Exodo 5

Ja Moises sok ja Aaroni, sk'umane' ja mandaranum b'a Egipto

1Ja Moises sok ja Aaroni, yajni ch'ak ya' slo'ile sok ja israelenio jumasa, ti'xa waj sk'umuke ja mandaranum b'a Egipto, ti yalawe yab'a:

—Jas Dyos ja israelenio jumasa, jach' wax yala wab' jastal it niwan mandaranum, Jeka ja kuntikil israelenio b'a ch'ayan lu'um k'inal, b'a oj waj sk'u'luke jun k'in yuj ja oj stoyone'i.

2Ti yala ja mandaranumi:

—¿Mach' xa junuk ja Dyos jaw b'a? ¿Ja sb'ej ja t'ilan oj k'u'uk ja ke'ni? —Mix na'a ta ay Dyos yuj ja israelenio jumasa, cho mini oj jek ex ja we'nlex b'a oj wajanika—.

3Jaxa Moises sok ja Aaroni, ti yalawe yab'a:

Yuj ja ye'n ja Dyos kujtikoni sok jakta b'a oj skoltayotikon. T'ilan lek oj wajkotikon ja b'a ch'ayan lu'um k'inali, chikan b'a tik'an oj k'otkotikon ja oxe k'ak'u, ti oj ka'tikon yi' tiw ja smajtan ki'ojtikoni. Ta yuj k'a mi oj jk'u'ltikon yi jachuki, t'ilan oj ya'ki'tikon jun chamel, ma ti oj ya chamkotikan b'a yoj tiro'anel.

4-5Jaxa mandaranumi, ti yala'a:

—Ja lek kax a'tijananik. K'elawilex jaye kristyano jumasa wa'ne sch'ay jel k'ak'u lom ja ili, xchi ja mandaranumi.

6Ja junxta k'ak'u jaw ja mandaranumi, yala yab' ja k'ela winik jumasa sok ja ma'tik jel niwak ja ya'tel b'a jujune' k'ole'i:

7—Mokxa a wa'wex yi ak ja israelenio jumasa b'a oj sk'u'luke ja lagriyo, a'xa waj sle'e jan ye'nle. 8Kechan alawik yabye ja'ni t'ilan oj sk'u'luke ja janek' k'ajyel wa sk'u'lane'a; mini b'a mi oj ts'ikwuka, yuj ja jel xa jaragane; ja'yuj wa'nexta yaljel oj wajuke b'a ch'ayan lu'um k'inal oj waj stoy ja Dyos yujile'i. 9Jaxa we'nlexi, a'wik a'tijuke tsats lek. Mok a wa'wex ajyuke lom, b'a mi ti oj smaklaye ja lo'il it mi smeraniluk wa'ne yaljel ja Moises sok ja Aaroni.

10Jaxa k'ela winik jumasa sok ja ma'tik jel niwak ja ya'tele wa sk'elawe ja a'teli, waj yalwe yab' ja israelenio jumasa:

—Sjekawotikon ja mandaranum b'a oj kaltikon a wabyex mixa oj ka'tikon a wi'ex ak b'a oj ja tojb'esex ja lagriyo jumasa, 11we'n oj ja wil b'a oj ja ta'exa, kechan mini jun lagriyo mi oj ts'ikwuk ja janek' k'ajyel waxa k'u'lanexi.

Ja israelenio waj yal'e yab' ja mandaranumi

12Ja israelenio jumasa, ch'ak sb'ejtese spetsanil ja slujmal ja Egipto, b'a wa sle'awe ja takin ak b'a oj makunuk yujile ja jastal wax a'jiyi'e ajyi. 13Ja k'ela winik jumasa ti wax yalawe'a: —Nutsa b'ajex. Yuj ja t'ilan jach' oj ja k'u'lukex jujune' k'ak'u ja lagriyo ja janek' ni k'ajyel waxa k'u'lanex ajyi ja yajni wax a'ji a wi'ex yakili.

14B'aya mix ts'ikwi yujile, jaxa k'ela winik jumasa, ti wax och smak'e lek ja ma' niwan ja ya'tel yuj ja israelenio jumasa. Ti wax yalawe'a, —Ja'xa yoxil k'ak'u mix ts'ikwi a wujilex ja janek' t'ilan oj ja k'u'lukex ja lagriyo.

15Jaxa ma'tik ay ya'tel yuj ja israelenio, och sk'umuke ja mandaranumi. Ti yalwe yab'a:

—¿Niwan mandaranum, jasyuj jach' waxa k'u'lan ki'tikon b'a? 16Ja wa wa'tijum jumasa, mi kechan wa st'enawotikon b'a oj k'u'ltikon jitsan lagriyo, mixa wantox ya'we ki'tikon ja ak ta, jachuk ti wax och smak'otikone ta yuj k'a mix b'ob' jk'u'ltikon ja janek' wax k'u'lantikon ajyi, ja iti, smul ye'nle mi jmuluk ke'ntikon.

17Ti alji yabye yuj ja mandaranumi:

—Jaraganex lek. Jel jaraganex, wa'nexta yaljel kab' b'a oj ka wajanik b'a oj waja toy'ex ja wa Dyosexi, ja'yuj ja mix k'anxi a wujilex ja a'teli. 18Ja'yuj kax a'tijananik, a'nima mi oj ka'wi'ex ak, ja we'nlexi, t'ilani jach' oj ja k'u'lukex ja lagriyo ja janek' ni k'ajyel waxa k'ulanexa.

19Ja jas yala ja mandaranumi, wa sk'ana yal jun niwan wokol wa'n a'jelyi ja ma'tik jel niwak ja ya'tel yuj ja israelenio jumasa, 20jaxa Moises sok ja Aaroni, ti wa'ne majlanel b'a sti na'its, yajni sta'a sb'aje'i, 21ti yalwe yab' ja Moises sok ja Aaroni:

—Dyos a ya'a tup'ex yuj ja jas mi lekuk a k'u'lanexta ki'tikoni—. Jayuj ja mandaranum sok ja ya'tijum jumasa, mi lek wax yilawotikon yuj ja jastal ja ajyi. —Kechan ita a wa'wex sna' k'inal b'a oj smil'otikone.

22Ja'yuj ja Moisesi, ti sk'uman ja Dyosi:

—Dyos kuj, ¿Jach' sb'ej jastal it ja a jekawoni? ¿Yuj kechan b'a oj yi' wokol ja wa chonab'ili? 23Man julyon ja b'a Egipto kal yab' ja mandaranum ja jas a wala kab' oj kal yab'i, jaxa ye'n mini wax ya'kan yixtalajel ja wa wuntikila, jaxa we'n mi jas waxa k'u'lan t'unuk b'a oj ja koltaye'i.

Currently Selected:

Exodo 5: YABD

Highlight

Copy