Deuteronomio 32

1—Satk'inal sok lu'um,

—Maklayik lek ja jas oj kali.

2Ja jas oj kali, jel lek

jach' jastal ja ja' wax jak b'a satk'inali,

wa xya po'xuk ja tek'ul jumasa jach'ni

ja k'ul b'a witsi.

3—Wax k'ana oj toy ja jtatik Dyosi;

jaxa we'nlexi, —Na'awik jel ja yipi.

4Ye'n wa stalnayotik.

Ja ye'n jun Dyos jel toj sok jel lek,

spetsanil k'ak'u lek ja jas wa sk'u'lani.

5-6Israelenio jumasa,

ja Dyosi, ye'n sk'u'lanex;

ja ye'n jach' jastal jun lekil tatal.

Jaxa we'nlexi jel kistal

a ta'ojex ti.

Jel ch'u'uyex sok mi jas waxa na'awex,

mi sb'ejuk oj yuntikilukex.

—Yuj ja jun k'ole kristyano jel kistalexi.

7—Neb'awik t'unuk

ja jastal ek'el yuj ja wa mojex jumasa:

Ja wa nan a tatexi, sok ja ma'tik jel niwak ja ya'teli

oj yal'e a wabyex ja jas naka ek'eli.

8Ja yajni ch'ak spil ja kristyano jumasa ja Dyosi,

tuktukil k'ole sk'u'lan,

sok tuktukil chonab' ya wajuk,

jujune k'ole ya'yi slu'um;

jaxa we'nlex israelenio jumasa,

ya'oj jun strato a mokex mi tukuk:

9Ja we'nlexi, stsa'unejex ja Dyosi,

oj ochanik yuntikilil.

10—Ja yajni sta'awex ja Dyosi,

ti ayex b'a jun takin lu'um k'inal,

b'a jun lu'um mesub'al xta yuj ja ik'i.

Jaxa ye'n yi'ajex sok ja sk'ab'i,

sok stalnayex ja jastal wa stalna ja sati.

11Ja Dyosi, stalnayex lek

ja jastal wa stalnan ja yuntikil ja likliki.

Ja Dyosi, ti'ni mojan ay a mokex

b'a oj skoltayex b'a lek oj ek'uk a wujilex.

12—Ye'n ja Dyos sje'a yi jas oj sk'u'luk ja yuntikili,

mi makuni yuj pilan dyos b'a oj koltajuk yuj.

13Ye'n ya'a b'ob'uk awujilex ja Dyos

ja b'a cha'anil wits b'a chonab' jawi.

Ya'a lo'ex tek'ul sb'a wits;

b'a jun patak' ya' el ya'al chab'

b'a oj ya chib'uk ja sts'ujmil ja wa ti'exi,

b'a jun tsatsal patak' ya eluk

ja aceite b'a oj makunuk a wujilexi.

14B'a wa wakaxex, b'a wa chiva'ex, b'a wa chejex

ya'we el lech sok ya'we ston sb'aj;

chapub'al lek ja jas oj ja wabyexi

b'ak'tel wakax b'a lek lek.

Ja waj a we'awexi, ja b'a leki

jaxa ya'al ts'usub' a wu'ajexi, ja b'a leki.

15—Ja israelenio jumasa ch'ak kojluke,

ja'yuj sch'aya sk'ujole ja Dyosi;

—Ch'ay sk'ujole ja ma k'u'lajiye yuji.

Ya'we kan pilan ja jastal talnajiye

yuj ja Dyosi, sok ja jastal koltajiye'i.

16-17Ya'we tajkuk ja Dyosi,

ya'we k'e skoraja yuj ja

lom och stoy'e pilan dyosi;

—jun tantik kistal k'u'lub'al dyos

mini ja ma ek' paxta yujile'i, mi sna'awe sb'aj.

Jachuk ya'we yi smajtan

ja tatik dyos jawi, lajan sok jani stoyowe ja tan pukuj ja.

18—Ja israelenio jumasa ch'ay sk'ujole ja Dyosi;

ja Dyos ma a'jiyi'e ja sak'anile'i.

Ya'we kan pilan ja ma k'u'lajiye yuji;

sch'aya sk'ujole ja ma koltajiye yuji.

19Ja'yuj ja Dyosi, jel tajki

ch'ak spil el ja b'a sts'e'eli.

20Ti cho yala yab' ja kristyano'i:

Oj ka'wex kan a tuch'ilex

ti oj ja wil'ex jastal oj ek'uk a wujilexa.

Ja smeranili, yujni jel kistalexa;

mix b'ob' niwan k'ujolaxanik.

21We'n waxa k'u'lan ja wa dyosex

b'a oj ja wa'wex tajkukoni;

jayuj ja ma' jel oj tajkuki we'nlex,

mas lek oj tukb'esex sok tuk kristyano jumasa;

oj tukb'esex sok kristyano jumasa b'a mi jas sna'awe

sok ma mix k'ot b'a chonab'.

22Jel xa a wa'wexta k'e'ki ja tajkeli

ja tajkeli lajan sok jastal wa x'ajli ja k'ak'i;

sok ja k'ak' jawi ja oj ch'ak sok

ja lu'um jumasa b'a jel niwaki

sok ja niwak yax k'ul jumasa.

23Jel oj ka' a wi'ex ja wokoli;

oj yajb'esex sok ja jpul te'i.

24Ja' wa'in sok ja chamel jumasa

ja oj ch'ak a na'jelex sok.

Oj jip a b'ajex mal chan b'a k'ul

sok b'its'il chan b'a kistal lek.

25B'a yoj kaye oj miljuk ja wa wuntikilexi,

spetsanil ja kristyano jumasa jel oj xiwuk

ja oj yil'e jastal oj chamuk ja ma'tik ay xa sk'ujoli,

ja keremtiki, ja ak'ixuki,

sok ja yal untik jumasa.

26Jneb'a oj ch'ak ka

wajanik xa'an tikan

b'a tuktukil chonab',

b'a mixa ma ojto sna'ex.

27Cho sna'a mi oj jk'uluk

yuj ja ma'tik mi lek wax yilawoni;

jneb'a jel oj sk'e'nayone,

cho jneb'a ay jastal oj yal'e

mi ke'nuk ja ka'yi'e wokol ja israelenio jumasa,

oj b'ob' yal'e ja jas ek'i,

—jmul ke'ntik yuj ja jel tsats xka' a jb'ajtiki.

28Ja we'nlex israelenio jumasa,

mi jas xa na'awex, sok mixa wabyex sb'ej.

29Ja lek wanuk xta xa na'awex t'unuki,

oj ja na'ex jas wokolil ja oj ek'uk a b'ajexi.

30¿Ja sb'ej ja waxa walawex

malan sok jun israelenio

ya ajnuk mil soldado?

¿Ja sb'ej ja waxa walawex chab' israelenio

ya spak ajnel lajune mil soldado?

—Mokxta ke'nuk ti ajyiyon a mokexi

mini oj b'ob' a awujilex,

ja kechan we'nlexi, mini jas oj b'ob' a k'u'lukexa.

31—Wa sna'awe lek ja ma mi lek xilawotiki

ja dyos yujile'i mini ay yipa;

—Ja Dyos kujtiki, ay ni lek yipa.

32Ja ye'nle'i jachuke jastal

swinkil ja Sodoma sok ja Gomorra.

Lajane sok jastal jun ib'e tek'ul

b'a toj paj wa satini;

33—Jachuk ja ya'lel ts'usub' wax ya'we eluki

lajan sok jastal sbeneno ajuchan.

34-35—Ja jtatik Dyosi, yalunej:

Jel xa mojan oj ka'yi'e ja swokole'i,

—jel xa mojan oj ch'ay sna'jele.

—Kechan wa'non smajlajel jas k'ak'u

oj ch'ak ka stup'e.

36—Yajni mixa ayuk ja kiptiki,

ja jtatik Dyosi oj skoltayotik;

yajni xyila ch'aktikta

oj stalna jya'ujlaltik

37Ti oj yal yab' ja ma mix yilawotik leki:

¿B'ay ja dyos jumasa it jel

niwan a k'ujolex ja we'nlex b'a?

38¿B'ay ja dyos jumasa it a

wi'ajex ochyi smajtan b'a?

—Alawik yab' a jak skoltayex.

39—Ja ya'n na'awik lek

kechan ke'n Dyoson.

Kechan ke'n wax ka tojb'uk ja yajb'el jumasa;

—Kechan ke'n wax ka'a ja wa sak'anilexi,

cho kechani ke'n oj b'ob' ka eluka.

—Sok ja ke'n mini ma oj eluka.

40Oj lik nalan cha'an ja jk'ab'i,

oj kale, spetsanil k'ak'u ni sak'anona,

41oj nuk lek ja jmachit,

b'a oj ka stup ja smul ja mi lek xyilawoni.

—Jach' oj ka stup'e ja jastal wax k'ana

yuj ja kristyano jumasa jawi jel tajkel wax yilawone.

42—Ja jpul te'i oj po'xuk

sok schik'el ja kristyano jumasa.

—Oj ch'ak jk'uts yi ja s'olom

spetsanil ja ma'tik ay ya'tel yujile'i.

43—Jaxa we'nlex kristyano jumasa ma'tik mojan ayexi,

ajyanik tsamal sok ja yuntikil ja Dyosi,

ja ye'n ojni ya stup ja ma'tik

ch'ak miljuk yi yuj ja yuntikili.

—Ja Dyosi ojni sch'ayi ja smul ja yuntikila

mixa ni ma oj ya sta smul ja kristyano jumasa ja wa.

44-45Yajni wa'n sts'eb'ojtajel ja Moises ja ts'eb'oj it b'a sti' sat ja kristyano'i, jaxa Josueji, ti'ni ay b'a sts'e'ela.

Ja jas tsa'an yala kan ja Moisesi

46Tsa'an ti yala yab' ja kristyano ja Moisesi:

—Spetsanil ja jas ch'ak je'a wi'exi, neb'awik lek, a'wik yi lek ab'al ja wa wuntikilex keremi sok ja wa wuntikilex ak'ixi, a sk'u'uke jujune ja ab'al jumasa iti. 47Ja jas wax kala wabyexi jel niwan. Ta oj k'a a k'u'ukexi, jel jitsan k'ak'u jumasa oj ajyuk wa sak'anilex ja b'a lu'um it oj a wi'ex kani, ja lu'um iti ti'ni ay b'a k'ax yuj ja niwan ja' Jordani.

Ja Moisesi, yila ja lu'um sk'apa ja Dyosi

48Ja Dyos ja jun xta k'ak'u jawi, yala yab' ja Moisesi:

49—Wax k'ana oj wajan b'a yax k'ul Abarim, k'e'an b'a wits Nebo it tey b'a slujmal Moab b'a mojan sok Jerico. Ti oj b'ob' a wil b'a wits jaw ja chonab' Canaan b'a oj ka'yi'e ja israelenio jumasa, jel oj chamuk wa k'ujol ja yajxa wila.

50—Ja we'n ti oj chaman b'a wits Nebo sok ti oj mukjan tiwi, yuj ja jach'ni mukji ja wa b'ankil Aaron ja yajni cham b'a wits Hor. 51Ja we'n sok ja Aaroni, a k'okowex ja ab'al ja yajni ti' ayex b'a lu'um Cadesi, jach'ni ja yajni ti ayex b'a sti' ja niwan ja' Meriba it tey b'a takin lu'um k'inal b'a Sini. B'a sti' sat spetsanil ja israelenio jumasa mi a kisawonex. 52Ja'yuj mi oj ka ochan ja b'a lu'um jk'apa a wi'i, kechan oj b'ob' a wil najat.

Currently Selected:

Deuteronomio 32: YABD

Highlight

Copy

Compare