Exodo 19

Ja trato b'a Sinaiji

(19:1—40:38)

Ja israelenio k'otye b'a Sinai

1-2Elye ja israelenio b'a Refidimi, ti wajye b'a takin lu'um k'inal b'a Sinai, ti sk'u'lan ja snaje b'a yib' wits. Ja k'otye ja tiwi, oxe ixaw elele ja b'a Egipto.

3Jun k'ak'u ja Moisesi, ti k'e b'a wits Sinai waj sk'umuk ja Dyosi. Yajni kajpuji k'ot b'a jel cha'ani, ti payji yuj ja Dyosi, ti alji yab'a:

—Ala yabye jastal it ja israelenio jumasa: 4Ja we'nlexi, a wilawex jastal ka'yi'e wokol ja egipsiano jumasa. Cho jach'ni a wilawex jastal talnanub'al lek ki'ajex jan man julyex ja b'ayoni. Jach' jtalnayex jan jastal wa stalna ja yuntikil ja liklik, ja yajni ti yi'oj jan b'a swech' wa'n jujpeli.

5—Ja we'nlexi, yuj k'a oj ja k'u'ukex ja kab'ali, oj k'a cho a k'u'lukex meran ja jas sb'ej we'n oj ja k'u'lukexi, we'n kuntikilex b'a spetsanil ja winik ixuk b'a lu'umi. Jb'aj ni ke'n spetsanil ja lu'uma. 6We'n oj ochanik pagre'il b'a spetsanil ja kristyano'i, oj ja pil a b'ajex ja b'a yoj kistal, kechan ke'n oj ja wa'teltayanonex.

7Ja Moisesi, stsomo ja ma'tik ay ya'tel yuj ja kristyano'i, ti och yal spetsanil ja jas alji yab' yuj ja Dyosi. 8-9Jaxa kristyano'i ti yalawe yab' ja Moisesi: —Oj k'u'ltikon spetsanil ja jas wax yala ja Dyosi.

Jaxa Moisesi, ti yala yab' ja Dyos ja jas yalawe ja kristyano'i, jaxa Dyosi, ti yala'a:

—K'elawile, ja ke'n ti oj k'umuka b'a jun nole k'ik'il ason. B'a jach' oj smaklaye ja kristyano jumasa ja jas oj kal a wab'i, sok jach' oj kisjan lek ja we'n.

10-11—Ka'ax ka xchapa ja kristyano, b'a oj stoy'one ja ya'n sok ja jecheli. Ala yabye a schuk' e' lek ja jastik wa slapawe'i, b'a jach' oj sje' sb'aje jmok, a cho schap sb'aje b'a oj stoy'one' ja chab'eji, ja k'ak'u jawi, oj je' jb'aj yi'e b'a wits Sinaiji.

12-13—A' senya sjoyanal ja witsi, al yab' ja kristyano mok k'e'uke b'a sjoyanal ja witsi. Chikan ma oj k'e'uki ch'ojob'al ton oj chamuke a'nima kristyano ma chante. Kechan oj b'ob' k'e'uke ja yajnix ch'ak ok'uk ja korneta.

14Ti'xa waj ja Moisesi, waj schap ja kristyano jumasa b'a oj stoy'e' ja Dyosi, jaxa ye'nle'i, schuk'uwe lek ja jastik oj slap'e'i. 15Ti cho yala ja Moisesi: —Cho chapa a b'ajik ja chab'eji oj cho a toy'ex ja Dyosi. Ja'yuj mok a ta'a b'aj sok ja wa che'umexi.

16Yajni sakb'i ja yoxil k'ak'u, wa'nxta b'otoljuk ja b'a satk'inali, sok wa'nxta lipiljuk; jaxa b'a yaxk'uli, tey jun nole k'ik'il ason, wax ab'xi jun tsatsal yok'el korneta. —Jaxa kristyano ma'tik tey b'a na'its k'u'lub'al sok k'u'utsi, wa'nxta k'ik'unuke yuj ja xiweli.

17Ja'yuj ja Moisesi, ch'ak ya eluk ja kristyano jumasa ja b'a'ye'i, ti yi'aj och b'a yib' wits Sinai, b'a ti oj sta' sb'aje sok tiw ja Dyosi. 18Ja Dyosi, jach' ko' ja b'a wits jastal k'ak' ja'yuj b'ut' tab' ja witsi, —Lajan sok jastal jun orno. Ja k'ak'u jawi, tsats lek xnilili ja witsi, 19jaxa yok'el ja korneta jel tsats wax ab'xi. Ja wa'n lo'il ja Moises sok ja Dyosi, jaxa Dyosi, kechan wa xb'ojti ja wa sjak'ayi ja slo'il ja Moisesi.

20Ja Dyosi, ko jan kusan, ti yala yab' ja Moises a k'ek'e'e, yajni k'e'k'ot ja Moisesi, 21ti yala ja Dyosi:

—Ko'an ala yab' ja kristyano mok k'e'uke, mok sneb'e oj yil'one. Kechan ta mi oj sk'u'uke jel jitsan oj chamuke. 22Jach'ni ja pagre jumasa ma' oj och mojan jmoki, t'ilan oj schap lek sb'aje, ta wan k'a sk'ana oj ochuke mojan jmoki, kechan ta mik'a ojni chamuke'a.

23Ti yala ja Moisesi:

—Mok sneb'e ja kristyano oj k'e'uk b'a witsi, ja we'n a walata mok sk'u'luke. A wala oj ka'tikon och senya sjoyanal, yujni kechan a b'aja we'na'a.

24Ti yala ja Dyosi:

Ko'anxa ja b'a witsi, yajni oj cho jakani kechan ye'n oj b'ob' jakan sok ja Aaroni. Mi ma' oj k'e' jan pilan ja ili, mini ja pagre jumasa, ta yuj k'a oj k'e'uke'i, ojni chamuke'a.

25Yajni ko'jan ja Moises ja b'a witsi, ti ch'ak yal yab' spetsanil ja israelenio jumasa, ja jas alji yab' yuj ja Dyosi.

Currently Selected:

Exodo 19: YABD

Highlight

Copy