Exodo 20

Ja lajune mandari

1Ja Dyosi, yala yab' ja israelenio jumasa:

2—Ke'n Dyos yuj ja israelenio jumasa. Ke'n ka eluke b'a Egipto b'a baldiyo aye ajyi.

3—Mok a le'ex tuk dyos yuj ja ke'n.

4—Mok a wal'ex dyosuk ja jas waxa wilawex k'u'lunej b'a nalan cha'an sok b'a lu'umi, sok mini ja jas tey b'a scha'anil ja ja'i. 5Mok ko'anik mek'an ja b'a sti' sati, mok a toy'ex. Ke'n ja Dyos yuj ja israelenio jumasa, jun Dyos wala tajkiyon. Ja ma' mi skisawoni, wax ka stup' e, ja untikali, ja ijali, sok ja yuntikil ja ijal jumasa ma mi skisawoni, 6jel wax talna sya'ujlal spetsanil ja yintil jumasa ja ma was yajtayon sok ja ma wa sk'u'an ja k'ab'ali.

7—Mok a ta'ex ti' lom ja jb'i'ili, ja ma oj sta ti lomi, oj ni ka stupa.

8—Na'awik ja sk'ak'u'il jijleli,#20:8 Ja k'ak'u jijlel wax yala: Ja k'ak'u Sabado. jun k'ak'u mi tukuk, jb'aj ni ke'na'a. 9Snajtil ja wake k'ak'u b'a yoj semana, oj b'ob' a'tijananik ja janek' xa k'anawexi, 10Jaxa b'a sjukili, sk'ak'u'il jijlel ke'n oj ja toy'onex yuj ja mi tukuk ja k'ak'u jawi. Ja k'ak'u jawi mi ma oj b'ob' a'tijuk: mini ja we'nlexi, mini ja keremtiki, mini ja ak'ixuki, mini wa wa'tijumexi, mini wa wa'tijum ixuki, mini wa chante'exi, mini ja ma polestero wa'n a'tel a mokexi. 11Ja ke'n, b'a yojol wake k'ak'u ch'ak jk'u'luk ja satk'inali, ja lu'umi, ja mari, sok spetsanil ja jas waxa wilawexi. Jaxa b'a sjukil k'ak'u jijliyon. Jel niwan kila ja k'ak'u jawi, cho kala mi tukuk ja k'ak'u jawi.

12—Yajta sok talna wa nan a tati. B'a jachuk oj ajyuk a sak'anil jitsan k'ak'u ja b'a lu'um oj ka'wi'i.

13—Mok milwananik.

14—Mok a ta'a b'a sok tuktukil ixuk.

15—Mok elk'ananik.

16—Mok a ta'ex ti b'a mi sb'ejuk pilan a mojex mok cho a le'ex yi ab'al yuj mi lek wax ilji.

17—Mok ok'uk a k'ujol ja jas yi'oj ja wa moji, mini ja sche'umi, mini ja ya'tijumi, mini ja swakaxi, mini ja sburro'i, sok mini spetsanil ja jastik sb'aji, jach' ch'ak yal ja Dyosi.

Ja israelenio wa xiwye yuj ja Dyosi

18Ja israelenio jumasa jel xiwye ja yajni yabye jastal wax b'ojti ja chawuki, ja jastal wax lijpi ja tsansewali, sok ja yok'el ja korneta, jaxa tab'i smusu'el ja yaxk'uli, jaxa ye'nle'i, ch'ak eluke el najat ja tiwi. 19Ti waj yal'e yab' ja Moisesi:

—Ja lek k'umanotikon we'na. Ala kab'tikon we'n jasunk'a oj k'u'ltikoni, oj ni jk'u'utikona. Ta ye'n k'a oj sk'umukotikon ja Dyosi, oj b'ob' chamkotikon, —xchiye ja kristyano jumasa.

20Ti yala ja Moisesi:

—Mi lom la xiwyex. Ja Dyosi, kechan wa yilawex ta meran waxa k'u'anexi, lek ni oj ek'uk a wujilexa, —xchi ja Moisesi.

21Jachuk ja kristyano'i, mini t'un ochye mojana, najat ajyiye sok ja swits ja Dyosi. Kechan ye'n och ja Moises ja b'a yoj pimil ason ja b'ay ja Dyosi.

Ja yaltar ja Dyosi

22Ti alji yab' ja Moises yuj ja Dyos a ya sna' jastal it ja israelenio jumasa:

—Ja we'nlexi, a wilawexta jastal jk'umanex kon man b'a satk'inal, —xchi ja Dyosi.

23—Mok a k'u'lukex dyos sok k'anal tak'in ma sakal tak'in, mok a toy'ex ja jastal waxa toyowonex ja ke'n.

24—Ta oj k'a a k'u'lukex jun altar b'a oj ja toy'onex k'u'lanik sok lu'um, ti'xa wa'wex k'e kajan tiw ja wakax ma chej b'a waxa k'ana oj wa'wex ki b'a jmajtani. Ti'xa wa'wex kajan tiw ja jmajtan b'a oj ch'ayi ja smul ja kristyano jumasa, sok ja jmajtan b'a waxa je'awex laman ayex jmok ja ke'n sok ja tuk jumasa. Chikan b'a waxa k'anawexa ja ke'n oj jakon ja b'a oj ja wil'onex niwani, sok oj kal a wabyex jel lek oj ajyanik.

25—Ta oj ja k'u'lukex jun altar sok ton, mok a poj ex sok tak'in, ja lek awik makunuk ja jastal ni ayi. Ta yuj k'a a k'utsuwex sok jun tak'in mixa ojto makunuk sb'a jun altar. 26Mok a wa'ex kan sb'atulab'il, b'a mi oj ja je' wa wokex ja b'a mey sk'ujtsil ja yajni la k'e'yexi.

Currently Selected:

Exodo 20: YABD

Highlight

Copy