Ezequiel 45
45
Ja lu'um b'a snajtsil tsomjeli
1—Yajnix och k'epxuk ja lu'um jumasa b'a jujun k'ole'i, ojni a'xuk yi ja janek' sb'ej oj yi'a, jaxa sb'a jDyosi, oj pilxuk kan lajchawe kilometro sok snalan ja snajtili sok lajune kilometro ja sati. Ja lu'um iti, kechani ja b'a oj makunuk yuj ja Dyosi.
2—Ja b'a lu'um iti, oj pilxukan jun xet'an b'a chab' syen chab' tajb'e sok lajune metro b'a jujune sts'el, b'a sjoyanal junxta oj kanuk ja lu'um iti, oj kan lom xet'an b'a jun tajb'e sok jo'e (25) metro ja sati. Ja xet'an iti, cho ja'ni slujmal ja snajtsil tsomjeli.
3-4—Jaxa pagre jumasa ma wax ya'telta ja Dyos b'a snajtsil tsomjeli, oj pilxuk kan lajchawe kilometro sok snalan ja snajtili sok jo'e metro ja sati. Ja lu'um iti, ti' oj ya k'e'uk ja snaj ja pagre jumasa cho ja'ni slujmal ja snajtsil ja tsom Cho jach'ni wax na'xi, jun lu'um tsa'ub'al.
5—Ja ma'tik wax koltajiye yuj ja pagre jumasa, oj cho a'xuk yi'e jun lu'um ja ye'nle'i, cho jach'ni lajchawe kilometro sok snalan ja snajtili, sok jo'e kilometro ja sati, b'a jach' oj b'ob' ajyuk slu'ume b'a oj ayuke'a.
6—Tsa'an, oj pilxuk jun lu'um b'a lajchawe kilometro sok snalan ja snajtili, b'a chab' kilometro sok snalan ja sati. Ja lu'um iti, ja b'a oj stojb'es b'a oj ajyuke spetsanil ja israelenio, ti oj kan sok lajan ja lu'um tsa'ub'al b'a snajtsil tsomjeli.
Ja lu'um sb'a mandaranumi
7—Cho jach'ni, oj pilxuk kan jun lu'um ja sb'a mandaranumi. Ja lu'um iti, ti oj kan b'a jujune sts'e'el ja slujmal snajtsil tsomjel sok ja slujmal ja chonab'i. B'a stojol wax och ja k'ak'u ti oj k'ot man b'a niwan paman ja' Mediterraneo; b'a stojol wax jak ja k'ak'u ti oj k'ot man b'a niwan ja' Jordan, b'a chab'il ja iti, junxta sniwanil ja jastal sb'a k'ole jumasa yuj ja israelenio. 8Ja smandaranum ja israelenio oj ajyuk slu'um ja ye'nle'i, b'a jach' mi ma oj b'ob' sjap e yi slu'uma. B'a jujun k'ole yuj ja israelenio oj ajyuk lu'um ja ye'nle'i.
Ja ab'al jumasa sb'a mandaranumi
9—Ja ke'n, ja Dyos yuj ja israelenio, wax kala jastal iti: mandaranum jumasa yuj ja israelenio. —Malanxa ja janek' wa'nex ixtalaneli, sok ja jastal wa'nex t'enwaneli. Aktayikxa yelk'ajel ja jastik sb'aj ja kuntikili. Jel slekil ja k'ulanik yi'e b'a leki cho toj ajyanik—
10—Ja jas waxa likawexi, likawik ts'ikan, 11ja b'isulab'il ja sat trigo ja' cho a b'isawex sok ja jas ya'lel ayi. Ja lekil sb'isulab'ili, ay yi'oj chab' syen sok jun tajb'e prasko (litro), oj cho b'ob' pilxuk b'a lajune oj b'ob' el jo' tajb'e ja jach' jujune'i.
12—Ja sb'isulab'il ja jas oj ja likexi, ja'xa likawex sok ja b'a ay yi'oj jo'e kilo, oj b'ob' pilxuk chab' tajb'e sok lajune' oj b'ob' k'ot mil ja jujune'i.
Ja limosna jumasa b'a kulto
13—Yuj ja majtanal jumasa b'a sat trigo sok ja sat cebada, t'ilan oj ja pil'ex ox tajb'e jun xta lajan, t'usan ja b'a jawi, ke'n oj ja wa'ex ki b'a jmajtan. 14Cho jach'ni, t'ilan oj ja wa'wex ki jun prasko aceite b'a jmajtan b'a kada jo' tajb'e prasko (litro) ja janek' waxa wa'wex eluki. 15Jaxa b'a wa chejexi, oj ja wa'we ki june b'a chab' syen (200) chej, yuxta ja b'a kojlel leki. Ja chej jumasa jawi ja oj smo'uk sb'aj sok ja majtanal k'ilub'al sat te'i, ja' majtanal it wax tsikxi, sok ja it waxa wa'wex b'a waxa k'ana a sak'anilex sok a lekilalexi. Ja jastal iti, ojni jch'ay ja wa mulex jumasa'a. Ja iti, yujni, jach' oj b'ob'uka.
16—Ja iti, yujni spetsanil ja swinkil ja chonab' oj ya' yi ja majtanal it ja mandaranum yuj ja israelenio. 17Cho jach'ni, ja mandaranumi, t'ilan oj ya ja chante jumasa yuj ja majtanal jumasa b'a wax ch'ak tsikxuk, cho jach'ni ja it wax makuni b'a majtanal yuj ja mulali, ja k'ilub'al sat te' jumasa, ya'lel ts'usub', sok ja it waxa k'ana a sak'anilex sok a lekilalexi. Ja iti, ja oj ja k'u'lukex ja b'a k'in jumasa wa sk'u'lan ja israelenio b'a jujune semana, b'a jujune ixaw sok b'a jujune jab'ili. Sok ja jastal iti, oj ch'ayi ja smule ja israelenio jumasa.
K'in b'a sya'al k'inali
18—Yuj ja ke'n Dyoson yuj ja israelenio, jach' wax kala jastal iti: Ja sb'ajtanil yajtab' ja ixaw b'a Abib, ja we'nlexi, oj ja wa'wex ki b'a jmajtan jun yal wakax b'a mey mini jun syajb'el. Ja majtanal iti, ja b'a oj sak' ja snajtsil tsomjel b'a chikan ja smulalil.
19-20—Ja sak'jeli, jach' oj k'u'laxuk jastal iti: Ja pagre oj sjaxyi ja ste'il jumasa b'a wax ajyi ochel b'a snajtsil tsomjeli, ja schik'el ja chante'i, b'a schanil schikin ja altari, sok ja ste'il jumasa b'a wax ajyi ochel b'a sti' na'its b'a yojoli. Cho jach'ni oj k'u'laxuk ja b'a sjukil k'ak'u ja ixawi, ja iti, ja b'a oj koltajuk ta yuj k'a ay ma ko' mulal mi yuj mi jachukuk wan sna'jeli, ma yuj mi wa sna'a ja jas wa'n sk'u'lajeli.
21—Ja k'in b'a sya'al k'inali, t'ilan oj k'u'laxuk b'a chan lajune yajtab' ja ixaw jawi. B'a yojol juke k'ak'u oj slo'e ja pan b'a mey slevadura'il. 22Ja k'ak'u jaw ja mandaranumi, oj ya'ki jun yal wakax b'a jmajtan, b'a oj ch'ayxuk yi ja smul ye'n, sok b'a spetsanil ja kristyano'i. 23Mi kechanuka, b'a jujune ja juke k'ak'u b'a k'ini, ja mandaranumi oj ya'ki b'a jmajtan juke yal wakax, sok juke waw chej b'a mini jun syajb'el yi'oj. B'a jujune k'ak'u oj ya'ki jun chivo, b'a jach' oj b'ob' jch'ayi ja smul jumasa. 24B'a jujune yal wakax sok b'a jujune waw chej, oj ya'ki b'a jmajtan jun tajb'e kilo k'ilub'al sat te', sok oxe prasko sok snalan aceite.
Ja k'in sb'a lejchupat jumasa
25—Ja jo' lajune yajtab' ja ixaw Etanim, ja oj k'u'laxi ja k'in sb'a lejchupat jumasa. Snajtil ja juke k'ak'u oj ajyuk ja k'ini, b'a jujune k'ak'u ja mandaranumi, t'ilan jach' oj ya'ki ja jmajtan b'a ya'taki b'ajtan yuj ja mulali, jach'ni jastal ya'ki ja jmajtan k'ilub'al sat te' sok aceite.
Currently Selected:
Ezequiel 45: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
