Ezequiel 43

Sok spetsanil yip kumxi ja Dyos b'a snajtsil tsomjeli

1Ja winik jawi, yi'ajon och b'a pwerta b'a stojol wax jak ja k'ak'u, 2ti kila jakum ja Dyos it jel ja yip yuj ja israelenio. Ja jastal wa'n jan b'ejyeli, wax ab'xi jun tsatsal ik', jach' jastal jun niwan ja' yajni b'ut'el lek, jaxa b'a lu'umi, lijpi el. 3Yajni kila ja jastal iti, ti jul jk'ujol ja jas je'aki ja Dyos ja k'ak'u sch'aka ja Jerusaleni. Spetsanil ja iti, lajan sok altiro ja jas je'aki b'a niwan ja' Quebari.

Ja ke'n ko'yon nujan man b'a lu'um, 4Jaxa Dyosi, sok spetsanil yip wa'n ochel och b'a snajtsil ja tsomjel b'a wax ajyi ochel b'a stojol wax jak ja k'ak'u. 5Jaxa yespiritu ya k'e'kon tek'an, ti yi'ajon och b'a patyo. Ti jna'a tiw jastal sb'ut'u el ja yip ja Dyos b'a snajtsil ja tsomjeli.

6Ja winik jawi, ti jak tek'an b'a jts'e'el. Ja k'ak'u jawi, kab' ay ma' sk'umanon jan man b'a snajtsil ja tsomjeli. 7Ti yala kab'a:

—Ezequiel, ja we'n lom winik, ja b'a chonab' iti, kalata ti oj jk'u'l mandara, ti' il ja b'a wala ajyiyon ja ke'n cho ja'ni b'a spetsanil k'ak'u ti' oj ajyukon sok ja israelenio jumasa. Me'y tuk Dyos jastal ja ke'n. Mi oj ki' lek ja mi oj cho sk'u'ukone ja ye'nle'i, cho mini ja smandaranume jumasa, cho mini ja mi oj skis'one' ja oj stoy'e ja smandaranume jumasa b'a chamelxa. 8Cho mi oj b'ob' sk'u'luke niwak na'its b'a mojan sok ja snajtsil jtsomjeli, oj b'ob' stojb'ese sok pilan smakb'al. Ja jastal jel tuk ja jastalei, wax ya'we tajkukon, yuja ja ke'n jun Dyos jel tukoni. Jel ya'we k'e'ki ja tajkelali, ja'yuj ch'aka sna'jele. 9Kechan ta yuj k'a stojb'es ja jastalei, sok mixa ja stoy'e ja smandaranume jumasa, ja ke'n ti'ni oj ajyukon soke spetsanil k'ak'u'a.

10-11—Ka'ax, kax ala yabye ja israelenio jumasa jastal oj stojb'ese ja snajtsil ja tsomjeli, ja b'a oj ajyuk ochel sok b'a oj ajyuk eleli. Je'a yi'e ja jastal mero oj tojb'uki sok ja sniwanil oj kan soki; Spetsanil ja iti, jel lek ts'ijb'an yi'e b'a jach' oj sk'u'luke jastal mero kala wab'i. Cho je'a yi'e spetsanil ja ab'al jumasa it ka'unej a wi'i, a sk'u'uke, b'a jach' oj k'ixwuke lek yuj ja jastal jel tuk ja jas wa sk'u'lane'i.

12—Jach' jastal it ja ab'al yuj ja b'a snajtsil tsomjeli: Spetsanil ja lu'um b'a yal b'ujan it sjoyb'unej ja snajtsil ja tsomjeli, oj alxuk jun chonab' mi tsa'ub'aluk.

Ja altari

13-17Ja altari lajan sok altiro ja piramide, kechan sok oxe slado tojb'el junxta sniwanil b'aya tuktukil sniwanil: Ja b'a yojoli, juke metro ja jun ts'eeli sok jun metro ja scha'anili, a'nima kechan nalan metro chikan yuj ja yuk'mal joyb'anub'al yuji. Ja b'a nalane'i, junxta sniwakil wake metro b'a jujune sts'e'el sok chab' metro ja scha'anili. Jaxa b'a niwan b'a wax tsikxi ja majtanal jumasa, junxta ja sniwakili, chab' metro ja snajtili, sok chab' metro ja scha'anili. Jaxa b'a lado sat k'e'el elel chane lujk'uch tak'in oj slaj jastal gancho. Jaxa b'atulub' jumasa b'a wax ajyi k'e'el b'a altari ti wax kan b'a stojol wax jak ja k'ak'u.

Ja majtanal jumasa wax a'xi yuj ja altari

18Tsa'an, ja winik jawi, yala kab'i:

—Ja Dyos yuj ja israelenio jach' wax yala oj k'u'laxuk jastal iti:

—Yajni lekxa ay ja altar b'a oj tsijuxuk yi ja chik' sok b'a oj tsikxuk ja majtanal jumasa, 19kechan oj b'ob' ek'uke jan mojan b'a altar b'a oj ya'teltayone ja pagre jumasa yuntikil ja Sadok. We'n oj ja wa' yi'e jun yal wakax b'a oj stsik e ki b'a jmajtan yuj ja smule'i. Ke'n ja Dyoson yuj ja israelenio jach' wax kala jastal jawi.

20—Tsa'an yuj ja jawi, jaxayi ja altar sok t'usan ja schik'el ja yal wakaxi. Oj ja tsijuk yi b'a schanil slujk'uch tak'inil ja altari, sok schanil schikin b'a niwani, sok b'a sjoyanal ja smejch'ili. 21Tsa'an, i'aj ja yal wakax it milxi yuj mulali, ti'xa tsika b'a jwera yuj snajtsil tsomjeli, ja'ni b'a chonab' k'elxeli.

22—Ja b'a schab'il k'ak'u mila jun yal chivo b'a majtanal yuj ja mulali, b'a mini jun syajb'el ay, jaxa pagre jumasa jach'ni oj cho sk'u'luke jastal sk'u'lane sok ja yal wakax b'a sak'awe ja altari. 23Yajni ch'akta milxuk ja majtanal jumasa iti, ti'xa wi'aj jun yal wakax sok jun waw chej b'a mini jun syajb'el ay, 24ti'xa milaki b'a jmajtana. Jaxa pagre jumasa oj ya'we och yats'mil ti oj ch'ak stsik e yuj ja lek oj kili.

25-27—B'a yojol juke k'ak'u, yuj ja mulali, milaki b'a jmajtan jun yal chivo, jun yal wakax, jun waw chej b'a mini jun syajb'el ay. Jaxa pagre jumasa jujune k'ak'u oj sak'e spetsanil ja altari, b'a jach' sak oj ajyuk b'a oj makunuk kuji. Jaxa b'a waxakil k'ak'u, oj b'ob' smil'e ki ja pagre jumasa ja majtanal jumasa oj ja wi'ex och b'a oj tsikxuk yuj niwan waxa wilawonexi, cho jach'ni ja majtanal jumasa b'a oj ja k'an'ex a lekilalex sok a sak'anilexi. Jaxa ke'n ojni ki'a wi'ex lek sok spetsanil jk'ujola. Ja ke'n ja Dyos yuj ja israelenio, jach'ni wax kala'a—.

Currently Selected:

Ezequiel 43: YABD

Highlight

Copy

Compare