Deuteronomio 34
34
Cham ja Moisesi
1Ja Moisesi, man b'a takin lu'um k'inal b'a Moab, k'e' b'a wits Pisgaj, kajpuji ja b'a cha'anil ja wits Nebo, tey b'a sti' sat ja chonab' Jerico. Ti je'ji yi tiw yuj ja Dyos ja chonab' jumasa b'a Galaad sok b'a Dani. 2Cho je'ji yi ja lu'um jumasa b'aye ja k'ole sb'a Neftaliji, sb'a Efrain sok sb'a Manasesi, jach'ni ja lu'um b'aye ja k'ole sb'a Juda, man b'a niwan paman ja' Mediterraneo. 3Man b'a cha'anil wits jawi, b'ob' yil ja Moises ja witsiltik b'a ko'el k'inali, ja loman yaman b'a Jordani, ja lajan lu'um jumasa joyb'anub'al yuj ja chonab' Jerico, man b'a chonab' Soar b'ob' yile. Ja Jerico wax cho ya'we sb'i'iluk schonab'il xa'analtik.
4Ja Dyosi, ti yala yab' tiw ja Moisesi: —Ja' chonab' jumasa iti, ja oj ka'yi'e ja israelenio jumasa. Jach' kaloj yabye ja Abrahami, ja Isaak sok ja Jacob ma ek' paxta a wujili. Jach' wax k'ana oj ja wile, yuj ja we'n mi oj b'ob' ochan.
5-6Jaxa Moisesi, spetsanil k'ak'u ni ti wa'n a'tel jan sok ja Dyosi. Ja jastal alji yab' yuj ja Dyos oj chamuki, jach'ni waj ja, ja Moisesi, ti cham b'a Moab, b'a sti' sat ja lu'um Bet-peori, b'a junxta lu'um jawi ti'ni mukji'a, mini ma wa sna'a ja smeranil b'a mukana. 7Ja yajni chami, ay yi'oj wak tajb'e (120) jab'il, lek to ay lek, wantox ilwani lek.
8Ja israelenio jumasa, jun tajb'e lajune (30) k'ak'u ti kanye b'a wits Moab, b'a oj ok'uke yuj ja cham ja Moisesi. Yujni ja k'ajyele ja najate'i. 9Ja yajni mitox cham ja Moisesi, ya'a kajan ja sk'ab' b'a s'olom ja Josueji, jaxa Dyosi, ye'n ch'ak ya sna' jasunk'a oj sk'u'luki. Ja'yuj sk'u'ane ja israelenio jumasa ja jas wax yala ja Josueji, sok sk'u'ane ja ab'al jumasa ja Dyos it a'jiyi ja Moisesi.
10Yajni cham ja Moisesi, mixa ni ajyi pilan aluman Dyos ja jastal ja ye'n wa sk'uman sb'aj sok satilajel ab'al ja Dyosi. 11Kechan ye'n ja Moises b'ob' a'ji sk'u'l yuj ja Dyos ja a'tel sk'u'lan b'a Egipto sok ja smandaranum ja chonab' jawi. 12Mini jun ma b'ob' sk'ul pilan ja jastal sk'u'lan ja Moisesi, mini jun ma b'ob' sk'u'luk ja jas jel niwan sk'u'lan yilawe ja israelenio jumasa.
Currently Selected:
Deuteronomio 34: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
