Deuteronomio 7

Julb'esel

1Ti' cho yala ja Moisesi:

—Ja Dyos kujtiki, ojxa ya' b'a a k'ab'ex ja lu'um it oj ya'wi'exi. Oj ya el juk k'ole ja kristyano'i, ja ye'nle'i a'aye lek, sok ek'el ja yip ja ye'nle yuj ja we'nlexi: Ja k'ole jumasa jawi, Ja it jumasa: Ja hitita, ja gergeseo, ja amorreo, ja cananeo, ja ferezeo, ja heveo, sok ja jebuseo jumasa. 2Yajnix ya' b'a a ka'b'ex ja Dyos ja kristyano jumasa jawi, mok a talnayex sya'ujlale' mok jas a laj'ex soke; —Ch'ayawik sna'jele spetsanile. 3Ja kristyano jumasa jawi, mok a wa'wex nupanuk sok ja wa wuntikilexi, mini ak'ix sok mini kerem. 4Mi yuj smul ye'nle ti oj waj stoy'e pilan dyos ja wa wuntikilexi, ti oj ya'e kan sk'u'ajel ja Dyos kujtiki, ta jach' k'a waj ek'uki, jel oj tajkuk a mokex ja Dyosi, juts'in oj sch'ay a na'jelex.

5—Ja oj ja k'u'lukex ja we'nlexi, jomowik el ja yaltar ja kristyano jumasa jawi, tsikawik el ja sk'u'lub'al dyos wa stoyowe'i, sok ja sretrato'il ja Astarte.

Ja kristyano jumasa tsa'ub'al yuj ja Dyosi

6—Ja we'nlexi jun nole tsa'ub'al, b'a spetsanil b'a slechanal ja lu'um k'inali, ti stsa'awex tiw ja Dyos b'a jach ti oj ochanik yuntikil b'a jel sk'anawex. 7Yuj ja we'n sk'anawex ja Dyosi, mi ja'uk yu ja jel xa na'awexi, spakaxil, ja we'nlexi mini jas la makoniyex jana. 8Ja sb'ej ja ya' elanik ja Dyos ja yajni yib k'ab'al ayex ajyi b'a Egipto, yujni jel sk'anawexa. Sok spetsanil yip xch'aya el sna'jel ja ma ay xchol b'a Egipto, ja jastal yaloj yab' ja ma ek' paxta kujtiki, jach'ni sk'u'lana.

9—Ja'yuj ja we'nlexi, jel t'ilan oj ja na'ex sb'aj ja Dyos kujtiki, ye'nani ja Dyos smeranila. Ja jas chapa ja Dyos sok ja yintil jumasa ja ma wax yajtaji yuji, yujni wa sk'u'an meran ja ab'al jumasa'a. 10Jaxa ma mix k'u'aji yuji, mi wokoluk oj sch'ay sna'jel. 11Ja'yuj jel lek k'u'anik spetsanil ja ab'al jumasa.

Ja ma' wa sk'u'ani jel lek wa x'ek' yujil

12—Yuj k'a spetsanil k'ak'u waxa k'u'anex ja ab'al jumasa iti, jach'ni ja Dyosi, ojni cho sk'u'luk ja jas chapa sok ja ma ek' paxta kujtiki. 13Taxa k'u'anex meran ja yab'al ja Dyosi, jelni lek oj yil'exa, oj syajtayex, oj ya pojxanik lek. Ja yuntikil wa wuntikilexi jel lek oj ek' yujile, jel oj a'juk yi'e ja swa'ele'i, jach'ni ja pajal ya'lel ts'usub'i, ja aceite. Ja swakaxe'i, jel oj pojxuk yujile ja b'a lu'um it k'apji yi'e ja ma' ek' paxta kujtiki.

14—Me'y pilan chonab' ja jastal jel ja jastik junuk b'a wa chonab'il we'nlexi. Mini jun ma mi oj untikanuka, jach'ni ja wa wakaxexi, spetsanil oj untikanuke. 15Ja Dyosi, mini jun ma oj ya' ko' chamela. Chikan ma wa sk'ana oj yil k'ujolukex, a sna' lek ja jastal yi'aje wokol ja egipsiano jumasa, jach' oj yi' ja ye'n. Jaxa we'nlexi, mini jas oj ek' a b'ajexa.

16—Sts'akatal ja Dyosi, yuj ja yip ye'n ja'yuj oj ja wi'ex kan jitsan chonab'. Kechan mokni a talnayex sya'ujlale'a, ch'akan ch'ayawik sna'jel ja dyos k'u'lub'al yujile'i, b'a jach' mi oj lo'lajananik b'a oj ja toy'ex ja we'nlexi.

17—B'ob' ta oj ek k'a k'ujolex jel a'aye ja kristyano jumasa jaw yuj ja we'nlexi, lajan sok mi oj b'ob' a wil k'ujolukex. 18Mok xiwanik yujile. Mok ch'ay a k'ujolex ja jas sk'u'lan ja Dyos kujtik b'a Egipto, ya'yi wokol ja mandaranum b'a Egipto, sok spetsanil ja kristyano jumasa ma' tey tiwi. 19A petsanilex ja we'nlexi, a wilawex jastal sje'a ja yip ja Dyos ja b'a Egipto, a wilawex jastal jel sje'a ja yip b'a oj ya' elanik b'a yib k'ab'al, cho jach'ni oj sk'u'l yi ja kristyano jumasa ma wala xiwyex yuji.

20—Ja ma'tik oj kan sak'an yujile ja kristyano jumasa jawi, ja Dyosi oj sjek chajnul ako b'a oj k'uxjuke yuj. Mi ma oj b'ob' snak' sb'aj sok mini jun ma oj skoltan sb'aj ja b'a wokol ja wa. 21Ja'yuj mi lom la xiwyex, ja jDyostiki tey jmoktika, yajni xyilawe'i oj k'itk'unuke yuj ja xiweli.

22—Malan wa'nex pojxel ja we'nlexi, jaxa Dyosi takal takal oj ya eluk ja kristyano jumasa ma'tik tey b'a chonab' jawi, ta yuj k'a jel juts'in a ch'ayawex sna'jele, mi wokoluk oj sk'ux'ex ja chante b'a it tey b'a yoj k'uli 23-24Ja Dyosi, ye'n oj skoltayex b'a oj ja wil k'ujolukex ja kristyano jumasa jawi, jaxa we'nlexi, t'ilani oj ja ch'ay'ex sna'jele'a, man mi jun oj kanuke. —Sok ja we'nlexi mini jun ma oj b'ob' yuj ja. Ja'yuj oj b'ob' a ch'ay'ex sna'jel ja smandaranume'i, sok mini ma oj na'juk yujile'a.

25—Yajni xa wil k'ujolanexi ja kristyano jumasa jawi, jach'ni ja dyos k'u'lub'al yujile'i ch'akan tsikawik yi'e, b'a mi ti oj ok'uk a k'ujolex ja k'anal takin yi'oje'i. Ja jawi mini sk'ana ja Dyosa. 26Cho jach'ni ja we'nlexi mok ok'uk ak'ujolex ja dyos k'u'lub'al yujile'i, mok a wi' b'a a najex, ta waj k'a a wi'ex, jach'ni ja we'nlexi oj ch'ayjuk a na'jelex.

Currently Selected:

Deuteronomio 7: YABD

Highlight

Copy

Compare