Deuteronomio 28

Ja slekilal oj sta' ja ma oj sk'u'uk ja Dyosi

1Ti cho yala ja Moisesi:

—Oj k'a ch'ak a k'u'ukex spetsanil ja yab'al jumasa ja Dyos oj ka' wi'ex ja ya'n, ja b'a lu'um iti, yujni we'nlex chonab'ilexa, 2spetsanil k'ak'u oj ya'wi'ex ja slekilal jumasa iti:

3—Chikan b'a ayex ek'a, b'a alaj ma b'a chonab', ja Dyosi jelni lek oj yil'exa.

4—Ja Dyosi, jel lek oj yil ja wa wuntikilexi, cho jach'ni ja wa jas a b'ajex waxa wa'wex el b'a lu'umi, cho jach'ni ja wa wakaxexi.

5-8—Ja Dyosi, jel lek oj yil'ex b'a wa najexi, b'a wala wajyexi, cho jach'ni spetsanil ja jas waxa k'u'lanexi, jel lek oj ajyanik ja b'a lu'um oj ya' wi'ex ja Dyosi. Mini oj k'ot tik'an ja wa wa'elexi, Spetsanil k'ak'u oj ajyuk wa'el ja b'a sat ja wa mesa'exi.

—Ja Dyosi, oj ya' b'ob' awujilex sok ja ma mixa wiab'ajex soki. Oj b'ob' jak soldado oj jak yixtala'ukex, jayuj ojni ch'ak spak e' ajnela, sak tantan oj ch'ak wajuke.

9—Ta ch'ak k'a'a k'u'ukex spetsanil ja jas wax yala ja Dyosi, jach'ni ja ye'n ojni cho sk'u'luk ja jas yaluneji, jaxa we'nlexi mi tukuk oj yil'ex. 10Ja'yuj spetsanil ja chonab'altik jumasa, oj yil'e we'nlex ni ja schonab'il Dyosi, ojni xiwuke a wujilexa.

11—Yajni ti'xa ayex ja b'a lu'um it k'apji yi'e yuj ja Dyos ja ma ek' paxta a wujilexi, ja Dyosi, jelni oj syajtayexa. Oj sk'an oj ajyuk jitsan a wuntikilex, jach'ni ja wa wakaxexi, oj ya pojxuk lek.

—Spetsanil ja jas oj ja ts'un'exi, jel oj ajyuk, 12ja Dyosi, oj sjam ja satk'inal b'a oj ya jak ja ya'lel ja jas a ts'ununejexi. Spetsanil ja jas oj ja k'u'lukexi jelni lek oj wajanik soka. Mi jas oj ja maj'ex ja we'nlexi oj ajyuk jitsan ja wa jas a b'ajex b'a oj ja wa'wex yi smajan ja tuk chonab' jumasa.

13-14—Ta yuj k'a wax ch'ak a k'u'ukex spetsanil ja yab'al ja Dyosi, mini k'a waxa k'okowexa, mi k'a waxa toyowex dyos k'u'lub'al we'nlex ni ja niwan oj iljanik ja b'a lu'um ita.

Ja ma wa sk'oko ja smandar ja Dyosi, ojni stup'e'a

15—Kechan ta mi k'a oj ja k'u'ukex ja yab'al jumasa ja Dyos oj ka'wi'ex ja ya'n, ojni a'ji a tup'exa, sok ojni ko'uk a b'ajex ja kistal jumasa ita:

16—Jel kistal oj ek' yuj ja jas oj a k'uluk ja b'a wa walaji ma ja b'a chonab'i.

17—Jel kistal oj ajyuk ja sat ja wa ts'usub' sok wa sat trigo, mini jun lek oj ja tula, cho jach'ni ja b'a wax tojb'i ja waji, mini jun slekil oj ja wila.

18—Jel kistal oj ajyuk ja wa wuntikili sok jach'ni ja sb'a'al jumasa wa walaji, ja yal wa wakaxi, sok ja yal ja wa chej jumasa.

19—Jel kistal oj ajyuk ja jastik oj ja k'u'lukexi.

20—Ta kistal k'a waxa wa' a b'ajex, ta wan k'axa pila a b'ajex sok ja Dyosi, ja ye'n mini oj skoltayexa ojni ya a wi'ex wokola, ja jachuki mi oj ja na' jas oj ja k'u'lukex, jel xa mojan oj ch'ayuk a na'jelex. 21-23Ja Dyosi, oj sjek niwak chamel b'a oj ch'ak spetsanil ja swinkil ja chonab' jawi, ja we'nlexi ja jel oj ya' wi'ex ja k'ak' sok ja sits' lukumili. Ja jas oj ja ts'un'exi mi jas oj ajyuka, ja oj sch'ak spetsanil ja k'ujlub' jumasa. Oj jelxuk el ja syajal ja k'ak'u oj ch'ak ya takjuk spetsanil ja wa jas a b'ajexi, ja Dyosi, mi oj ya jakuk ja ja'i. 24Ja wax ya' ja ja'i wa xko', sts'ub'il jijkab' oj sjek awi'ex ja Dyosi, b'a jach' oj ch'ak smil spetsanil wa jas a b'ajexi.

25-26—Yajni xjak tiro'anuk a mokex ja wa kontra'exi, kechan oj ja k'u'lukex yab'al ja wa soldado'ex jumasa, a wajuke ja b'a tiro'anel jawi, jayuj oj ch'ak spak e' ajnel, ojni ch'ak miljuke spetsanile'a. Ja sb'ak'tele'i ti oj ch'ak kan sak b'an b'an b'a lu'um, ti oj jakuk ja usej sok ja chante jumasa b'a k'uli, oj ch'ak k'uxjuke yuj, mini ma oj xiwta juke yuj ja. Yajni xyila ja tuk kristyano jumasa ja jastal jawi, jel oj xiwuke.

27—Ja Dyosi, jel oj ya' wi'ex ja wokol jumasa, chamel b'a mi oj tax yajnal, oj b'ut' bola wa b'ak'telexi, k'uxwanum k'o'on. Oj k'a'uk ja wa ts'ujmilex ja jastal k'a' ja sb'a egipsiano jumasa.

28-29—Jel jitsan jomel olom oj ajyanik, jaxa tuki oj ch'ak tupuk ja sate'i. A petsanilex jomel olom xta oj ajyanik, mi oj ja na' jas oj ja k'u'lukex, sok mi oj ja na' b'a oj wajanika. Mini t'un lek oj ek'uk a wujilexa, jel ch'in oj yil'ex ja kristyano jumasa b'a tuktukil chonab' jumasa, oj yelk'aye wa jas a b'ajexi, mi ma oj b'ob' skoltayex.

30—Ta ay k'a ma wa sk'ana oj nupanuk, jayuj mini oj b'ob' yi' ja smakb'e'na, pilan ma oj yi' ja ixuk jawi. Ta ay k'a ma stojb'es jun snaj, mini ye'n oj ochuk ja b'a yojola. Ta ay k'a ma sts'unu jun yaljil ts'usub' jayuj mini sb'ajuk ye'n ja sata.

31—Ti b'a sti' a satex oj miljuk ja wa wakaxexi, jaxa we'nlexi, mini xe'n oj ja wabyex yajb'al ja sb'ak'tela. Ta ay k'a ma xyelk'an ja wa burro'exi, mixa ni ojto a wil'exa. Ja wa kontra'exi oj yelk'an ja wa chejexi, mi ma oj skoltayex sle'jel.

32—Oj elk'ajuk ja wa wuntikilexi, mini jas oj b'ob' a wal'exa. Oj i'juke b'a tuk chonab' jaxa we'nlexi mini oj ja wil'exa.

33—Ja wa jas a b'ajexi, spetsanil k'ak'u oj yelk'an ja kristyano jumasa b'a mixa na'awex sb'aji, jel ixta oj yil'ex, ye'n oj sjach' e' wa jas a b'ajexi; tuk kristyano jumasa ma oj sk'u'l sgusto sok ja wa wa'telex b'a jel a wi'ajex soki.

34-35—Mi kechanuka, ja Dyosi oj cho ya' wi'ex jitsan wokol, oj ya' k'a'uk spetsanil ja wa b'ak'telexi, mi oj tax yajnal. Yajni xch'ak a wil'ex ja jastal iti, oj k'e'uk a loko'ilex.

36—Ja we'nlex sok ja ma ay xchol a wujilexi, oj ya'ex k'ab'al ja Dyos oj ochanik ya'tijumil, sok ti oj i'janik b'a jun chonab' b'a mi yilojuk ja ma ek' paxta a wujilexi. Jaxa tiwi t'ilan oj a'juk a toy'ex k'u'lub'al dyos b'a tojb'el sok te' ma ton. 37Chikan b'a man oj yi'ex ja Dyosi, ja kristyano jumasa jel ni oj cham sk'ujol sok spetsanil ja jas wa'n ek'ela. Jel oj k'e'na jananik wa stojb'ese ixta lo'il yuj ja jas wa'n ek'el a wujilexi.

38—Jel oj ja ts'un'ex ja wa jas a b'ajexi, jayuj mi jas oj ajyuk, oj ch'ak sch'ak spetsanil ja k'ujlub' jumasa. 39—Oj ja ts'un'ex ja ts'usub' jumasa, oj ja talnayex lek ja yajni wa'nto k'i'el jani, jayuj mini jun sat oj b'ob' a tul'exa, yal ja' oj ch'ak yuj. Ja sat ts'usub' jumasa jawi, mini jun t'uje ja ya'lel oj ja wu'exa. 40Oj ja ts'un'ex ja ste'il ja aceite olivo. Jayuj mini jun sat oj b'ob' a tul'exa. Cho mini jun t'uje aceite oj ja wi'ex kana oj ch'ak mok' lom ja sati. 41Oj ajyuk a wuntikilex ak'ix sok kerem, mini we'n oj ajyuk a mokexa, yuj ja oj i'juke moso'il b'a tuk chonab'.

42—Spetsanil ja te' b'a wa satini, sok ja b'a ay sat tey b'a wa walajexi, ja oj ch'ak yuj ja k'ujlub' jumasa: 43Ja ma jakel pilan chonab' jumasa cho tey b'a wa chonab'ilexi, takal takal oj och jel oj ajyuk ja jastik sb'aje'i, jaxa we'nlexi takal takal oj och kananik mi jas a wi'ojex. 44Ja ye'nle'i jel oj ajyuk ja jastik sb'aje'i sok oj b'ob' ya a maj'ex tak'in, ja smeranili, mi sb'ejuk ja we'n ay jas oj ja maj'ex yi'e'i, jayuj ja iti ye'nani jel niwan oj ajyuke'a, jaxa we'nlexi, jel ni ko'el oj ajyanika.

Ja tuk skistalil jumasa

45Ja Moisesi, ti cho yala'a:

—Ta mi k'a xa k'u'anex ja smandar jumasa ja Dyosi, ja kistal jumasa iti, ojni ch'ak sch'ak ex a petsanilexa. 46Spetsanil ja kristyano jumasa oj sna' spetsanil k'ak'u toj kistal ja jas ek' awujilex sok wa wintilex jumasa, 47Iday jelni lek yil'ex ja Dyosi, jaxa we'nlexi mini a k'u'anexa, sok mi petsanil a k'ujolex a toyowex mi spetsanil a k'ujoluk ayukex. 48Ja'yuj ja Dyosi, sjeka jitsan kristyano jumasa b'a mi lek oj yilex sok ja we'nlexi, jaxa ye'nle'i ojni ch'ak ya ochanik b'a oj ya'tijumukex. Ja Dyosi ojni ch'ak japawi'ex spetsanila, Jel ajujla a b'aj oj ajyanik. Mi oj ja ta' a wa'elex, mini a wa'alex, mini a k'u'ex. —ya'tijumex oj ajyanik, jach' man oj chamanik.

49—Ja Dyosi, oj yi'jan kristyano jumasa b'a najtil lu'um oj mi oj yil ex lek. Ti oj i'juke jan b'a jun chonab' b'a mixa na'awex sb'aj, mini ja sk'umale'i mi oj ja wabyex sb'ej. Ja kristyano jumasa jawi jel sna'awe jastal wa sch'akawe juts'in ja ma mix yila sb'a sok leki, jach' ja jastal ja liklik ja yajni wa'n jujpeli. 50-51Jel tsatse, oj ch'ak sk'ux'e' spetsanil wa wakaxexi, sok spetsanil ja jas a ts'ununejexi. Mi ni ja trigo oj ya'we kan b'a oj ja wabyex ja we'nlexi, mini ja sat ts'usub'i, sok mini ja sat ja aceite. —Toj sjomelal. —Oj ch'ak chamanik wa'in. —Mi ma oj ya'we kan sak'an, mini ja yal untik jumasa, sok mini ja ma ayxa sk'ujoli.

52Ja kristyano jumasa jawi, oj sjoyb'aye ja chonab' it ya'wi'ex ja Dyosi, oj snol k'ab'ukex; oj sjem'e' ko ja cha'anil tsatsal ts'akab' sniwanil a k'ujolex ajyi. 53-57Yajni ti joyane sb'aj ja chonab'i, jaxa we'nlexi mi oj ja ta' jas oj ja wabyex.

—Jel oj wokolananik yuj ja wa'ini, oj ja k'ux'ex ja wa wuntikilex ak'ixi, ma wa wuntikilex kerem ya'oj ja wi'ex ja Dyosi. Ja iti oj sk'u'luk ja ma wa sna'a t'usani, ja b'ak'et jawi mi ma oj ya'yi; mini ja smoj alijeli, sok mini ja sche'umi, mini ja yuntikil ma oj kan sak'ani, mi oj ya'yi.

—Ja ixuk ma jel wa sna'a, ma ja ma' jel ya'awe, mini sna'a jastal ja b'ejyel ja yajni mey jxanab'tiki, nak'ul oj sk'ux ja yuntikil b'a oj manxuk yuji, ja b'ak'et jawi mini ma oj ya'yi xe'nuka; —Mini ja sbolsa'il smuxuk'i, mi oj sjip'ele.

—Ja smeranili, jel oj ya' wi'ex ja wokol ja ma mi lek xyilawex leki.

Ja sk'okjel ja mandarari, toj sjomelal wa xya'aj jan ki'tik

58Ja Moisesi, Cho yala to yab' ja israelenio jumasa:

—Ta mik'a oj ja kis'ex ja jtatik Dyos it jel ja yipi, ta mik'a oj cho a k'u'ukex ja yab'al jumasa ts'ijb'anub'al b'a ju'un iti, 59ja Dyosi, ojni ya'a tup'ex lajan sok ja wa wintilex jumasa'a. —Oj ya'wi'ex niwak chamel b'a mi oj ja ta'ex yajnal.

60—¿Wa'nto maxa na'awex ja niwak wokol ya'a ja Dyos b'a Egipto? Ja' junxta wokol jaw oj cho ya' wi'ex ja we'nlex ja Dyosi, 61cho ay pilan chamel oj ya' wi'ex mix yala ja b'a smandari, man oj ch'ak sch'ak sna'jel spetsanil ja israelenio jumasa.

62—Ja we'nlex ja ya'n jel xa a'ayex; ta mik'a xa k'u'anex ja Dyosi, jel t'usan oj kananik. 63—Ja ya'n jel tsamal ay a mokex ja Dyosi, jel wa syajtayex, wa sk'ana oj pojxanik lek; kechan ta mik'a xa k'u'anex, cho jel ni tsamal oj sch'ay a na'jelexa, a'nima mixa k'anawex ojni snutsex el ja b'a chonab' ojto ya' wi'exi. 64T'ilan oj wajanik b'a tuk chonab', ja tiwi oj a'ji a toy'ex dyos k'u'lub'al sok te' ma ton, mixa na'awex sb'aj mini ja ma ek' paxta a wujilexi, mi sna'awe sb'aj.

65-67—Ja kristyano jumasa jawi, mini x'ajyi lamana sok mey sniwanil sk'ujole. Kechan jel cham k'ujol x'ajyiye, yujni ye'n ja Dyos ja wa x'a'ji och sxiwele yuj ja, sok mix a'ji sniwanil sk'ujole. K'ak'u a'kwal jel xiwye, jel kistal ja jas wa xyilawe'i, sakb'el to aye' wa sk'anawe jastal mi a'kwalukxa, yajni wax och ja a'kwali, wa sk'anawe jastal mi sat k'ak'u'uk xa.

68—A'nima yala ja Dyos mini oj ya kumxanik ja b'a Egipto, ye'na ja Dyos oj ya k'e'anik b'a jun barco oj ya kumxanik oche. Ja tiwi oj a'janik chapan xta b'a chonjel, sb'a ya'tijum, sok mini ma oj sk'an oj sman'exa.

Currently Selected:

Deuteronomio 28: YABD

Highlight

Copy

Compare