Deuteronomio 4

Ja Moisesi, yal yab' ja jas oj sk'u'luk ja kristyano'i

1Ti och yala ja Moisesi:

—Israelenio jumasa tsajlanik spetsanil ja ab'al jumasa je'a a wi'exi, b'a jach' oj cho ajyanik ja yajni la ochyex ja b'a lu'um jumasa oj ya' wi'ex ja Dyos yuj ja ma' ek' paxta kujtiki. 2K'u'anik spetsanil ja yab'al ja Dyos it ka' wi'exi; mok jas a tukb'esex k'u'anik. 3A wilawex jastal sch'aya el sna'jel spetsanil ja ma'tik wa stoyowe ja k'u'lub'al dyos Baal-peori. 4Cho a wilawex kechani kanye sak'an ja ma'tik toj aye sok meran ja Dyosi.

5-6—Ja Dyos kujtiki, yala kab' oj b'i ch'ak je'a wi'ex spetsanil ja yab'al jumasa, b'a jach' oj ja k'u'ukex ja yajni ti'xa ayex k'ot b'a lu'um oj ya'wi'exi. Jachuk ja yajni oj yabye yab'alil ja tuk kristyano jumasa b'a tuktukil lu'um jumasa, ti oj yal'e'a, jel b'i a'ayex, sok jel xa na'awex jastal oj ajyanik, sok jel lek xa wabyex sb'ej, jel tsamal ja jastal wax sje'a sb'aje'i, sok wa sna'a jastal oj sk'u'uke, oj chi'uke. 7Me'y pilan k'ole kristyano jumasa b'a mojan ay sok ja Dyos ja jastal mojan aytik sok ja ke'ntik ja yajni wax k'anatik oj skoltayotiki. 8Cho mini jun k'ole kristyano ayuk yi'oje ja yab'al jumasa b'a toj ja jastal a wi'ojex ja we'nlexi. 9Ja'yuj mok ch'ay ka k'ujolex ja jas ch'ak ek'uk a wujilexi; jel sb'ej alawik yab' ja wa wuntikilexi, sok ja wa wijex jumasa.

Toj aye sok ja Dyosi

10—Ja yajni ti ajyiyex b'a wits Horeb, yala kab' ja Dyosi oj b'i tsom'ex b'a sti' sat ye'na, wa sk'ana oj lo'lanuk a mokex b'a oj sje'a wi'ex jastal spetsanil k'ak'u oj ja k'u'ukex, b'a jach' junxta oj ja je'ex yi ja wa wuntikilexi.

11Ja we'nlex ja yajni a tsomo a b'ajex b'a yib' witsi, a wilawex jastal jel cha'an k'e ajluk ja k'ak'i. Ja tab'i lajan sok jastal jitsan ason, 12man b'a scha'anil yajlel ja k'ak'i, ti sk'umanex ja Dyosi. Ja we'nlexi mi ma' a wilawex, kechan ja a wabyex ja sk'umal ja Dyosi. 13Jach' ya'a na'ex jastal it ja lajune yab'al ja Dyos sok ja jas ja chapawex sok, ti sts'ijb'an kan b'a chab' laja ton b'a jach' oj ja k'u'ukex ja we'nlexi. 14Cho yala kab' oj b'i je'a wi'ex ja yab'al jumasa, b'a t'ilan oj a k'u'ukex ja b'a yoj lu'um ojxa ochaniki.

15-18—Ja yajni sk'umanex b'a jun k'ak' ja Dyos b'a wits Horebi, mi ma' a wilawex, ja'yuj mok a k'u'lukex k'u'lub'al dyos b'a yiljel jastal winik ma ixuk, mini b'a yiljel jastal chante b'a wax jujpi, mini b'its'il chan, sok mini chay. 19Mok a toy'ex ja k'ak'u sok ja nan ixawi, sok mini ja k'anal jumasa. Ja k'anal jumasa jaw wa xlijpi b'a spetsanil ja chonab' jumasa, ye'n sk'u'lunej ja Dyosi.

20Ja yajni ya elanik ja Dyos ja we'nlex b'a Egipto, jach' sk'u'lan yuj ja wa sk'ana oj ya' ochanik jastal yuntikili. 21B'aya yuj ja mul we'nlex ja tajki jmok ja Dyos ja ke'n, yala kab' mi b'i oj b'ob' jk'uts ja niwan ja' Jordani. Ja'yuj ja ke'n mi oj ochkon ja b'a lekil lu'um oj ya' wi'exi. 22Jaxa ke'n ti oj chamkon il b'a yok ja iti, mini oj b'ob' k'uts ja niwan ja' Jordani.

—Ja we'nlexi, oj ek' a k'utsex, oj a b'ajukex ja lu'um jawi. 23Kechan, talna lek a b'ajex, mok ch'ayuk a k'ujolex ja trato sk'u'lunej a mokex ja Dyosi. K'u'anik ja jas wax yala, mok a toy'ex mini jun k'u'lub'al dyos, 24ja Dyosi, jel wax tajki, b'a oj ya stup ja smul ja ma' mi sk'u'ani, oj b'ob' ch'ak stsik ele.

25—Jaxa we'nlexi, yajni ochyexta b'a lu'um jawi, sok ja yajni ayxa a wuntikilex sok a wijexi, mok a k'u'lukex mini jun k'u'lub'al dyos, mok waj ek a k'ujolex oj a toy'ex. Ojni a ch'ik a b'ajex jun niwan mulala, cho oj ni a wa'wex tajkuk ja Dyosi. 26Ja satk'inal sok ja lu'umi oj yil'e, ta yuj k'a mixa k'u'anex ja jas wax kala, mi ni oj cho alb'anik ja b'a lu'um it tey b'a stojol ja sti ja niwan ja' Jordani, jel juts'in oj chamanik.

27—Kechan chab' oxe oj sjek ja Dyos b'a oj b'ob' wajuke b'a tuktukil chonab'. 28Ja tiwi oj waj stoy'e dyos k'u'lub'al sok te' ma ton, jun ita senya, mi xk'elwani, mix yab' k'inal, mix wa'i, mix yi'aj ik', b'a miyuka sk'u'lb'en winik tak. 29Kechan ta yuj k'a toj oj ajyanik ja we'nlex b'a chonab' jawi, sok spetsanil a k'ujolex oj ja k'an'ex yi b'a mi oj ya a tup wa mulex ja Dyosi, a'nima ti ayukex tiwi mi ni oj ya a tup wa mulex ja Dyosi. 30Ta yuj k'a yoj a cham k'ujolex ma yoj a wokolex wala kumxiyex b'a oj ja k'u'ukex ja Dyosi, 31ja ye'n mini oj ya'ex pilana sok mini oj sch'ay a na'jelexa, yuj ja jel wa syajtayexi. Ja Dyosi, mini t'un wax ch'ay sk'ujol ja lo'il sk'u'lan sok ja ma ek' paxta a wujilexi, yalani jach' oj ch'ak sk'u'luka.

32-38—Ja Dyosi, ti ya eljan b'a Egipto ja ma ek' paxta a wujilexi, jach' sje'a ja niwan syajal sk'ujol sok ja niwan yipi. Yuj ja wa koltajel we'nlexi, ja'yuj sje'a ja niwan yipi, sok ya och sxiwel ja kristyano jumasa b'a niwak chonab' jumasa.

—Yuj k'a ja' Dyos ja skoltayexi, yujni sb'a oj ya ochanik yuntikilila. Me'y pilan k'ole kristyano jumasa yab'unej ja sk'umal ja Dyosi, sok mi ma wa xyila b'a oj yal jastal. Ja Dyosi man b'a satk'inal sk'umanex b'a ya a ta'ex ja b'ej b'a toji. Jaxa il b'a lu'umi b'a jun k'ak' sk'umanex, jaxa we'nlexi sak'an ni ayexa. Yajni och b'ejyaniki ye'n sjama ja Dyos wa b'ejexi; Ja chonab' jumasa b'a a'aye sok b'a jel ja yipe' yuj ja we'nlexi, ja'yuj ja wax k'ana oj ka' b'a wa k'ab'ex ja lu'um it ojxa ka'wi'exi.

—Ta wan k'axa k'elawex ja jas ek' tajani, ti oj ja wil'ex mini jas wax ek' ja jastal wa'n ek'el a wujilex ja we'nlexa. Spetsanil ja jastal iti, ja sb'a oj ja na'ex yujni Dyos meran ja wa Dyosexa, sok kechani ye'na'a.

39—Ja'yuj mok ch'ayuk a k'ujolex ja Dyos kujtiki, kechan ye'n swinkil sok yajwalil ja satk'inal sok ja lu'um k'inali. 40Ya'n oj ka' b'a a k'ab'ex ja yab'al jumasa ja Dyosi. K'u'anik b'a jach' oj ajyuk jitsan k'ak'u wa sak'anilex b'a lu'um it oj ya'wi'ex ja Dyosi.

Chonab' jumasa b'a koltajel

41Yajni ch'ak yal jastal it ja Moisesi, ti stsa'a oxe chonab' ja b'a stojol wa xjak ja k'ak'u b'a niwan ja' Jordani. 42Ja b'a chonab' jumasa jawi, oj b'ob' sk'an skoltajel ja ma wax milwani, b'a mi sneb'unejuk smila ma yuj ay jas yi'oj sok. Ja winik jawi ojni sta' skoltajel b'a mi oj tsajlajuk yuj ja smoj alijel ja chamel winiki. 43June ja chonab' stsa'a ja Moisesi, sb'i'il Beser tey b'a wits b'a spamanal; ti oj b'ob' skolta sb'aje tiw ja k'ole sb'a Rubeni. Jaxa pilan sb'i'ili Ramot, ja iti tey b'a Galaadi; ti oj b'ob' skolta sb'aje tiw ja k'ole sb'a Gadi. Ja yoxil chonab'i sb'i'il Golan, ja iti tey b'a Basan, ti oj b'ob' skolta sb'aje tiw ja snalan k'ole sb'a Manasesi.

Ja lajune ab'al jumasa

44-47Ja yajni elye b'a Egipto ja Moises sok ja israelenio jumasa, ti k'otye b'a loman b'a sti sat ja Bet-peori, ja iti tey b'a stojol wax jak ja k'ak'u yuj ja niwan ja' Jordani. Ja lu'um jawi ja sb'a amorreo jumasa. B'a chonab' Hesbon ye'n mandaranum ja Sihoni, jaxa b'a Basani, ye'n mandaranum ja Og. Jaxa Moises sok ja israelenio jumasa sch'ayawe sna'jel ja chab' mandaranum jawi. 48-49Ja lu'um jumasa jawi, ti wa stuluyi b'a yax k'ul Sirion, wax cho na'xi sb'aj yax k'ul Hermon. Ko'el k'inal wa xwaji, man b'a Aroer, mojan niwan ja' Arnon, cho ko'elni wax waja man wax k'ot b'a Pisga. Ti wax ek' b'a paman ja' it mix nijki, sok snajtil man Araba. Ja tiwi ja stojol b'a wa xjak ja k'ak'u b'a niwan ja' Jordani, ti a'ji b'a sk'ab' tiw ja yab'al jumasa ja Dyos ja israelenio jumasa yuj ja Moisesi.

Currently Selected:

Deuteronomio 4: YABD

Highlight

Copy

Compare