Deuteronomio 5
5
1Ja Moisesi, stsomo sb'aj sok spetsanil ja israelenio jumasa, ti yal yabye'a:
—Maklayik lek ja jas oj kala wabyexi, ja' oj ka'wi'ex ja ab'al jumasa b'a oj ja na'ex sok oj ja k'u'ukexi. 2Ja Dyos kujtiki, chapa jmoktik ja b'a wits Horeb. 3Ja jas chapa jawi mi kechanuk ja' sb'a ja ma' ek' paxta kujtiki, cho jb'ajtikni ja ke'ntiki. 4B'a wits jawi, satilajel ab'al sk'umanotik ja Dyos b'a yoj k'ak'i. 5Jaxa ke'n makuniyon yuj ja Dyos b'a oj kala wabyex ja jas wax yala, yuj ja a petsanilex jel xiwyex yuj ja k'ak'i, ja'yuj mi k'e'yex ja b'a witsi. Ti yala tiw ja Dyosi:
6—Ke'n Dyoson yujile ja israelenio jumasa. Ke'n ka eluke b'a Egipto b'a yib' k'ab'al aye' ajyi. 7Mok a wa'ex pilan dyos b'a ti sat ja ke'n. 8Mok a wa'wex och dyosil ja jas waxa wilawex b'a nalan cha'an sok b'a lu'umi, mini ja b'a yoj xcha'anil ja niwan paman ja'i. 9Mok ko'anik mek'an b'a sti' sat ja jaw jumasa, mok a tsom a b'ajex b'a oj a toy'ex. Ke'n Dyoson yuj ja israelenio jumasa, wanila tajkiyona. Ja ke'n yuj k'a mi sb'ejuk ja jastal wax sta'awone ti wa wuntikilexi, ja wa wijexi, sok ja yuntikil wa wijexi, ojni ka stup'e'a, 10Jel yaj xkab'i spetsanil ja yintil ja ma wa syajtayoni, wa sk'u'ane ja kab'ali.
11—Mok a ta'ex ti' lom ja jb'i'ili. Ta yuj k'a jach' waxa k'u'lanex, ojni ka'a tup'exa.
12—Na'awik ja sk'ak'u'il jijleli, jun k'ak'u mi tukuk, kechan ke'n jb'aj ja k'ak'u jawi. 13Snajtil ja wake k'ak'u b'a yoj semana oj b'ob' a k'u'l ja wa wa'telex waxa k'anawexi, 14jaxa sk'ak'u'il jijleli, jun k'ak'u kechan ke'n jb'aj. Ja k'ak'u jawi mini jun ma oj b'ob' a'tijuk: Mini ja we'nlexi, wa wuntikilex keremi, wa wuntikilex ak'ixi, wa moso'exi, winik ma ixuk, mini ja wa wakaxexi, wa burro'exi, mini jun tik'e chante, sok mini ja ma' tuk chonab' jakel wa'n a'tel a mokexi. 15Ja'yuj, jel t'ilan oj jak a k'ujolex ja we'nlex yuja cho yib k'ab'al ni ajyiyex ja b'a Egipto, jaxa ke'n sok spetsanil kip ka elanik ja tiwi. Ja'yuj ke'n wa xkala wabyex oj jijlanik ja sjukil k'ak'u.
16—K'u'anik sok talnanik ja wa nan a tatexi. B'a jach' oj ek' a wujilex lek, sok oj ajyuk a sak'anilex jitsan k'ak'u ja b'a lu'um oj ka' wi'exi.
17Mok milwananik, 18mok a ta'a b'ajex sok tuktukil ixuk, 19mok elk'ananik, 20mok a ta' ti' b'a mi sb'ejuk ja wa moji mok a le' yab'alil lom, 21mok ok' a k'ujolex ja jastik b'aj wa mojexi, mini ja sche'umi, mini ja ya'tijum winiki, jax ni ja ya'tijum ixuki, ja swakaxi, mini ja sburro, sok chikan jasunk'a yi'oji.
Lokjel b'a sk'u'ajel
22—Ja' ab'al jumasa iti, sok tsatsal k'umal ya'a ja Dyos ja yajni ti ayex b'a yib' witsi. Ja sk'umali ti el b'a wa'n ajlel ja k'ak' b'a yib'el jun pimil ason. Jaxa yab'ali ti sts'ijb'an b'a chab' laja ton, yajni ch'ak ts'ijb'axuk yuji ti'xa ya'ki'a, mixa jas tuk ya ochuk.
23—Yajni a wabyex ja sk'umal ja Dyos ti wa'n elel jan b'a yoj k'ik'inal, sok a wilawex ja k'ak' b'a yoj k'uli, jel xiwyex. Ja'yuj ja ma'tik niwan ja ya'tel ay yuj ja k'ole jumasa sok ja ma'tik ay ya'tel b'a chonab'i, jak sk'umukone, 24ti yalawe kab'a: smeranil sje'ata ki'tik ja yip ja Dyos kujtiki. Kab'tik ja sk'umal it el jan b'a yoj k'ak'i. Ja ya'n kilatikta jastal sk'umanotik ja Dyosi, sok mi chamtik. 25Ja'yuj ¿jas b'ej ja oj jneb'atik jusub'al k'ak' oj chamkotiki? —Kechan ta yuj k'a wajto jmaklantik pilan mak'e ja sk'umal ja Dyosi, oj ni chamkotika. 26Spetsanil ja kristyano jumasa wa sna'awe mini oj b'ob' jmaklatik ja sk'umal ja Dyos ja jastal jmaklatik ja ke'ntiki, sak'ani aytika. 27Ja lek kax maklan we'n spetsanil ja jas wa sk'ana oj yal kab'tikon ja Dyosi, ti'xa wala kab'tikon we'n ja jas oj yali. Jaxa ke'ntikoni ojni jk'u'uktikon spetsanil ja jas ye'n oj yal kab'tikona.
28—Ja Dyosi, ch'ak yab' ja jas a walawex kab'i, ja'yuj ti' yala kab'a: Jel lek ja jastal wa sneb'awe'i. 29Jel lek ta jach k'a oj sk'uluke spetsanil k'ak'u oj stoy'one, sok oj sk'u'uke ja kab'al jumasa. Ja jachuki jelni lek oj ek'yujile'a, cho jach'ni ja yintile jumasa. 30Ka'ax al yabye a'xa kumxuke b'a snaje, 31jaxa we'n mok alb'an kumxan b'a ili, ti'ni oj ajyan jmoka, b'a oj ka'wi ja ab'al jumasa b'a oj a ji' yi'e'i, b'a ja oj sk'u'uke ja yajni ti'xa aye' k'ot b'a lu'um oj ka' yi'e'i.
32—Ja'yuj, israelenio jumasa mok a wa'wex kan mini june ja yab'al ja Dyos b'a mi oj a k'u'ukex. 33Jujune' k'ak'u ja' xa nochowex ja jas wax yala, b'a jach' lek oj ek' a wujilex, oj cho ajyuk jitsan k'ak'u wa sak'anilex b'a lu'um oj ya' wi'exi.
Currently Selected:
Deuteronomio 5: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
