Deuteronomio 30

Mi oj aji a tupe sok ay slekilal

1Ti cho yala ja Moisesi:

—Ja ya'n wanxa xa na'awex ja slekilal oj ja ta'ex ta wan k'axa k'u'anex ja Dyosi, wa xcho a na'awex ja jas mi lek oj ja ta'ex ta yuj k'a w'axa k'okowex ja yab'al. Ja Dyosi, oj ya a tup'ex najat lek oj sjek ex b'a wa chonab'ilexi, ti oj ch'ak jak a k'ujolex ja jas kaloj a wabyexi. 2Kechan ta ojto k'a kumxanik sok ja wa wuntikilex oj cho a k'u'ukex ja Dyos sok spetsanil wa k'ujolex sok wa waltsilexi, oj k'a a k'u'ukex ja yab'al jumasa ka oj ja wi'exi, 3-5ja Dyosi, oj stalna a ya'ujlalex oj cho yil'ex lek. A'nima najatuk lek ya wajanik, oj ya kumxanik b'a ti oj ajyanik ja b'a chonab' it sk'apayi ja ma ek' paxta a wujilexi. Ja tiwi jel oj ja ta'ex jastal oj ek'uk a wujilex, jel oj pojxuk ja wa wuntikil we'nlex yuj ja ma ek' paxta a wujilexi. 6Ja Dyosi, oj ya ch'ayuk a k'ujolex sk'u'lajel ja jastik b'a mi lekuki. Jaxa we'nlex sok wa wuntikilexi, oj ja yajtayex lek oj ja k'u'ukex sok spetsanil ja wa waltsilexi, sok spetsanil ja wa k'ujolexi, mi ma oj st'en'ex, ja jachuki, jel jitsan k'ak'u oj ajyuk wa sak'anilex ja b'a lu'um iti.

7—Ja Dyosi, ye'n oj ya'yi wokol ja ma mi lek xyilawexi, sok ja ma' jel tajkel snochowexi. 8Jaxa we'nlexi, t'ilan oj kumxanik b'a oj ja k'u'ukex ja ab'al jumasa wa xka' wi'ex ja ya'n. 9Ta' a k'u'lanex k'a, jel tsamal oj ajyuk a mokex ja Dyosi, sok jel ni lek oj ya ek'uk a wujilexa. Ja wa wuntikilexi jel jitsan oj ajyuk ja keremi, jach'ni ja ak'ixi, jach'ni ja wa wakaxexi, jel oj ajyuk wa jas a b'ajexi. Jach' oj sk'u'luk a wi'ex b'a lek ja Dyosi, ja jastal sk'u'lan jan yi ja ma ek' paxta a wujilexi. 10Spetsanil ja jas oj ja k'u'lukex ja we'nlexi, kechan a wi'kan pilan ja b'a jas kistal sk'u'lajeli, k'u'anik ja Dyos sok spetsanil ja wa waltsilexi, sok spetsanil ja wa k'ujolexi. K'u'anik spetsanil ja ab'al jumasa ts'ijb'anub'al b'a ju'un iti.

11—Ja ab'al jumasa iti, mi wokoluk sk'u'ajel, chikan ma' oj b'ob' sk'u'luk. 12-13Mi wokoluk wax ab'xi sb'ej, mi wokoluk oj yab' oj yala wabyex ja sb'ej b'a oj ja k'u'ukexi. 14Yuj ja mini t'un wokoluki ja'yuj chikanxta ma wax b'ob' yab' sb'ej, sok ti'xani ay b'a sk'ujole sok b'a sti'e'a. A petsanilex oj b'ob' ek ka k'u'lukex ja ye'nle'i, oj b'ob' a lo'ilukex, sok ojni a k'u'ukexa.

15—Ja ya'n oj b'ob' a tsa'ex b'ay ja waxa k'anawexi. ¿Wan maxa k'ana lek oj ek' a wujilex, ma waxa k'anawex mi lek oj ek' a wujilex? ¿Ja ma waxa k'ana ja wa sak'anilexi, ma ja waxa k'ana wa chamel ch'akelexi? 16Ta oj k'a a yajtayex ja Dyosi, oj k'a cho a k'u'ukex spetsanil ja yab'ali, oj ni yil'ex leka. Sok jitsan jab'il oj ajyuk ja wa sak'anilex ja b'a chonab' ojto ya' wi'exi, jel oj pojxuk ja wa wuntikilexi. 17Kechan ta mixa k'u'anex waj k'a xa toyowex k'u'lub'al dyos, 18Ja smeranili oj ni chamanika. Mi oj b'ob' kananik ja b'a chonab' ojto ka'wi'ex b'a k'ax ja' b'a niwan ja' Jordani.

19—Ja satk'inal sok ja lu'umi, wa sna'awe ka'ta a tsa'ex b'ay waxa k'anawexi, ja' ma wa sak'anilexi, ma ja wa chamel ch'akelexi, b'a slekil ma b'a mi lekuk. Ja ke'n oj kal a wabyex sok ja wa wuntikilexi, ja lek ja' xa stsa'awex ja wa sak'anilexi, 20sok yajtayik ja Dyosi, k'u'anik b'a spetsanil k'ak'u ja jas wax yala. Chikan jaye k'ak'u oj ajyuk wa sak'anilex ja b'a chonab' sk'apunej yi ja ma ek' paxta a wujilexi.

Currently Selected:

Deuteronomio 30: YABD

Highlight

Copy

Compare