Deuteronomio 29
29
Ja strato ja Dyos sok ja israelenio b'a Moab
1-3Ja Moisesi, ch'ak yal yab' ja israelenio jumasa spetsanil ja jas wax yala ja b'a jas chapawe sok ja Dyos sok ja kristyano jumasa b'a wits Horebi. Ti cho yala ja Dyosi, a sk'u'l yajk'achil majke sok ja kristyano jumasa b'a Moabi. Jaxa Moisesi, stsomo ja kristyano jumasa ya'yi ja yajk'achil ab'ali, ti yala'a:
—Ja we'nlexi ch'akni a wil'ex jastal jel tsamal sk'u'lan ja Dyos ja yajni ya'yi wokol ja egipsiano jumasa. A wilawex jastal sk'u'lan yi' ja ma ay schol yujile b'a Egipto, ja ya'tijum jumasa, sok spetsanil ja kristyano jumasa tak. 4Man ya'n mitox ya'a na'ex jas yuj ja jach' sk'u'lan ja Dyosi. 5-6Yojol chab' tajb'e (40) jab'il stalnayex ja b'a yoj witsi, mini b'a mi a ta'a ja wa wa'elexi. Spetsanil ja k'ak'u jumasa jawi mi ch'ak ja wa xanab'exi, mini wa k'u'exi, jach' sk'u'lan b'a oj jak a k'ujolex ye'nani ja wa Dyosexa.
7—Yajni ti'xa jakumotikon jan b'a lu'um jumasa ili, el stim'otikon b'ej ja ma ay schol jumasa b'a Hesbon sok b'a Basani, snol k'ab'inotikone. Jayuj mi jas b'ob' yujile ke'ntikon b'ob' kujtikon. 8Japatikon yi' ja slu'ume'i, ja ka'tikon yi'e ja k'ole jumasa sb'a Rubeni, sb'a Gadi, sok snalan ja k'ole sb'a Manasesi. 9Ja'yuj wax k'ana oj ch'ak a k'u'ukex spetsanil ja jas wax yala ja jas schapani, b'a jach' lek oj wajanik sok spetsanil ja jas oj ja k'u'lukexi.
10—Ja ya'n spetsanil ja israelenio ti tsomane il b'a sti' sat ja Dyosi. Ti aye' ja ma' jel niwak ja ya'tele' b'a jujune' k'ole'i, ti aye' ja ma'tik ay schole b'a na'its wax ajyi tsomjeli, ti aye' ja ma'tik ay schole b'a chonab'i, ti aye' spetsanil ja winiki, 11ja ixuke'i, ja yal untik jumasa. Cho ti aye' ja matik jakel pilan chonab'i, ma wa sk'utsuwe ja si'i, sok ja ma'tik wa skuchuwe ja ja'i. 12Ti aye' ili, yuj ay jas oj yal'e'. Ja oj yal'e' oj sk'u'uke spetsanil ja jas schapawe sok ja Dyosi, oj sk'u'uk a mokex ja ya'n. 13Ja Dyosi, wax yala ja ya'n ye'nani ja Dyos kujtika, jach'ni ja jastal yala yab' ja Abrahami, ja Isaak sok ja Jacob ma ek' paxta kujtiki, jach'ni ja ke'ntiki, wax kalatik yujni ye'n yuntikilotika. 14-15Ja jas schapxi iti, mi kechanuk ke'n jb'ajtik. Ja Dyosi, wax yala cho sb'ajni spetsanil ja kintiltik jumasa.
Ja stoyjel ja dyos k'u'lub'ali
16—Na'awik t'unuk ja jastal ajyitik b'a Egipto, sok ja jastal ek' jk'uts ta la'uktik jan ja niwak chonab' jumasa b'a oj julkotik ja man ili. 17Ja kristyano jumasa jawi, wa sk'u'ane dyos k'u'lub'al, jaxa ke'ntiki kilatik ja dyos tojb'el yujile sok te', sok ton, sok k'anal tak'in, sok sakal tak'in, —Ja jaw jumasa mi lek wax yila ja jtatik Dyosi. 18Ja'yuj ixuke winike, k'ole jumasa, wax k'ana a wi'ex ts'akatal mok ma ya'kan pilan ja jtatik Dyos b'a ja oj stoy ja k'u'lub'al dyos jumasa. Ja ma jach' oj sk'u'luki, lajan sok jastal jun k'ul b'a mi lekuk, kechan wa'n sle'jel sch'ayelal.
19—Ja ma wa smaklan ja jas wax yala ja jas schapxi iti, wa'n k'a sk'u'an mi jas oj ek'uk ta wan k'a sk'oko, jelni ch'ayel aya. Yuj smul ye'na ti oj yi' wokol ja tuk smoj jumasa, 20-21mi oj iljuke lek yuj ja Dyosi, oj a'ji ko' sb'aje ja jastik b'a mi lekuki it wa'n yaljel ja ju'un iti. A'nima pilanuk ay sok ja k'ole'i, sok a'nima ye'nxa tsa'anuk oj chamuk yuj ja yintil jumasa, —Tsats lek oj a'ji stup yuj ja Dyosi.
22—Ja ma tsa'an oj manxuk yuj ja israelenio jumasa, sok ja polestero ma'tik oj jak b'a najtil chonab' jumasa, oj yil'e' ja niwak wokol sok ja niwak chamel oj ya'ki'tik ja jtatik Dyosi. 23Yajni oj sk'el'e ja jlu'umtiki, kechan oj yil'e asufre, ats'am, tsikel lu'um. Mi oj b'ob' a'tijukotik sb'aj ja jlu'umtiki, yuj ja lu'um jawi mini oj ya' sb'a'al, mini sk'ujlal oj k'i'uk. Jach' oj sk'u'luk ja jastal sch'aka ja Sodoma, ja Gomorra, ja Adma sok ja Seboimi.
24—Spetsanil ja kristyano jumasa oj sjob'e: ¿Ja Dyosi, jastal lek jach' ya'yi jastal it ja wokol ja kristyano jumasa? ¿Jasunk'a jel a'ji tajkuk yuji? 25Ja ma oj sjak'i ti oj yala: Ja Dyos yujile'i, ye'n a'ji eluke b'a sk'ab ja yajni ti toj aye b'a yib k'ab'ali aye b'a Egipto, jaxa ye'nle'i, mi sk'u'ane ja jas wax yala ja trato sk'u'lan ja Dyos sok ja ye'nle'i. 26Cho stoyowe dyos k'u'lub'al mini t'un sna'awe sb'aj ja, sok mini t'un ja sk'u'lub'al yi'e'a. 27Ja'yuj jel tajki yujile ja Dyosi, ja'yuj ch'ak jekjuk yi'e spetsanil ja wokol wax yala ja ju'un iti. 28Ja'yuj ch'ak, nutsjuke el ja b'a schonab'ile'i, ti jekjiye ja b'a chonab' aye' ja ya'n, jach' jastal it ja stajkel ja Dyosi.
29—Ay ni ja swa snak'a ja Dyosi, ay jas kechan ye'n wa sna'a, jaxa ja ke'ntiki ya'oj ki'tik spetsanil ja yab'al jumasa, b'a oj k'u'uktik ja ke'ntiki, sok ja kintiltik jumasa.
Currently Selected:
Deuteronomio 29: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
