Deuteronomio 10
10
Ja Dyosi, cho sts'ijb'a yajk'achil ek'ele' ja chab' laja ton b'a trato
1Ja Moisesi, ti yala'a:
—Ti cho yala kab' ja Dyosi: Le'a chab' laja ton b'a oj slaj ja jastal it ka'wi b'ajtani, cho k'u'lan jun skajonil sok te'. Tsa'an k'e'an ja b'a witsi b'a oj ja k'umukon. 2Ti oj cho jts'ijb'an a wi' tiw pilan mak'e ja ab'al jumasa, jach'ni jastal it tojb'el xa kuj ajyi' it ch'ak a b'uy eli. Yajni xtojb'i kuji ti xwa' och b'a skajonil it oj ja tojb'esi.
3—Ja ke'n jtojb'es, jan jun skajonil sok te' acasia, xchapa ja chab' laja ton ti k'iak'e b'a witsa. 4Ja Dyosi, ti sts'ijb'an tiw ja lajune yab'ali, ya'ki b'a jk'ab' ja jastal ni sk'u'lan ja b'ajtani, yajni tsomo b'ajtiki ti sk'umanex kon b'a jun k'ak'. 5Yajni ko'yon jan b'a witsi, ti ka och kon b'a yoj skajonil ja chab' laja toni, yuj ja jach' yaloj kab' ja Dyosi. Ja chab' laja ton iti, yujni ti oj ajyuk b'a yoj skajonil spetsanil k'ak'u'a.
Cham ja Aaroni
6—Ti'xa elye ja israelenio jumasa b'a Beerot-bene-jaacani, ti wajye b'a stojol Mosera. Ja Aaroni ti cham tiwi, sok ti smukuwe tiwi, jaxa Eliazar ye'n yi'a kan ja ya'tel ja pagre ajyi, ja ni ya'tel ajyi ja stati. 7Cho eltikon b'a Moseraji, ti ek'tikon b'a Gudgoda wajtikon man b'a Jotbata, jun lu'um b'a jel ja uk'um jumasa b'a ay ya'leli.
8—Jaxa Dyosi, ti tsa'a tiw ja k'ole jumasa sb'a Levi, b'a oj yi'e' och ja skajonil strato ja Dyosi. Jachuk ja ye'nle'i och ya'tele jastal pagre'il b'a oj a'tijuke ja b'a tsomjel jumasa, sok b'a oj sk'u'luke yi lek ja kristyano jumasa b'a sb'i'il ja Dyosi. Man ya'n jach' wa'ne a'tel ja ye'nle'i, 9ja'yuj ja ye'nle'i, mini xe'n lu'um yi'aje ja jastal a wi'ajex ja we'nlexi, yuj ja kechan ja' oj ya'tel ta'uke ja Dyosi.
Ja Dyosi mi ya stup jas mul ja israelenio
10—Ja ke'n, chab' tajb'e (40) k'ak'u sok chab' tajb'e (40) a'kwal ti ajyiyon b'a wits Horeb ja jastal ja sb'ajtanili. Ti wa'non sk'umajel tiw ja Dyos b'a mi oj sch'ay a na'jelex, smaklayoni'a, mini sch'aya a na'jelexa. 11Jasa mi jach wa jastal jawi yala kab'i ke oj b'i chap mas b'a oj je' a wi'ex jastal oj ja wi'ex kan ja lu'um it alji yabyi'e ja ma ek' paxta a wujilexi.
Ja jas wa sk'ana ja Dyos oj sk'u'l ja israelenio
12—Israelenio jumasa, ¿Jasun wa sk'ana a wi'ex ja Dyos oj ja k'u'lukexi? Kechan wa sk'ana oj ja kis'ex, oj ja k'u'ukex ja yab'ali, oj ja yajtayex, oj ja toy'ex sok spetsanil wa k'ujolexi. 13Ja Dyosi, wa sk'ana oj ja ku'ukex spetsanil ja yab'al jumasa, b'a jach' lek oj ek'uk a wujilexa.
14—Ja jTatik Dyosi, sb'aj ye'n ja satk'inali, ja lu'umi, sok spetsanil ja jas wax ilxi. 15Ja ye'n, b'ob' stsa' chikan ma kristyano jumasa ja b'a lu'umi, ja' stsa'a ja ma ek' paxta a wujilex yuj jel yajtaji yuji, cho sta'awex ja we'nlexi, ja yuj man ya'n oj ochanik yuntikil. 16Mok jel wa ch'u'uy b'uk wa k'ujolexi, mok ch'ayuk a k'ujolex ja jas a chapawex sok ja Dyosi. 17Kechan ye'n Dyos jel niwan yuj ja tuk dyos jumasa, jach'ni kechan ye'n jel niwan ja yab'ali yuj ja tuk mandaranum jumasa b'a tuktukil niwak chonab'i. Ja yipi wax ya nijkuk b'a spetsanil ja slechanal ja lu'um k'inali. Ja yajni wax yala ay jas oj sk'u'luki toj lek yujni oj sk'u'luka, mi ni ma oj yi yab'ala.
18—Ja Dyosi, jel lek sk'ujol sok ja meb'a jumasa, cho jach'ni sok ja viwuda jumasa, wa sje'a ja syajal sk'ujoli, wax ya'yi sk'u', wax cho ya'yi swa'el ja ma' majan ay b'a wa najexi. 19Ja'yuj jachuk ja we'nlexi, je'awik ja syajal wa k'ujolex sok ja ma ula ay a mokexi, yuj ja cho jach' ula ajyiyex ja we'nlex b'a Egipto.
20—K'u'anik ja Dyosi, kechan ye'n toyowik. Mok a toy'ex pilan dyos. Ta ay k'a jas waxa k'ana oj ja wal'ex, ja' xa ta'awex ti ja sb'i'il ja Dyosi. 21Ja we'nlexi, a wilawex ja senya jumasa sk'u'lan a wi'ex ja Dyosi, ja'yuj spetsanil k'ak'u toyowik ja ye'n. 22Mok ch'ayuk a k'ujolex ja ma ek' paxta a wujilexi, kechan ox tajb'e sok lajune (70) kristyano jumasa k'otye b'a Egipto. Jaxa Dyosi ya pojxuk ja kristyano jumasa jawi, ja ya'n jel wokol wax b'ob' ajtab'axuk.
Currently Selected:
Deuteronomio 10: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
