Deuteronomio 2
2
Ja israelenio b'a takin lu'um satk'inali
1Tsa'an sjekawon ja Dyos b'a oj ki'ex och b'a takin lu'um k'inal b'a sb'ejlal ja niwan paman ja' it jel yakili. Jel alb'i b'ejyitik ja b'a yoj yax k'ul Seiri, 2-12jaxa Dyosi, yila jel xa b'i alb'itikta ja tiwi, ja'yuj ti'xa yala ti b'i la wajtikik b'a k'e'el k'inal.
—B'ajtan yala kab'tik yajni la ek'tik ja b'a slujmal Seiri, mi b'i jas oj kaltik yabye ja yintil jumasa ja Esauji, yuj ja sb'aj ye'n ja lu'um jawi. Ja b'ajtan leki ti ajyiye tiw ja horeos jumasa, ch'ayji sna'jele yuj ja yintil jumasa ja Esauji, ja'yuj ye'n yi'aje kan ja lu'um jawi. Jachuk yala ja Dyos mi b'i xen oj ya'ki'tik ja lu'um jumasa jawi, a'nima wa xiwye kujtik ajyi ja swinkil jumasa, yalani mok jas mi lek oj k'ultik yi'e'a, tsa'an jna'atik jmoj alijel jb'ajtik b'i, kechan oj b'ob' jmantik yi'e ja jwa'eltik sok ja ja' oj makunuk kujtiki.
—Ja ke'n ka jul a k'ujolex, yuj ja jel lek yilawex ja Dyos yuj spetsanil ja jas a k'u'lanex ja yojol ja chab' tajb'e (40) jab'il jawi. Ja smeranil ja Dyosi, jel skoltayex sok jel stalnayex ja yajni b'ejyiyex ja b'a takin lu'um k'inali, ch'ak ni ya' awi'ex ja jas waxa k'anawexa.
—Ti'xta'a cho wajtik najat lek b'a sb'ejlal ja lu'um Araba, ti wa snochoyi ja b'ej b'a chonab' jumasa b'a Elat sok b'a Esion-gueber, ek'tik b'a Seir. Man tiwi ti jk'expun jb'ajtik b'a sb'ejlal ja takin lu'um k'inal b'a Moabi. Ti yala kab'tik tiw ja Dyos mi b'i jas oj kaltik yabye ja swinkil ja Moabi, yuj ja naka ja yintil ja Loti. Cho yala kab'tik mini xen oj ya'ki'tik ja lu'um jumasa b'a Ari, ja lu'um jawi sb'ajni ye'na'a. Ja ma' sb'aj ajyi ja lu'um jawi, ja emita jumasa, ja kristyano jumasa jawi, jel a'aye sok jel cha'anike jastal ja yuntikil ja Anaki. Mas jitsan wa sna'awe sb'aj ja kristyano jumasa jawi refaita, jaxa moabita jumasa ye'nle ja a'ji sb'i'iluke Emita'ili.
13—Ja Dyosi, yala la b'i b'ejyukotik man oj k'utstik ja uk'um Zeredi. 14-16Man eltik ja b'a Cades-barnea man ek' jk'utstik ja uk'um jawi, ek' jun tajb'e lajune sok waxake (38) jab'il. Ja k'ak'u jumasa jawi ch'akta chamuke ja israelenio jumasa, b'a miyuka ja yajni elye b'a Egipto ay yi'oje waxak lajune (18) jab'il. Ja Dyosi, yalani sok spetsanil yip oj sch'ay sna'jel ja kristyano jumasa ja wa.
17-18—Ti yala ja Dyos oj ek' jk'utstik ja b'a tik'an ja slujmal ja Moabi, ti b'i oj wajkotik b'a chonab' Ar. 19Jayuj b'ajtan yala kab'tik mok b'i jas jk'ultik yi ja amonita jumasa, naka ja b'i yintil ja Loti. Ja lu'um jumasa jawi mini xe'n oj ya'ki'tika, yuj ja ye'n ja Dyos ya'ta yi ja kristyano jumasa jawi.
20—Ja refaita jumasa, mi jach' wa xna'ji sb'aje yuj ja amonita jumasa, ja wax na'ji sb'aje'i zamzumita, ja b'ajtani ye'n ti ajyiye ja b'a lu'um jawi. Ja'yuj wax na'ji sb'aj ja ye'n ja tiwi, slujmal refaita. 21Ja zamzumita jumasa jel a'aye sok jel cha'anik jastal ja yuntikil ja Anaki. Jaxa Dyosi skoltan ja amonita jumasa b'a ch'ak sch'ay e' sna'jel, ja'yuj ye'n sb'a'ane kan ja lu'um jumasa jawi. 22Cho jach' sk'u'lane ja yintil jumasa ja Esau sok ja lu'um jumasa b'a Seiri. 23Jaxa filisteo jumasa ma'tik jakel b'a Creta, ch'ak smil'e ja heveo jumasa ma'tik mojan ay sok ja chonab' Gaza, jachuk ja ye'n yi'aje kan yi ja schonab'ile ja kristyano jumasa jawi.
24—Tsa'an cho yala kab'tik ja Dyos oj b'i b'ejyukotik man oj k'utstik ja niwan ja' b'a Arnoni, b'a oj ochkotik sok tiro'anel ja Sihon ja ma ay xchol yuj b'a Hesboni. B'ajtan sk'apa ki'tik ta b'ob' kujtik ja tiro'anel b'a ke'n oj kitik kan ja lu'um jumasa jawi. 25Cho yala kab'tik man ya'n spetsanil ja kristyano jumasa b'a lu'um jumasa oj xiwuke kujtik. —Kechan oj yabye oj ta'jukotik ti'i, jel b'i oj xiwuke sok jel oj cham sk'ujole.
Mi b'ob' yuj ja Sihoni
26—Ja yajni ti' ajyitikik b'a takin lu'um k'inal Cademoti, jeka aluman yab' ja Sihon ja ma ay xchol yuj b'a Hesboni, 27-29a b'i ya ek' kotikik ja b'a yoj slu'ume'i. Ti'ita oj ek' kotikik b'a niwan b'ej, oj jk'utstikik ja niwan ja' Jordani, man oj k'otkotikik ja b'a lu'um oj ya'ki'tik ja Dyosi. Jk'anayi oj tupyi ja jwa'eltikiki sok ja ja' oj ku'tiki, cho ka sna' ja yintil jumasa ja Esau sok ja moabita jumasa, yalaweta oj b'i ek' kotik b'a Ar sok b'a Seiri.
30-36—Jaxa ma ay xchol yuj Sihoni, mi sk'ana oj ekotik ja b'a slu'umi, a'ji ch'u'uyb'uk yi ja sk'ujol yuj ja Dyosi. Ja juts'in jawi yala kab' ja Dyos oj b'i b'ob' kujtik ja ke'ntik yuj jama ay xchol yuj Sihoni, oj b'i ochkotik sok ti'xta b'i oj ki'tikan ja lu'um jawi.
—Jaxa Sihoni yi'aj ja soldado jumasa ye'n waj sta'otik ja b'a lu'um Jahasi, jaxa Dyosi, ya'ni b'ob' kujtika. Ch'ak jmiltike ja kristyano jumasa, jomotik yi'e ja snaje'i sok ch'ak ki'tik kan yi'e ja slu'ume'i, ja jastik sb'aje'i kechan ja ki'ajtik kan ja swakaxe sok ja jastik niwaki. Mini june ja schonab' jumasa b'ob' skoltan sb'aj ja yajni k'e' ja tsatsali; ch'ak jch'aytik sna'jel spetsanil, jtulutik yi b'a chonab' Aroer it tey b'a sti'tik ja niwan ja' Arnoni, ti waj ka'tik tek'an man b'a chonab' Galaad. Man ya'n ke'nani jb'ajantik kana. 37Kechan mi ja sb'ob' jk'ultik yi ja lu'um jumasa b'aye ja amonita jumasa b'a niwan ja' Jabok, cho jach'ni ja lu'um jumasa b'a yaxk'uli, sok spetsanil ja lu'um jumasa, b'a yala kab'tik ja Dyos b'i mi jas oj k'u'ltik yi'.
Currently Selected:
Deuteronomio 2: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
