Exodo 3

Ja Dyosi, spaya ja Moisesi

1Ja Moisesi ja wa stalna yi ja schej ja sni'al Jetro pagre b'a Madiani. Jun k'ak'u ja Moisesi, ti yi'aj b'a takin lu'um k'inal ja chej jumasa, k'ot man b'a swits ja Dyosi, ja sb'i'ili, wits Horeb. 2Ti sje'a sb'aj tiw ja Dyos b'a jun yal ib'e k'i'ix wa'n ajlel. Jaxa Moisesi jel cham sk'ujol yuj ja wax yila mix tsik ja yal ib'e k'i'ix jawi. 3Ti yala'a: —Jastal ay ja iti. —Oj och kil jasyuj ja mix tsik ja k'i'ix jawi.

4Yajni yila ja Dyos wa'n mojxel ja Moisesi, ti sk'umana:

—K'otan tek'an Moises.

Ti yala ja Moisesi:

—Jasunk'a, Kajwal.

5Ti alji yab' yuj ja Dyosi:

—Mokxa ochan och mojan. —Sopo ja wa xanab'i, yuj ja ti'xa aya mojan b'a stij sat. 6Ke'n Dyoson yuj ja ma ek' paxta a wujili, ja Abrahami, ja Isaak sok ja Jacobi.

Yajni yab' ja jas alji yab' ja Moisesi, mixa b'ob' sk'el ja Dyosi, smaka ja sati. 7-9Ti och aljuk yab' yuj ja Dyosi.

—Ja ke'n wax na'a lek jel wa'ne yi'jel wokol ja kuntikil israelenio, yuj ja lom a'tijum aye sok ja egipsiano jumasa. Cho jmaklanta jastal wa'ne awanel, wa sk'anawe oj koltaye, kilata jastal jel wax ixtalajiye yuj ja ma'tik wax k'el jiye yuji. Ja'yuj jakyon b'a oj ka eluke ja b'a sk'ab' ja ixtalanum jumasa. Ti oj ki'e b'a jun niwan jaman k'inal; —Sok b'a jel ja jastik jumasa; —Yuj ja jel wax ajyi ja jastik junuk jumasa jayuj mix ch'ak ja jas wax yabye'i. Ja b'a wa'non yaljeli, ja chonab' Canaani, yuj ja kristyano jumasa ma' ti aye tiwi, mi ni wa sk'u'anone'a. 10Ja'yuj chapa a b'aj, oj jek a b'a oj waj ja k'umuk ja mandaranum b'a Egipto, b'a oj wa' elki ja kuntikil jumasa b'a chonab' jawi.

11Ti yala ja Moisesi:

—¿Machun kilukon ja ke'n, ja oj wajkon b'a sti' sat ja ye'n, b'a oj waj kal yab': Oj ka eluk ja israelenio jumasa ja ili?

12Ti alji yab' yuj ja Dyosi:

—Moises, ja ke'n spetsanil k'ak'u ti oj ajyukona moka—. B'a ti' oj ja na' yuj ke'n wax jekawa oj je' a wi jun senya: Yajnix ch'ak eluk a wuj spetsanil ja israelenio jumasa, apetsanilex ja we'nlexi lajan ti oj jak a toy'onex ili.

13Ti yala ja Moisesi:

—Jaxa ta lek la wajyoni, oj kal yab' ja israelenio jumasa, —Ja Dyos kujtiki, cho ja'ni Dyos yuj ja Abrahami, ja Isaak sok ja Jacobi, sjekawon b'a oj ka elanik ja ili Jaxa ta lek sjob'owe ki': Ala kab'tikon ja sb'i'il, tax chiye k'a b'a ¿Jasunk'a oj kal yabye'i?

14-16Ti yala ja Dyosi.:

—Ala yabye, ke'non ja Dyos it mini oj ch'akuki, jaxa jb'i'ili, —Ke'nani, ja ma' ti'ni ayi, sok ke'nani'a. Ala yabye spetsanile ke'n Dyoson yujile ja Abrahami, ja Isaac sok ja Jacob ma ek' paxta a wujilexi, utaje'.

—Ja'yuj ka'ax b'a Egipto, kax tsomo ja ma'tik ay xa sk'ujole yuj ja israelenio jumasa. Ala yabye sje'ata sb'a a wi' ja Dyosi, sok wax na'a lek ja wokol wa'n ek'el yujile b'a Egipto. 17Ala yabye oj ka eluke ja jastal a'tijum aye b'a Egipto, ti oj ki'e och b'a chonab' Canaan, ja kristyano jumasa ma' tey tiwi, mi wa sk'u'anone, —Jun lu'um b'a jel lek, sok jex b'a'alani—.

18—Wax na'a ja ma'tik ay xa sk'ujoli, oj skis aj, ja'yuj ja we'n sok ja ye'nle'i, lajan oj wajanik ja b'ay ja mandaranum b'a Egipto, ti oj ja wal'ex yab'a: Ja Dyos kujtikoni jakta sta'otikon. Ja'yuj wax k'anatikon a wi niwan ajwalal, jekawotikon b'a takin lu'um k'inal oj waj toytikon ja sb'i'il ja Dyos kujtikoni, a'nima oj yi' kujtikon oxe k'ak'u ja oj k'otkotikon b'a lu'um jawi, yujni ti oj toytikon tiw ja sb'i'il ja Dyos kujtikona.

19—Ja ke'n wanix na'a mi oj sjek ex ja mandaranumi, ja yuj ke'n oj t'en a sjek ex. 20Oj je'yi ja kipi, oj k'u'lyi jitsan kistal jastik jumasa, sok ja jawi, jel jitsan oj chamuke ja egipsiano jumasa. Yuj ja jaw jumasa oj ya elanik. 21Jaxa egipsiano jumasa ke'n oj ka sk'eb' a wi'ex jitsan jastik junuk, b'a mi jach' telan a k'abex oj elanik ja b'a Egipto. 22Spetsanil ja ixuke israelenia, a wajuke b'a snaj ja ixuke egipsiana, a waj sk'an'e chikan jas tik'e tak'inil b'a ay yi'oj sakal tak'in, b'a ay yi'oj k'anal tak'in, a sk'an'e' sk'u' sjuna'e', sk'u' swex ja yal untiki. B'a jach' oj ch'ak a'xi elyi'e ja jas yi'oje ja egipsiano jumasa.

Currently Selected:

Exodo 3: YABD

Highlight

Copy