Deuteronomio 9
9
Ja Dyosi, wa skolta ja yuntikili
1Ti' cho yala ja Moisesi:
—Israelenio jumasa, maklayik lek ja jas oj kal a wabyexi. Ojxa ek' a k'utsex ja niwan ja' Jordani, oj ch'ak a nutsex el spetsanil ja ma' tey tiwi. Ja kristyano jumasa jawi, Jel a'aye ja ye'nle yuj ja we'nlexi, sok jel tsatse, niwak chonab' yi'oje, sok cha'an lek ja sts'akab'il makan soki. 2Tey soke ja yintil jumasa ja cha'anil winik Anaki, wax yalawe mini ma oj b'ob' yuj moktik. 3Jaxa we'nlexi, wanixa na'awex ye'nani b'ajtan ay ja Dyos kujtika. Ja yipi jach' jastal jun k'ak' oj ni tsikwanuka, sok ja ye'n ojni b'ob' yuja ch'in oj yil ja niwak winik jumasa. Jaxa we'nlexi sok ja yip ja Dyosi, we'nani oj b'ob' a wujilex sok ja kristyano jumasa ja wa, oj ch'ak a nutsex el ja b'aye'i, yuj ja jach'ni yalunej ja Dyosa.
4-5—Ja Dyosi, yajni ch'akta snuts el ja kristyano jumasa ma' tey b'a chonab' jawi, jaxa yajni ti'xa ayex b'a yojol ja we'nlexi, mok a na'ex ja'yuj we'n ya'wi'ex ja Dyos ja lu'um jaw yuj ja jel lekexi, ja Dyosi, oj snuts el ja kristyano jumasa jawi, ja'yuj ja mi lekuk ja jas k'u'lane'i, jach' sk'u'lan ja Dyosi, yuj ja jach' yaloj yabye ja Abrahami, ja Isaaki sok ja Jacob ma ek' paxta kujtiki. 6Ay jun jastik junuk jel t'ilan oj a na'ex: Yuj ja wa xya' wi'ex ja Dyos ja lekil lu'um jawi, mi ja'uk yuj ja jel lekexi, ja smeranili a petsanilex jel ch'u'uy ja wa k'ujolexi.
Ja jastal mi sk'u'ane ja israelenio
7-8—Mok ch'ayuk a k'ujolex ja iti: Man yajni teyex b'a takin lu'um k'inali, sok ja yajni ti ayex b'a wits Horebi, a wa'wex ni tajkuk ja Dyosi, jaxa ye'n ek' k'ujol oj sch'ay a na'jelex. 9Ti'xa k'eyon b'a wits ja ke'na, waj ki' ja laja ton b'a sts'ijb'an ja jas chapxi sk'u'lan a mokexi. Chab' tajb'e (40) k'ak'u sok chab' tajb'e (40) a'kwal ti ajyiyon tiwi, mini jas kab'a sok mini t'un ja' ku'aj ja.
10-11—Ja k'ak'u jawi ye'n ya'ki ja Dyos ja yab'al jumasa sts'ijb'an b'a laja toni, ja b'ajtani jach'ni yala ja yajni k'umani b'a yoj k'ak'a, yalani we'n oj ka'wi'ex ja yab'al jumasa ja wa. 12Ti yala kab'a: ja yan Ko'an jan ja b'a witsi, yuj ja kristyano jumasa it wa eluke b'a Egipto wa'ne sk'okjel ja kab'ali; —Jel juts'in wa'ne sje'jel mi wa sk'u'anone. Stojb'eseta jun dyos yujile b'a oj stoy'e. 13Ja juts'in jna'ata lek ja kristyano jumasa jawi jel ni ch'u'uy ye'a. 14—Aktaye kani ja lek oj ch'ay sna'jele, b'a jach' mixa ma ojto na'juke yuj ja. Jaxa we'n oj ka' b'a jel niwan ja wa wa'tel b'a jun k'ole kristyano jumasa b'a jel tsats sok jel a'ay.
15—Jaxa ke'n ti ko'yon kon ja b'a wits jawi, ti yaman kon kuj ja chab' laja ton b'a ts'ijb'anub'al ja jas schapa ja Dyosi. Yajni ko'yon jul b'a yib' witsi, ti kila ja syax k'ul ja Dyosi, cha'an lek wa'n k'e'el ja yajlel ja k'ak'i. 16Yajni k'otyon ja b'ayexi, ti kila jastal a ta'ata a mulex b'a sti' sat ja Dyosi: Tojb'elxa jun dyos k'u'lub'al jastal ja yiljel jun wakax, sok wa'nex stoyjel.
—Mini t'un alb'iyex sok ja Dyosi, ti'xta a k'okowex ja yab'ali. 17Jel a wa'wex tajkukon ja'yuj schab'il ja laja toni jipa b'a lu'um, b'a sti' a sat we'nlex ti a wilawex xenti yaman xta kani. 18-29Tsa'an cho ki'aj ja wa dyosex it ak'u'lanexi, jtsika ele, jaxa sta'anili, ti jtika b'a uk'um it ay ya'lel wa xjak b'a witsi.
—Ja yuj ja wa mulexi, jel yaj kab'i sok jel ya' cham k'ujol, b'a miyuka jel a wa'wex tajkuk ja Dyosi. Ja'yuj, ti ko'yon mek'an b'a sti' sat ja ye'n, b'a yojol chab' tajb'e (40) k'ak'u sok chab' tajb'e (40) a'kwal mi wa'yon sok mi jas ja' ku'aj. Ja Dyosi, jelni tajkel a mokex sok ja Aarona, yala ojni sch'ay a na'jelexa.
—Jel xiwyon k'e jk'umuk ja Dyos ja ke'n, ti kala yab'a: Dyos kuj, mok a ch'ay sna'jel ja kristyano jumasa iti, sok spetsanil a wip wa eluke b'a Egipto. A wuntikil we'na. Na'a t'unuk ja Abrahami, ja Isaak sok ja Jacobi, jel ni toj ajyiye a moka, sok sk'u'ane spetsanil ja jas a wala yabye'i. Ch'aya a k'ujol ja jastal jel ch'u'uy ja sk'ujole ja kristyano jumasa iti; ch'aya a k'ujol ja smule sok ja skistalile'i. Ta yuj k'a a ch'aya sna'jele, oj b'ob' sna'e ja tuk kristyano jumasa, yuj mi b'ob' a wuj, b'a oj a wi'e och ja b'a lu'um it a k'apa yi'e'i. Oj cho sna'e yuj mixa k'anawe meran, kechan ch'ak a wi'e och b'a wits b'a oj ch'ak waj a mil'e kan spetsanile'. Ja kristyano jumasa jawi a wuntikil we'na; ja' wa wuntikil it sok spetsanil a wip wa eluk b'a Egipto.
—Pilan mak'e smaklan ja jas kala yab' ja Dyosi, mini ja sk'u'lan a wi'exa. Mi kechanuk ja k'ak'u'il jaw ja a wa'wex tajkuk ja Dyosi. Cho a wa'wex tajkuk ja b'a Taberaji, b'a Masa sok b'a Quibrot-hataava. Cho jach'ni ja yajni ti ayex b'a Cades-barnea, yala wabyex ja Dyos oj waj a wi'ex kan ja lu'um wa'n skapjeli, jaxa we'nlexi mi a wilawex st'ilanil ja jas yala, sok mi a k'u'anex. —Ja k'ak'u jna'a a b'ajexi yujni jach' jel ch'u'uyexa, sok yujni jel k'ajyel waxa k'okowex ja ab'ala, —xchi ja Moisesi.
Currently Selected:
Deuteronomio 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
