Deuteronomio 3
3
Ch'ayji sna'jel ja Og
1-7—Tsa'an yu ja iti, ti wajtik b'a chonab' Basan, jasa ki'ajtik pilan b'ej. Yajni k'otik b'a lu'um Edrei, jaxa Og ja ma ay xchol yuj b'a Basani, el sok ja soldado jumasa yi'oji, waj sta'otike b'a oj tiro'anuke jmoktik. Ja Dyosi yala kab' mi lom la xiwtik yujile, ye'nani oj ya' k'u'ltik ganara.
—Yajni k'e'tik sok ja Og ja ma ay xchol b'a Basani, ye'nani ja Dyos ja ma oj ya' k'u'tik ganara; spetsanil ja soldado jumasa yi'aj jani, mini jun ma kan sak'ana. Ja lu'um jumasa b'a stojol Argob, jch'ayatik sna'jel ox tajb'e (60) chonab'. Spetsanil ja chonab' jumasa jawi tojb'el lek sok cha'anil ts'akab' sok niwan b'a wax ayi ochel tojb'el sok tsatsal tak'in. Cho jach'ni ja chonab' jumasa b'a mi jel tojb'eluki cho ch'ayatik sna'jele, jachuk ch'ak ki'tik kan yi'e ja schante'e jumasa, sok ja jastik cha'an ts'akoli.
8—Jach' ek' ja k'ak'u jumasa jawi, jachuk ki'ajtik kan yi'e spetsanil ja slu'ume ja chab' mandaranum yuj ja amorreo jumasa, ja jaw jumasa ti ajyiye b'a stojol wa xjak ja k'ak'u yuj ja niwan ja' Jordani, masan niwan ja' Arnon man b'a yax k'ul Hermon. 9Ja sidonio jumasa wa sna'awe sb'aj ja yax k'ul jawi, sb'i'il Sirion, jaxa amorreo jumasa wax ya'we sb'i'iluk Senir.
10—Ch'ak ki'tikan spetsanil ja schonab' jumasa ja Og ja b'a paman lu'um jumasa, spetsanil ja Galaad sb'a Basani, man b'a Salca sok b'a Edrei nakani sb'aj ye'n ajyi ja ma ay xchol sb'i'il Og. 11Ja ma ay xchol sb'i'il Og, kechan ye'n kan sak'an b'a wax yala yab' jas oj sk'uluke ja refaita jumasa; ja sch'at b'a wa xwayi toj tak'in, ja snajtili chane metro, jaxa sati chab' metro. Ja ch'at jawi, oj b'ob' ilxuk b'a schonab'il ja amonita jumasa b'a Raba.
Ja k'ole jumasa ma' ti aye' b'a stojol wax jak ja k'ak'u yuj ja niwan ja' Jordani
12—Yajni ki'ajtikan spetsanil ja lu'um jawi, ja ka'yi'e ja k'ole sb'a Ruben sok sb'a Gadi ja lu'um jawi, ti wa stuluyi b'a Aroer, wax ek' b'a sti niwan ja' Arnon, man snalan ja yax k'ul Galaadi, sok spetsanil ja schonab'il jumasa.
13—Jaxa nalan k'ole sb'a Manasesi, ja ka'yi'e ja snalan kan mey swinkil b'a Galaad, sok spetsanil b'a Argobi, b'a Basan it sb'aj ye'n ajyi ja ma ay xchol sb'i'il Og. Ja lu'um jumasa jawi, ja sb'aj ajyi ja refaita jumasa. 14Jun winik sb'i'il Jair, ya yintil ja Manasesi, ye'n yi'aj kan ja lu'um jumasa b'a Argobi, man b'a sts'ajk'an sok ja Guesur sok ja Maacaji. Ja Jairi, stukb'es yi ja sb'i'il Basani, ya sb'i'iluk Havot-jair, jani sb'i'il ay man ya'an.
15—Ja Maquiri ja yi'aj kan b'a Galaadi.
16—Jaxa k'ole sb'a Ruben sok sb'a Gadi, ja ka'yi'e ja it nalanajel ay yuj ja Galaad sok ja niwan ja' Arnoni, ti k'ot tik'an b'a snalan ja job'iltiki, sok b'a niwan ja' Jaboki. Ja sts'aj k'an sb'aj sok ja amonita jumasa. 17Cho ka'yi'e ja stojol b'a Araba it tey b'a yax k'ul pisgaji. Ja lu'um jumasa jawi ja wa sts'aj k'an sb'aj sok ja niwan ja' Jordani, jaxa b'a stojol Quinereti, wax k'ot man b'a paman ja' it mix nijki.#3:17 paman ja' it mix nijki: Ja iti wax cho alxi, mar muerto.
18—Ja k'ak'u jawi kala yabye spetsanil ja soldado jumasa a yi'e ja stujk'anub'e'i. Ye'n a b'ejyuke b'ajtan b'a sti sat ja k'ole kristyano jumasa ma mito ay slu'ume'i, ojtoni a'juk yi'e yuj ja Dyosi. 19Spetsanil ja ixuke sok ja yal untik jumasa, kala yabye tix kanye b'a chonab' ka'ta yi'e'i, sok spetsanil ja wakax jumasa yuj ja jel a'ayi. 20Mi ch'ak sta' slu'um spetsanil ja kristyano jumasa, mi ma oj kumxuk. Jach'ni ja ye'nle'i, jel lek oj ajyuke sok ja slu'ume oj a'juk yi'e yuj ja Dyos b'a sts'e'l sti' ja niwan ja' Jordani.
21-22—Jachuk ja Josueji, kala yab' mi lom xiwi, yuj ja yilani jastal koltani ja Dyos ja yajni sch'aya sna'jel ja chab' mandaranumi. Cho kala yab' Dyos oj koltajuk yuj b'a oj b'ob' yuj, ja b'a lu'um jumasa ojto ek'uki, yuj ja ye'nani ja Dyos oj tiro'anuk yuj ja israelenio jumasa'a.
Mis sk'ana Ja Dyos, oj och ja Moises b'a Canaani
23—Ja'yuj ti jk'anayi ts'akatal ja Dyosi:
24Kilunej jastal jel niwana, sok jastal jel ja wa wipi.
Mini b'a satk'inal, sok b'a lu'umi
ayuk pilan Dyos jastal ja we'n,
wa xb'ob' a k'u'l jitsan jastik b'a jel tsamali.
25Wax k'anawi, a' ek' jk'uts ja ke'n ja niwan ja' Jordani.
Je'aki ja tsamal yax k'ul jumasa,
—je'aki ja tsamal yax k'ul b'a Libano.
26-27Ja'yuj a mul we'nlex ja tajki jmok ja Dyosi, mixa sk'ana oj ek' jk'uts ja ke'n ja niwan ja'i, yala kab' mixa b'i lom xk'anayi t'ilan, kechan yala kab' la k'e'kon b'a cha'anil wits pisgaji, b'a ti oj kil tiw spetsanil ja lu'um jumasa oj ya' wi'exi. 28Cho yala kab' lab'i tsatsal k'ujoluk ja Josueji, lab'i ch'ak je'yi spetsanil ja jas oj sk'u'luki, yuj ja ye'n oj sje'yi ja israelenio jumasa jastal oj ochuke ja b'a lu'um jumasa jawi.
29Tsa'an sok ja iti ti kantik b'a loman Bet-peor.
Currently Selected:
Deuteronomio 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
