Deuteronomio 33
33
Ja Moisesi, ya' kanyi jitsan slekilal ja israelenio
1Ja Moisesi, waj jun niwan aluman Dyos ja b'a ya'teltajel ja Dyosi. Yajni mojan xa oj chamuki, jel lek sta'a ti' ja israelenio jumasa 2jach' yala jastal iti:
—Ja jtatik Dyosi, ti wa xjak b'a wits Sinai;
ja yijlab' k'ot man Edom,
sok ijlab'ani lek ja b'a wits Parani
ja yijlab' ja yajni teyi,
wa xk'ot man Meriba sok b'a Kades.
B'a stojol sk'ab'i, wax yi'ajan jun k'ak',
wa xjak sok jitsan k'ak'al tiro'anum.
3—Ja Dyosi, wa syajta ja yuntikili;
ja Dyosi wa stalnan ja sb'aj ye'ni
ja ye'nle'i, spetsanil k'ak'u wa sk'u'ane ab'al
jel lek wa sk'u'ane ja ab'ali.
4—Ja ke'n Moiseson, ka'wi'ex ja yab'al ja Dyosi,
ja b'a we'nlexi, ja slekili.
5Ja we'nlex sok ja ma'tik ay ya'teli, a na'awex
sb'aj ja Dyos ye'n a mandaranumex.
6Ja Moisesi, cho yala yab' ja k'ole sb'a Rubeni:
—Ja we'nlexi, jun k'ole jel t'usanex,
jayuj oj ajyuk a sak'anilex spetsanil k'ak'u.
7Cho yala yab' ja k'ole sb'a Juda:
—Ja jtatik Dyosi, oj smakla ja jas oj ja k'an'ex yi'i,
oj ya' a b'ob' ka wujilex sok ja ma mi lek xyilawai,
cho lekni oj yab' ja oj ja ta' a b'ajex
sok ja t'usan israelenio jumasa.
8-9Ja k'ole sb'a Levi, jach' yal yab' jastal iti:
—Ja Dyosi, xchapa sb'aj sok ja israelenio jumasa
ti yila sk'ujol b'a Masa,
b'a niwan ja' Meriba.
Jaxa we'nlexi, niwanex ni sk'ujol
yuj ja waxa k'u'anexi,
wax yalawe jel waxa na'awex jastal
oj ajyanik toj sok ja strato ja Dyosi,
sok mi ja'uk jel toj oj ajyanik sok ja wa tatexi,
mini sok wa moj alijelexi,
mini sok wa wuntikilexi.
Ja'yuj ya' wi'ex ja Dyos ja Urim sok ja Tumimi,#33:8-9 ja Urim sok ja Tumimi: Wa sk'ana yale, chab' yal ton was jipawe b'a ti oj sna'e ja jas wa sk'ana ja Dyosi.
sok ya'ni ochanik pagre'ila.
10—We'n oj ja je'ex yi ja kristyano
jastal oj sk'u'uke ja ab'al jumasa ja Dyosi;
jaxa b'a yaltar ja jtatik Dyosi
oj ya'we yi spetsanil tik'e ja smajtan jumasa.
11—Wax k'ana yi ja Dyos a yil'ex
lek, sok a yi' lek ja wa
wa'telex waxa k'u'lanex yi'i;
wa xcho jk'anayi, a sch'ay sna'jel
spetsanil ja ma mi lek xyilawexi,
b'a jach' mixa ojto
k'e' tajkuke a mokexa.
12Ja k'ole sb'a Benjamini, jach' yala yab' jastal iti:
—Ja Dyosi, wa syajtaya sok wa stalnaya;
—Ja Dyosi, spetsanil k'ak'u tey b'a wa yaxk'ul jumasa.
13Ja k'ole sb'a Jose jach' yala yab' jastal iti:
—Dyos oj sk'u'l yi lek ja wa walaj
jumasa, mi oj k'ot tik'an ja ya'leli
jach'ni b'a wa cha'anil poso jumasa.
14-15Man b'a cha'anil wits jumasa
snajtil ja jab'il jel oj ya ajyuk
ja Dyos ja wa jas a b'aji.
16Ja lu'umi jel lek
oj ajyuk ja sb'a'ali,
spetsanil k'ak'u ojni ch'ak
ya'wi ja Dyosi.
—We'n was k'ana wa ja Dyos it
sje'a sb'aj wa'n ajlel b'a jun ib'e te'i.
17Ja wa wuntikil ma soldado ayi,
ja Efrain sok ja Manasesi,
jel tsatse sok jel ja yipe'i, jach' ja
jastal jun wakax ma jastal bufalo.
—Mini t'un wokoluk oj sch'ay'e
sna'jel ja ma mi lek xyilawexi.
18Ja k'ole sb'a Isacar sok sb'a Zabuloni, jach' yala yab' jastal iti:
—Ja we'nlexi jel lek oj a'tijananik
sok ja lu'umi, sok jach'ni ja b'a niwan paman ja'i.
19Ja b'a niwan paman ja' jumasa
jel oj ja ta'ex ja jastik junuki.
Lokowik ja ma'tik mojan a wi'ojexi
a jakuke b'a wa yax k'ulexi, a jak
ya'we yi ja smajtan ja Dyosi.
20-21Ja k'ole sb'a Gadi, jach' yala yab' jastal iti:
—Sts'akatal ja Dyos yuj ja
ya'wi niwak lu'um jumasa.
—Jachuka jastal ja choj
chapan xta ay b'a oj syam ja skontra.
Ja lekil lu'umi, we'n ch'ak a wi'kani
yuj ja a k'u'an spetsanil ja jas yala ja Dyosi,
sok toj a k'u'lan ja jas
a'ji a k'u'luki.
22Ja k'ole sb'a Dani jach' yala yab' jastal iti:
—Ja we'n Dan lajana sok jastal yal choj,
wa'n b'ajtel jan man b'a Basani.
23Ja k'ole sb'a Neftaliji, jach' yala yab' jastal iti:
—Spetsanil ja jas waxa k'u'lani
jel lek xyila ja Dyosi.
Ja'yuj jel lek oj yil'a ja Dyosi
jach'ni cho niwan lu'um oj ya'wi,
spetsanil ja b'a ko'el k'inal
b'a paman ja' b'a Galilea.
24Ja k'ole sb'a Aseri, jach' yala yab' jastal iti:
—Ja Dyosi, jel niwan oj yil'a ja we'n
yuj ja tuk k'ole jumasa.
—Spetsanil ja israelenio jumasa
jel oj sk'an a.
—Jel oj ajyuk a wuj
ja aceite olivo.
25Ja janek' ay ja wa sak'anili
jel tsats oj ajyanik
jaxa wa chonab'ilexi, talnanub'al lek.
26Yajni ch'ak yal ja Moisesi, jach yala:
—Israelenio jumasa,
mey pilan Dyos ja jastal wa Dyos we'nlexi.
Ja Dyosi, ye'n mandaranum b'a satk'inali,
oj ni cho jak skoltaya'a.
27Ja Dyosi, mini oj ch'akuka,
spetsanil k'ak'u oj stalnaya;
oj ya spak ajnel ja ma mi lek xyilawexi,
b'a jach' oj sch'ay sna'jele.
28—Ojxa b'ob' a wa' niwan a k'ujol,
laman ajyan.
Ja wa wa'eli, mi oj ch'akuk jach'ni ja ya'lel ts'usub'i,
ye'n oj ya po'xuk ja Dyos ja wa walaji.
29—Jel lek waxa wila israelenio,
yuj ja skoltaya ja Dyosi.
Dyos wa stalnaya sok wa skoltaya.
—Me'y pilan ma' oj skoltaya ja jastal ja ye'n.
—Ja we'n mi oj wa k'umanuk ja ma mi lek xyilawai,
ti oj ja wa b'a yib' a wok.
Currently Selected:
Deuteronomio 33: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
