Deuteronomio 31
31
Och jun yajk'achil ma' niwan ya'tel yuj ja israelenio
1Ja Moisesi, sk'uman sb'aj sok pilan majke ja israelenio jumasa, ti yala yabye'a:
2—Ja ke'n ay xa ki'oj wak tajb'e (120) jab'il, mixa oj b'ob' kuj ja ke'nto oj k'el ja swokol ja israelenio jumasa. Cho jach'ni ja Dyosi mi oj sk'an oj ek' jk'uts ja niwan ja' Jordani. 3Ye'n oj stalnayex, ja b'a oj ek'aniki ye'n oj ch'ak sch'ay sna'jel ja kristyano jumasa. B'a jach' we'n oj ja b'ajukex ja lu'um jawi. Ja'yuj ja Dyosi, yalata ja ma' yajk'achil oj och ya'teli, ja Josueji.
4—Ja kristyano jumasa ma oj snol k'ab'ukexi, ye'n oj sch'ay sna'jel ja Dyosi, jach'ni ja jastal sch'aya sna'jel ja ma ay schol jumasa Og, sok ja Sihoni, ch'ak ch'akjuk ja slu'ume'i. 5Yajnix b'ob' a wujilexi, jach' oj ja k'u'lukex spetsanil ja jastal kaloj a wabyexi. 6Tsats ajyanik tsatsal k'ujolan a b'ajik, ye'n ja Dyos oj tiro'anuk yuj ja we'nlexi; mok xiwanik yuj ja kristyano jumasa jawi, ja Dyosi mi oj ya'wex kan a tuch'ilex.
7Tsa'an ja Moisesi, ti spaya ja Josueji, b'a sti' sat spetsanil ja kristyano'i ti yala yab'a:
—Ja we'n Josue, jel t'ilan tsats oj ajyan, sok tsatsal k'ujolan lek a b'aj, yuj ja we'n oj ja wa ochuk ja kristyano jumasa ja b'a lu'um k'apji yi'e yuj ja Dyos ja ma ek' paxta a wujilexi. We'n oj wa el kan yi'e ja lu'um jawi. 8Ye'n ja Dyos oj sje' b'a oj wajaniki, spetsanil ye'n oj skoltaya; mini b'a oj ya'wa kan a tuch'ila. —Mok xiwan, mok cho axwan.
K'umaji ja ab'al jumasa
9Spetsanil ja iti, ch'ak sts'ijb'a ja Moisesi, ya'yi b'a sk'ab' ja ma'tik ay ya'tel yuj ja israelenio, sok ja pagre jumasa ma'tik wa slikawe ek' ja skajonil strato ja Dyosi. 10-11Ti cho yala yab' aj kristyano jumasa:
—B'a juktike (7) jab'il oj k'u'laxuk ja sk'inil b'a oj ch'ayxuk ja jelal jumasa. Ja jab'il jawi, yajni ti xa tsomane ja israelenio jumasa b'a oj sk'u'luke ja sk'inil ja lejchupati, ti oj k'umaxuk tiw ja ab'al it kanel ts'ijb'anub'ali. 12A petsanilex mi ma oj kan mi oj wajuk ja b'a k'in jawi: Winik, ixuk, yal untik sok ja matik jakel pilan chonab'i. B'a ti oj ja maklayex jas oj yal ja ab'al it kan ts'ijb'anub'ali. 13Cho jach'ni wa wuntikilex b'a tsa'anxa ajyi, mito wa sna'awe ja ab'al iti, oj smaklaye b'a jach' oj sk'u'uke ja Dyos ja ye'nle'i. Ja iti, ja jach' oj ja k'u'lukex ja yajni ti ayex k'ot b'a k'ax niwan ja' Jordan b'a it ojto a wi'ex kani.
Ja Dyosi, yala yab' jas oj sk'u'luke ja Moises sok ja Josueji
14Tsa'an ja Dyosi, yala yab' ja Moisesi: —Wa'nxa mojxel ja k'ak'u oj chamani. Ja'yuj wax k'ana ja we'n sok ja Josueji, la'ik b'a snajtsil tsomjel, b'a ti oj kal a wabyex tiw ja jas oj ja k'u'lukexi.
Jaxa Moises sok ja Josueji, waj ye'ni ja b'a snajtsil tsomjela, 15jaxa b'a wa x'ajyi ochel b'a yoj najtsil tsomjeli, ti sje'a sb'aj tiw ja Dyos b'a jun tsome ason. 16Ti alji yab' ja Moises yuj ja Dyosi:
—Jel xa mojan ay ja k'ak'u oj chamani. Yajni xwaj ek'uk ja iti, mixa ojto sk'u'ukone ja israelenio jumasa, ja oj och stoy'e ja sk'u'lub'al dyose ja kristyano jumasa b'a chonab' jawi. Oj sjip'one kani, mixa ojto sk'u'uke ja jas schapa soke'i. 17Jel oj ya'we tajkukon, ja lek oj jip'e kani; oj cho ka'yi'e jitsan wokol. T'ilan oj jak sk'ujole, mixa wax talnaye. 18A'nima xjaktoni sk'ujole'a, jaxa ke'n najat oj ajyukon soke. Jach' oj ka stup'e yuj ja lom wa xwaj stoy'e k'u'lub'al dyosi.
19-20—Yajni k'i'aj je och ja israelenio jumasa b'a lu'um it kaloj oj ka'yi'e'i, oj wa'uke kojlel xta oj ajyuke, ja tiwi jel ja jas oj yabye'i. Jachuk ojni sch'ay'one sk'ujole'a, oj och stoy'e k'u'lub'al dyos, mixa ojto sna'e ja jas schapa jk'u soke'i. Ja'yuj wax k'ana ja we'n sok ja Josueji, ts'ijb'anik kan ja ts'eb'oj it oj kala wabyexi. Wax k'ana oj ja je'ex yi sts'eb'ojtajel ja kristyano jumasa. Yajni wa'ne sts'eb'ojtajeli, ti oj jak sk'ujole spetsanil ja jas kaloj yabye'i, mi oj b'ob' yal'e: Sok ja iti, mini jas jna'atika. 21Yajnix yabye syajal ja wokol jumasa oj ka'yi'e'i, ti oj jak sk'ujole ja jas wax yala ja ts'eb'oj iti; jaxa yajni oj sts'eb'ojta ja yuntikile'i, t'ilan oj jak sk'ujole' sb'ej ni ja jas wa xk'u'lan yi'e'a. A'nima mito ti ayuke b'a lu'um oj kayi'e'i, wax na'a lek jastale, wax cho jna'a jastal oj sk'u'luke.
22Ja junxta k'ak'u jaw ja Moisesi, sts'ijb'a ja ts'eb'oji, cho ya sneb' ja israelenio jumasa. 23Jaxa Josueji, ti alji yab' yuj ja Dyosi: —Jaxa we'n Josue jel t'ilan tsats oj ajyan, sok tsatsal k'ujolan a b'aj. Chikan jastal oj ek'uk a wuj ke'n oj jkoltaya, we'n oj wa' ochuk ja kristyano jumasa ja b'a lu'um kaloj yabye'i.
24Yajni ch'ak sts'ijb'a ja Moises spetsanil ja yab'al ja Dyos b'a jun ju'un ja jas jejiyi'e yuj ja Dyosi. 25Ti'xa ya'yi ja pagre jumasa ma'tik wa slikawe ek' ja skajonil strato ja Dyosi:
26—Ti yala'a, it b'ay jul ja yab'al ja jtatik Dyosi. Ti'xa wa'wex och b'a yoj skajonil strato, oj makunuk lek kuj, b'a oj kil ta oj k'okxanik, 27yuj ja wanix na'a lek jastalexa. Wax na'a jel ch'u'uyex, sok jel tuk ja jastalexi. Waxa k'okowex ja yab'al ja Dyos ja ti'to ayon a mokexi, ¿Ja'uktoma ja yajni chamyonta?
28—Ja'yuj ja lek tsomowik spetsanil ja ma'tik ay ya'tel yuj ja kristyano jumasa, sok ja ma'tik ay ya'tel b'a k'ole jumasa, b'a jach' oj a'xuk kan lek chikan ja iti: Ja ke'n wa xka'a kan b'a wa k'ab' we'nlex ja yab'al jumasa ja Dyosi. Ja iti wa sna'a lek ja ma tey b'a satk'inal sok b'a lu'umi. 29Ja ke'n wax na'a lek, ja yajni la chamyoni oj ja wa'wex kan sk'u'ajel ja Dyosi, mixa ojto a k'u'ukex ja ab'al jumasa ka oj ja wi'exi. Ja'yuj jel ni oj ja wi'ex ja wokol yuj ja jel oj ja wa'wex tajkuk ja Dyosi.
Ja sts'eb'oj ja Moisesi
30Yajni ti'xa tsomane ja israelenio jumasa sok ja Moisesi, ti och ya sneb' ja sts'eb'oj it alji yab' yuj ja Dyosi:
Currently Selected:
Deuteronomio 31: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
