Deuteronomio 6

Ja mas t'ilan ja ab'al iti

1—Ja' ab'al jumasa it ja yala kab' ja Dyos kujtik oj je'a wi'exi, sok ja oj ja k'u'ukex ja b'a lu'um ojxa a'juk a wi'exi. 2-3Ta a k'u'anex k'a ja jas wax yala ja Dyosi, a toyowex k'a ja jastal je'unej a wi'exi, jel oj pojxanik. Sok jel lek oj ajyanik ja b'a lu'um jawi, ja Dyosi, jach' sk'apa yi' ja ma ek' paxta kujtiki, jel b'i lek ja lu'umi, jex ajyi ja jastik junuki.

4—Maklayik, israelenio jumasa. Kechan june ja Dyos kujtiki. Ye'nani Dyos kujtik ja janek' israelenio'otiki. 5Yaj oj a wab' ja wa Dyos sok spetsanil wa waltsili, sok spetsanil ja jas waxa na'a. 6A'kan b'a wa olom spetsanil ja jas wa xkala wab' ja ya'n, 7jujune' k'ak'u sok chikan b'a'a, je'awik yi ja wa wuntikilexi: Ja yajni ti ayex b'a wa najexi, ma ti ayex b'a b'eji, ja yajnix waj wayanik sok yajni oj k'e'anik ja b'a wa waynub'exi. 8Ts'ijb'ayik b'a xen ts'u'um mochowik b'a snuk' a k'ab'ex, cho nok'owik b'a wa patanex. 9Ts'ijb'ayik b'a wax ajyi ochel ja wa najexi, sok b'a wax ajyi ochel ja b'a chonab'i.

Ja jastal toj oj k'u'axuk a Dyosi

10—Ja Dyosi, yaloj yab' ja Abrahami, ja Isaak sok ja Jacobi, we'n oj ya' wi'ex ja lu'um iti, yuj ja ye'n yintilexi. Ja'yuj ja we'nlexi ti oj ajyanik b'a jun niwan tsamal chonab' b'a mi we'nuk a tojb'esnejukex, 11ja na'its jumasa b'a oj ajyaniki jel ja jastik junuki, mi we'nuk a wilawex jastal taxel, ja snololab'il b'a oj ja wu'ex ya'leli mi we'nuk a jotonejukex, ja sat ts'usub' oj ja lo'exi, sok ja tuk tek'ul jumasa, mi we'nuk a ts'ununejukex. 12Jayuj mok ch'ayuk a k'ujolex ye'n ya elanik b'a yoj yib k'ab'al ja Dyos ja yajni ti ayex ajyi b'a Egipto. 13Ja'yuj toyowik ja Dyosi, k'u'anik ja jas wax yala. Ta ay k'a jas oj ja wal'ex, alawik sok kechan ja sb'i'il ja Dyosi.

14—Mok a ch'ay a k'ujolex ja Dyosi, mok wajanik sok ja ma'tik wa stoyowe k'u'lub'al dyos b'a lu'um jumasa mojan a wi'oj jexi. 15-16—Ja Dyos kujtiki, ja Dyos yuj ja israelenio'a, sok ti'ni oj ajyuk a mokexa. Mok kechanuk a wil'ex sk'ujol ja jastal a k'u'lanex b'a Masaji. Ja Dyos kujtiki wani xtajki'a, ja we'nlexi ta yuj k'a waj a toy'ex pilan dyos yuj ja ye'n, jel oj tajkuk a mokex, apetsanilex oj sch'ay a na'jelex.

17—Ja yab'al jumasa ja Dyos kujtik it ya' wi'exi, k'u'anik spetsanil k'ak'u. 18Ta yuj k'a waxa k'u'lanex ja b'a lek sok ja b'a toji, jel lek oj yil'ex ja Dyosi, sok jel lek oj ya ek'uk a wujilex ja yajni ti'xa ayex b'a lekil lu'um it sk'apayi ja ma ek' paxta a wujilexi. 19Cho jach'ni ja ma mi lek wax yilawexi oj spak e' ajnel a wujilex, yuj ja jach'ni yalunej ja.

20—Yaj nix ek ja k'ak'u jumasa, ti oj sjob' ja wa wuntikilexi, spetsanil ja yab'al jumasa ya'oj ki'tik ja Dyos kujtiki, ja sb'ej ja it b'a, oj chi'uke. 21Jaxa we'nlexi, ti oj ja wal'exa: Ja ke'ntikoni yib k'ab'al aytikon yuj ja xchol b'a Egipto, jaxa Dyos kujtiki sok spetsanil yip ya elkotikon ja tiwi. 22Kilatikon ja niwak wokol a'jiyi'e yuj ja Dyos ja xchol jaw sok ja yuntikile'i. 23Jaxa ke'ntikoni, ya' elkotikon ja b'a chonab' jawi, ti yi'aj jotikon b'a lu'um it sk'apunej yi ja ma ek' paxta kujtiki. 24-25Ja'yuj, yala kab'tikon oj kistikon, sok oj k'u'uktikon ja yab'al jumasa. Ta yuj k'a k'u'antikon ja Dyos sok ja yab'al jumasa, jel lek oj ek' kujtikon, oj cho ya' jsak'aniltikon ja jastal aytikon ja ya'n —oj chi'anik.

Currently Selected:

Deuteronomio 6: YABD

Highlight

Copy

Compare