Deuteronomio 8
8
Ja Dyosi, wa stalnan ja yuntikili
1Ti cho yala ja Moisesi:
—Na'awik lek jel t'ilan oj ch'ak a k'u'ukex spetsanil ja yab'al jumasa b'a oj ka' wi'ex ja ya'n, b'a jach' oj b'ob' ajyanik ja b'a lu'um k'apji yi'e ja ma' ek' paxta a wujilexi. Ta yuj k'a a k'u'anex, oj ja b'ajukex ja lu'um jawi, sok jel oj ajyuk ja wa wuntikilexi.
2—Mok ch'ayuk a k'ujolex ja jastal ayex ja yajni elyex jan b'a Egipto man julyex ja ili. Yojol ja chab' tajb'e (40) jab'ili, jelni ya'wi'ex wokol ja Dyosa, b'a oj yil ta toj ayexi, cho jani b'a oj yil ta chapan ayex b'a oj a k'u'ukexi. 3Ya'ni a tek' ex wa'ina, jaxa wa wa'elexi ti ko' jan b'a satk'inal, jun wa'el b'a mixa na'awex sb'aj sok mini ja ma ek' paxta a wujilexi. Sok ja jawi ja b'a sje'a a wi'ex ja Dyos a'nima mey lek ja wa wa'elexi, jayuj ojni a k'u'ukex ja jas yaluneji, b'a oj ajyuk ja wa sak'anilexa. 4B'a yojol ja Chab' tajb'e (40) jab'il b'ejyiyexi; mi poko'axi ja wa k'u'exi, cho mini wa wokexi mi sits'i.
5—Yuj ja ye'n stojowex ja Dyosi, yuj jel wa syajtayex jastal jun tatal sok ja yal yunini. 6Ja'yuj, k'anawik lek, sok k'u'anik spetsanil ja yab'al jumasa.
7—K'elawilex, ja lu'um oj ya'wi'ex ja Dyosi, jel lek cho jel ja uk'um b'a ay ya'leli, ay niwak yok ja', ja b'a loman yaman jumasa sok b'a yax k'uli, jel ja b'ojtum ja'i. 8Ja b'a lu'um jawi, wax ajyi trigo, sebada, higo, ts'usub', granada, aceituna, ja aceite sok jitsan ya'lel chab'. 9Ja tiwi, mi oj ch'akuk ja jas oj ja wabyexi, mini jas mi' oj ajyuk a wujilexa. Ja b'a yax k'uli, oj ja wa'wex el kobre, jaxa b'a ton jumasa oj ja wawex eluk jun tik'e tak'in. 10Yajni xch'ak wa'aniki, b'ut'el wala kanyex, a'wikyi ts'akatal ja Dyos yuj ja lekil lu'um ya' wi'exi.
Mok ch'ay a k'ujol wa Dyosi
11—Mok a ch'ay a k'ujolex ja Dyosi, k'u'anik spetsanil ja yab'al jumasa b'a oj ka'wi'ex ja ya'n. 12-14Mi wokoluk oj ch'ay jk'ujoltik ja Dyos ja yajni lek wajum petsanil ja jastik jumasa, ja yajni b'ut'elotik sok mi jas meyuk kujtik, ja yajni ay ki'ojtik jun tsamal na'its sok jel ja jwakaxtiki, ja yajni ay ki'ojtik jitsan k'anal tak'in, sakal tak'in. Ja kristyano jumasa ma jel ja jastik sb'aji jel niwan xya'a sb'aj sok mi wokoluk wa sch'aya sk'ujol ja Dyosi. Ja'yuj, —Talna lek a b'ajex. B'a mi oj ch'ay a k'ujolex ja jastal ya elanik ja Dyos b'a Egipto yu ja yib k'ab'al ni ayex ajyi'a, 15sje'a a wi'ex ja b'a niwan takin lu'um k'inal b'a it jel ja b'its'il chan jumasa wax milwani, tsek. Mok ch'ayuk a k'ujolex ja jastal ya eluk a wi'ex ja' b'a patak' ja yajni wa'nex chamel takin ti' ja it mi jas a wi'ojex b'a oj ja wu'exi. 16Mok ch'ayuk a k'ujolex ja yajni ya wa'anik b'a yoj witsi, jaxa wa'el jawi ti'ni jak b'a satk'inala, jun wa'el b'a mi sna'awe sb'aj ja ma ek' paxta a wujilexi.
—Na'awik lek ja jastik ch'ak sk'u'luk a wi'ex ja Dyosi, yuj ja jani b'a wa lekilalexa. 17Ta yuj k'a waj ch'ayuk a k'ujolex ja it jumasa, oj b'ob' a na'ex yujni we'n a b'ajexa. 18Ja lek neb'awik ye'nani ch'ak ya' wi'ex spetsanil ja Dyosi, jach' sk'u'lan yuj ja jach' yaloj yab' ja ma ek' paxta kujtiki.
19—Ja ke'n oj kal a wabyex ja smeranili, ta yuj k'a waj a ch'ay a k'ujolex ja Dyosi, ojni ch'ak ch'ay a na'jelexa. 20Ta yuj k'a mixa k'u'anexi, ja Dyosi ojni ch'ak smil'ex ja jastal smila ja kristyano jumasa ma' wa sk'ana oj smil'ex ajyi ja we'nlexi.
Currently Selected:
Deuteronomio 8: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
