ochel b'a k'e'el k'inal. Mini jun ma' ti' oj eluk ja b'a ochi; ti'ni oj eluk ja b'a wax ajyi ochel it tey b'a sti' sati.
10—Ja mandaranumi, jel t'ilan ti'ni oj smojta ja kristyano'i, jachuk ja yajni oj och b'a snajtsil tsomjeli, cho jach'ni ja yajni oj eluke'i.
11—B'a jujune ja k'in jumasa, ja majtanal jumasa, jach' oj milxuk jastal iti: B'a jujune yal wakax, sok b'a jujune waw chej, oj yawe ki sok jun tajb'e kilo k'ilub'al sat te'; jaxa sok ja yal chej jumasa ja oj ya'we ki ja janek' oj b'ob' yujile'i. B'a jujun tajb'e k'ilub'el sat te' oj cho ya'we ki oxe prasko (litro) sok snalan aceite.
12—Ja mandaranumi, yajni oj ya'ki jun jmajtan b'a jastal ye'n wax b'ob' yuji, a'nima b'a oj tsikxuk, ma b'a oj sk'an sak'anil sok slekilal, oj jamxuk ja b'a wax ajyi ochel b'a stojol wax jak ja k'ak'u b'a oj smilki ja chante jastal wax k'u'laxi b'a sk'ak'u'il jijleli. Yajni ch'akta ya'ki ja jmajtani oj el ele, oj cho lutxukan ja b'a wax ajyi ocheli.
13-15—Spetsanil ja sakb'el jumasa, mini oj ek' loma, jel t'ilan oj ja mil'exki jun yal chej b'a jun jab'il, b'a mini jun syajb'el ay, b'a oj tsikxuk yuj ja waxa toyowonexi. Cho jach'ni, jel t'ilan b'a jujune sakb'el oj ja wa'wex ki jun jmajtan sok juke kilo k'ilub'al sat te' sok jun prasko aceite. Ja aceite ja oj pek'xuk sb'aj ja arina.
Ja jastik oj sk'u'luk ja mandaranumi
16—Ja mandaranumi, yajni oj sk'eb' yi xe'nuk ja slu'um junuk ja yuntikil jumasa, ja xe'n lu'um jawi, ja'ni oj sdote'uk ja yunin jawa. Ja iti, yujni jach' oj b'ob'uka.
17—Jaxa mandaranum jawi, ta wan k'a sk'eb'ayi xe'nuk ja slu'um jumasa junuk ja ya'tijumi, ja xe'n lu'um jawi, kechani ja oj b'ob' ya'telata ja a'tijum jaw ja janek' tey sok ja mandaranumi, yajnix k'ot ja jab'il oj el b'a yib' k'ab'ali ti' oj ya' kan ja lu'um jawi. Yujni ja sdote ja yunina. 18Ja mandaranumi, mi oj b'ob' sb'ajuk ja slu'um ja kristyano'i, cho mi oj b'ob' ya' yi ja yuntikil jumasa b'a oj sdote'uk. Ta yuj k'a wa sk'ana oj ya'yi xe'nuk a ya yi b'a sb'aj ye'ni. Ja'yuj mi oj b'ob' sjapyi ja kuntikil ja slu'um ye'nle'i—.
Ja b'a wax tojb'i wa'el jumasa b'a snajtsil tsomjeli
19Tsa'an yuj ja iti, ja winiki, ti yi'ajon ja b'a wax ajyi ochel it tey ts'eel b'a wax ajyi ocheli, b'a waj kil ja k'utsan na'its jumasa, it ti wax kan b'a k'e'el k'inali; ja'ni ja k'utsan na'its jumasa b'a kechan wax makuni yujile ja pagre jumasa. Ti sje'a ki tiw ja spatik ja na'its it ti wax kan b'a stojol wax och ja k'ak'u. 20Ja'yuj, ti yala kab'a:
—Ti oj b'ob' sts'an'e il ja b'ak'et sb'a chante jumasa b'a oj ya'we ki b'a oj ch'ay ja mulal jumasa; cho ti'ni il oj b'ob' k'ilxuk ja sat te' jumasa b'a jmajtani. Jach' jastal iti, mi oj b'ob' ya'we el ja b'a sti' na'its ja wa'el b'a jach' mi oj b'ob' syam'e ja kristyano ja wa'elal jumasa it tsa'ub'ali—.
21-22Tsa'an, ja winik jawi, ti yi'ajon b'a waj b'ejtatikon schanil schikin ja sti' na'its b'a jwera. B'a jujune schikin ay jun yal sch'inil, b'a jujune ja sti' na'itsi, ay yi'oj jun tajb'e metro ja snajtili, jaxa sati, jo' lajune metro. 23Spetsanil ja jaw jumasa joyb'anub'al yuj ts'akab' ton, spetsanil ja b'a yib'el ja b'a ts'akab' toni, ay b'a wax ta'ji wa'el. 24Ja'yuj ja winik jawi, ti yala kab' ja b'a wax tojb'i ja wa'el jumasa ajyi, ti oj a'tijuke tiw ja ma'tik wax ya'telta ja snajtsil tsomjeli, ti wa sts'anawe tiw ajyi ja majtanal wax ya'a ja kristyano'i.
Currently Selected:
Ezequiel 46: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
