Exodo 4

1Ja yuj ja Moisesi, ti yal yab' ja Dyosi:

—Ja tatal jumasa yuj ja israelenio mi oj sk'u'uke yuj meran ja kilawa, ja'yuj mini oj yi'one niwana.

2Ja'yuj ja Dyosi, ti sjob'o yi'a:

—¿Jasunk'a yaman a wuj b'a?

—Jun najb'ante', —xchi ja Moisesi.

3—Ti yala ja Dyosi, jipa b'a lu'um.

Jaxa Moisesi, sjipa b'a lu'um ja najb'ante' jawi, ti'xta pax b'its'il chanil. Jaxa Moisesi sle'a stojol jastal jits ele, 4Ti alji yab' yuj ja Dyosi:

—Jaxa yan xijpun ja wa k'ab'i tixa yama yi b'a snej ja b'its'il chan jawi.

Jaxa Moisesi, sxijpun ja sk'ab' b'a oj syam ti'xta pax najb'ante' ja b'its'il chan jawi. Ja'yuj ti alji yab' yuj ja Dyosi:

5—Jach' oj ja k'u'l jastal it, ja b'a sti sat ja tatal jumasa yuj ja israelenio. Yajnix yilawe oj pax b'its'il chanil ja wa najb'ante'i, ti oj sk'u'uke yujni a wilawonta'a, sok ke'n ja Dyos yuj ja ma ek' paxta a wujilexi. 6-8Kechan ta yuj k'a mi sk'u'ane ja jas oj ja wali, ta yuj k'a mi oj kisjani, cho je'a yi'e pilan senya: A' och wa k'ab' b'a yoj wa k'u'i, yama ja sni' a k'ujoli; cho a eluk.

Ja Moisesi, jach'ni sk'u'lana, yajni ya eluk ja sk'ab'i k'a'el ay, ay yi'oj k'a'el chamel, ti yala ja Dyosi:

—A' och pilan mak'e ja wa k'ab' b'a yoj wa k'u'i.

Ja Moisesi, sk'u'ani'a, yajni ya eluk ja sk'ab'i lek ay lek. Ti cho yala ja Dyosi:

9—Yaj ni xyilawe ja chab' senya iti, ta yuj k'a mi skisawe ja jas oj ja wali, ka'ax b'a niwan ja' Nilo, pacha'el t'un ja', ti'xa pek'a b'a lu'um, ja ja' jawi, oj pax chik'il.

10Jaxa Moisesi, ti yala yab' ja Dyosi:

—Mix na'a lek k'umal tak. Ja yajni wa'non lo'ili, jel smocho sb'aj ja kak'i, ja'yuj, mi ma skisawon, ja jastal ayoni man jch'inil jachukon.

11Ti jak'ji yi yuj ja Dyosi:

—Moises maklan lek ja jas oj kal a wab'i, —ke'n oj b'ob' ka k'umanan, cho ke'n mi oj ka k'umanan. —Ke'n oj ka'a wab' k'inali. Cho ke'n mi oj ka'a wab' k'inal. —Ke'n oj ka'a wil k'inal, cho ke'n mi oj ka'a wil k'inal. 12Ja'yuj ka'ax ja b'a Egipto wa xkala wab'i, ke'n oj koltaya b'a oj k'umanan lek, ke'n oj cho kal a wab' jasunk'a oj ja wali.

13Ti cho yala ja Moisesi:

—Dyos kuj, wax k'ana a wi jitsan ts'akatal jeka pilan ma oj wajuk.

14Jaxa Dyosi, ti'xa tajki sok ja Moisesi, ti yala yab'a:

—Tey wa b'ankil Aaroni, it pagre ay sok ja k'ole b'a Levi. Ja Aaroni, wax k'umani lek, sok jel sna'a jastal wax ya yab' sb'ej ja kristyano jumasa. Cho elta jani jakumxa sta'a, jel lek oj yil'a. 15-16We'n oj ja wal yab' ja Aaron spetsanil ja jas kal ta awab' oj a wali, b'a jach' ye'n oj k'umanuk b'a sti' sat ja kristyano yuj ja we'n. B'a jach' ye'n oj b'ob' yal ja Aaron ja jastal oj ja wal ja we'n, jach'ni ja jastal waxa wala ja jas wax kala ke'n. Jaxa ke'n oj jkoltayex jastal oj k'umananik, oj cho je'a wi'ex jasunk'a oj ja k'u'lukexi. 17Ka'ax, i'aj wa najb'a te'i, k'u'lan sok ja jastal kalata a wab' oj ja k'u'luki.

18Jaxa Moisesi, kumxi b'a snaj ja sni'al Jetro, ti yala yab'a:

—Ja ya'n jel t'ilan oj kumxukon b'a Egipto. Wax k'ana oj kil ta sak'aneto ja israelenio jumasa.

Ti alji yab' yuj ja Jetro:

—Ka'ax jun a k'ujol. Wax majlan lek oj k'otan.

Kumxi b'a Egipto, ja Moisesi

19Ti' to ay b'a Madian ja Moises ja yajni alji yab' yuj ja Dyosi:

—Lek, kumxan b'a Egipto, ch'akta chamuke ja ma'tik wa sk'ana oj smil'a' ajyi.

20Ja'yuj ja Moisesi, ya k'e'uk b'a jun burro ja sche'um sok ja yuntikili ti kumxiye b'a Egipto. Ti yaman och yuj ja snaj b'ante a'jiyi yuj ja Dyosi. 21Tsa'an ti alji yab' yuj ja Dyosi:

—Yajni la k'ot ja b'a Egipto, ti xch'ak a k'u'luk b'a sti' sat ja mandaranum ja milagro jumasa it kala wab' oj ja k'u'l sok wa naj b'ate'i. Ke'n oj ka ch'u'uy b'uk ja sk'ujol ja mandaranum b'a mi oj ya' eluk ja israelenio jumasa. 22Ti'xa wal yab' ja mandaranumi: Jach' wax yala jastal it ja Dyos yuj Ja israelenio jumasa, lajan sok ja b'ajtan alats kuj, —xchi. 23Ja'yuj wax jak kala wab'i a eluke b'a oj stoyone, yuj ja mix wa' eluke ja'yuj ja ya'n oj chamuk ja sb'ajtanil a wunini.

24B'ejto aye ja Moises sok ja swinkil snaji, yajni och ja a'kwali ti jijliye'a. Ja b'a jijliye'i ti kol miljuk tiw ja Moises yuj ja Dyosi, 25-26Jaxa Sefora yi'aj jun kuchilo skupuyi xet'an ja swinkil ja yali; ja xe'n sts'ujmil skupu ti ya' nochan b'a swinkil ja Moisesi, ti yala yab'a, —Sok ja schik'el ja kali oj skoltaya lek.

Yajni yila ja Dyos jas k'u'lan ja Sefora, ya'kan sak'an ja Moisesi.

Ja Moises sok ja Aaroni

27Ja Dyosi, ti yala yab' ja Aaroni:

—Ka'ax b'a ch'ayan k'inal, kax ta'a ja Moisesi.

Ja Aaroni wajni ja b'a syaxk'ul ja Dyosi. Yajni sta'a sb'aj sok ja Moisesi, ya' yi dyos sok yujts'an 28Jaxa Moisesi, ti och yal yab' spetsanil ja Aaron ja niwak milagro alub'al yab' yuj ja Dyos oj sk'u'luke b'a Egipto, sok spetsanil ja jas alji yab' oj yal'e'i. 29Tsa'an ti wajye scha'wanile waj stsom'e' ja ma'tik ay ya'tel yuj ja israelenio jumasa, 30ti och yal ja Aaron ja jastal alub'al yab' ja Moises yuj ja Dyosi, b'a sti' sat ja kristyano ti sk'u'lan ja milagro it alji yab' oj sk'u'luki. 31Jaxa israelenio jumasa sk'u'ane ja jas yala ja Moisesi, yajni yabye oj koltajuke yuj ja Dyosi, snujts'in ja s'olome b'a lu'um sok jel stoyowe ja Dyosi.

Currently Selected:

Exodo 4: YABD

Highlight

Copy