Deuteronomio 23

Ja ma oj jb'ob' ochuk ja b'a snajtsil tsomjeli

1Ti' cho yala ja Moisesi:

—Ja winik ma pach'an ja stojnili,#23:1 ja stojnili: Ja snolob'i. ma yuj meyuk ja sk'unili, mi oj b'ob' ochuk ja b'a snaj ja Dyosi.

2—Mi oj b'ob' ochuk ja yuntikil ja winik ma' nupanel sok ixuk b'a jakel pilan. Mini ja yintile jumasa'i, mi oj b'ob' ochuke.

3—Cho mini ja kristyano jumasa sb'a Amoni, sok mini ja sb'a Moabi, mini june ja yintile oj b'ob' ochuke'a. 4Jas yuj b'a schab'il ja chonab' jumasa jawi, mini jun ma' ya'wi'ex jas oj ja wabyexa, sok mini ma ya' wi'ex t'un ja' b'a oj ja wu'ex ja yajni elyex jan b'a Egipto, ti ek'yex b'a yoj slu'ume ja yajni ti'xa wajumex b'a lu'um sk'apunej a wi'ex ja Dyosi. Ja b'a sk'u'lane'i, ja stupuwe ja Balaam yunin ja Beor it ti kulan b'a petor b'a Mesopotamia b'a oj waj sk'u'luk a wi'ex b'a mi lekuk. 5Jaxa jtatik Dyosi, jel wa syajtayex, ja'yuj mix yi'a sniwanil ja jas wa sk'ana oj sk'u'luk ja Balaam tak. Spakaxil, chapan yuj oj sk'u'l ajyi b'a mi lekuk, jun lek sk'u'lana wi'ex. 6Ti oj ja wil'exa, schab'il ja chonab' jawi, mini t'un oj ayuke lamana, sok mini oj b'ob' sta'e stojolil jastal oj ek' yujile leka.

7-8—Ja yintile ja edomita jumasa oj b'ob' ochuke ja b'a snajtsil tsomjeli, yuj ja moj alijel ni a b'ajex soke'a. Jach'ni ja yintile ja egipsiano jumasa oj b'ob' ochuke, yuj ja ti'ni cho ajyiyex ja we'nlex b'a schonab'ile'a.

Ja jastal oj k'u'laxuk ja b'a leki

9Jaxa jastal ja b'a jlekilaltiki, ti yala ja Moisesi:

—Ja yajni la wajyex b'a tiro'aneli ti'ni oj kananik ek' b'a yoj k'ulaj, talna lek a b'ajex b'a mi jas kistal oj ja k'u'lukex. 10Jun winik ta ay k'a jas pek'a b'a sparte ja yoj a'kwali, kistalni wa xkana t'ilan oj spil sb'aj sok ja smoj jumasa, snajtil ja k'ak'u mi oj b'ob' ochuk ja b'a na'its k'u'lub'al sok k'u'utsi. 11Ja winik jawi yajnix och ja k'ak'u oj noxjuk lek, ja yajnix och ja a'kwali ojxa b'ob' och kan sok ja smoj jumasa b'a na'its k'u'lub'al sok k'u'utsi.

12-14—Ja Dyosi, Ti'ni ay b'a wa nalanexa, wa stalnayex b'a oj b'ob' ka wujilexi sok ja wa kontra'exi. Ja'yuj ja lu'um b'a oj ajyaniki, jel t'ilan tsamal oj ajyuk. Jaxa wa niwan paxialexi, b'oyowik sk'ejnal ti'xa musuwex kana. Ta yuj k'a ay jas kistal sta'a ja Dyosi, ojni spil sb'aj a mokexa.

Ja tuk ab'al jumasa

15—Jun a'tijum b'a tuk chonab' spaka jan ajnel ti k'ot b'a wa chonab'il we'nlex wa sk'ana oj ja koltayex, mokxa a wa'wex kumxuk yi ja ma sb'aj ajyi. 16Yajtayik lek, awik stsa' ja chonab' b'a tsamal oj ajyuki.

17—Ja b'a stoyjel ja Dyosi, mi sb'ejuk oj ja le'a mulex sok ja ixuke jumasa b'a tuktukil statam, ja jastal wa sk'u'lane ja tuk kristyano jumasa yajni wa stoyowe ja dyos yujile k'u'lub'ali. 18Ja Dyosi, jel tuk xyila ja kristyano jumasa ma wa sk'u'lan jastal jawi, mini oj yil lek b'a oj a'juk yi smajtan yuj ja kristyano jumasa jastal jawi, a'nima yalunejuk oj ya'a.

19Ta ay k'a maxa wa'wexyi majan tak'in, ma wa'el ma chikan jastik junuk, mok a tajb'ayex sok yal. 20Ja ma oj b'ob' a tajb'anex sok yal ja sjeli, ja ma' jakel pilan chonab'i. Ta sk'u'lane k'a ja jastal iti, spetsanil ja jas oj sk'u'luke ja b'a lu'um oj ajyuke'i, jelni lek oj yil ja Dyosi.

21-22K'u'lanik meran ja jas waxa wala oj ja k'u'lukex yi ja Dyosi. Ja ma mi jas wa sk'apa mini wa sta'a smula. Jaxa ma wa sk'apa mi sk'u'lan meran wani sta'a smula. Ja kristyano jumasa ma kechan wa sk'apa yuj k'a mi sk'u'lan, ojni a'ji stup yuj ja Dyosi. 23Ta ay k'a ma' slekil sk'ujol ye'n wax yala oj sk'u'l jastik junuk, sb'ejni oj sk'u'l merana.

24Ta ay k'a ma wax och b'a jun yaljil ts'usub' mi sb'ajuk ye'na, a slo' ja janek' wa sk'ana oj slo'i, kechan mini june oj b'ob' yi' b'a snaja. 25Cho jach'ni ta ay k'a ma wax och b'a jun yaljil trigo mi sb'ajuk ye'na, oj b'ob' a tuch'ex sok sk'ab' ja janek' oj b'ob' tuch'xuk a wuji, kechan mi oj b'ob' sk'uts sok machit.

Currently Selected:

Deuteronomio 23: YABD

Highlight

Copy

Compare