Deuteronomio 22
22
1—Ta wan k'axa wila ch'ayel ek' ja swakax ma schej ja ma mojan a wi'oj a b'aj soki, sb'ej oj ja kolta b'a oj ya kumxuk och b'a snaj. 2Ta yuj k'a najat ay ja ma sb'aji, ma yuj mi ma sna'a ma sb'a ja chante jumasa jawi, a yi'och b'a snaj a stalna, ti oj elk'ot ja ma sb'aji. 3Cho jach' oj ja k'u'lukex ta waxa ta'awex jun burro, jun chompa'al ma chikan jastik junuk ch'ayel kani.
4—Ta ay k'a ma' waxa wila b'a b'ej wa'n stuljel jun wakax mok'el ma jun burro, koltan stuljel —Mok kechanuk a k'ele, mok mi oj ja kolta.
5—Ja winiki, mi sb'ejuk oj sk'u'tes sb'aj ja jastal wa sk'u'tes sb'aj ja ixuki, cho jach'ni ja ixuki mi sb'ejuk oj sk'u'tes sb'aj ja jastal ja winiki. Ja jtatik Dyosi, mi lek xyila ja jastal jawi.
6—Ta ay k'a ma sta'a jun soj yal chan b'a lu'um ma b'a jun te', ti luts'an yuj ja snolob'i, ma ja yuntikili, mi sb'ejuk oj ch'ak a wi'ex spetsanil. 7I'ajik ja yal yuntikili, jaxa snani sijpanik kani. Ta oj k'a a k'u'lukex ja jastal jawi, jel lek oj ek' a wujilex.
8—Ta ay k'a ma stojb'es jun yajk'achil na'its, jel t'ilan oj sk'u'l kan jun sts'akab'il ja b'a s'olom b'a oj ya yipi, b'a jach' mey xiwel ma ti oj mok'uka sok jach' mi oj b'ob' sta' smul ja swinkil na'itsi.
9—Yajni oj ja ts'un'ex sb'a'al wa walajexi, mok a ts'un'ex sokan sok tuktukil inat. Yuj k'a sokan oj ja ts'un'ex mini oj ajyuka, iday jel t'ilan oj ja wi'ex ochyi spetsanil ja pagre jumasa, ja jas oj ajyuki.
10—Yajni oj ja jut wa walajexi, mok a wa'wex och stee'le jun wakax sok jun burro.
11—Ja k'u'uts waxa k'u'tes a b'ajex soki, mok a soktalukex ja sts'okb'al jastal waxa jalawexi.
12—Ja wa chompa oj ja lap'exi, b'a snup oj kanuki oj a wa'wex och yak'il b'a schanil sni'.
Ja ma wax yi'aj sb'a b'ajtan sok ja nupaneli
13La kaltik un winik nupani sok ja sche'umi, sta'a sb'aj sok, jaxa tsa'ani mixa sk'ana. 14Ti wax yala'a, ja lek oj pil jb'aj sok, jas lom nupaniyon sok mixa yuj soltera'uk, ay xa ma stao sb'a sok b'ajtan, 15-17jaxa ak'ix jawi wax i'ji och yuj ja snan stat b'a sti' sat ja ma'tik ay ya'teli. Ti wa sje'awe tiw ja k'u'uts makuni yujile ja b'ajtan a'kwal sta'a sb'aje'i, tey tiw ja senya mi meranuk ja luts'ub'alxa b'ajtan ja yak'ixe'i. Jaxa tatali ti wax yal yab' ja ma'tik ay ya'teli: Ke'n kala oj nupanuk ja kak'ix sok ja winik iti. Jaxa ya'n mixa wa'nto sk'ana, sok wa sle'a yi smul b'ajtanxa luts'ub'al yuj tuk winik. Jayuj it b'ay jul ja senya mi meranuk ja jas wax yala.
18—Jaxa ma'tik ay ya'teli wa skumts'ine ts'u'um ja winik jaw yuj ja lom wa sle'a yi smul ja sche'umi. 19Mi kechanuka, ja winik jawi t'ilan oj stupyi ja stat ja sche'umi, jo' tajb'e (100) sat tak'in b'a toj sakal tak'in, ja' multa oj ya' yuj ja lom sk'u'lan yi b'a mi lekuk jun tsamal ak'ix israelenio. Sok mi oj b'ob' snuts ele, tini oj ajyuk sok spetsanil k'ak'u.
20—Jaxa ixuk jawi, yujni k'a meran ja luts'ub'alxa b'ajtan ja yajni me'x nupani, 21ja winike jumasa b'a chonab'i, oj waj ya'we eluk ja b'a snaj ja stati, ti' ita jun xta tiw oj sch'oj'e ton sok tini oj smil'e kan tiwa. Jach' oj k'u'laxuk yi ja ma' oj sle' smul ja b'a yoj schonab'il ja israelenio jumasa, sok wanix ya' el sk'ixwel ja snan stata. Ta wan k'axa k'u'lanex ja jastal iti, mixani ma oj sk'u'l b'a mi lekuk ja b'a yoj ja chonab'ilexa.
22—La kaltik, ta ay k'a ma wa sta'a sb'aj sok yi ja sche'um ja pilan winiki. Schawanile oj milxuke ele, b'a jach' oj ch'akuk ja ma wa sk'u'lan b'a mi lekuki ja b'a yoj schonab'il ja israelenio jumasa.
23-24—La kaltik ta ay k'a ma wa sta'a jun ixuk, wa sta'a sb'aj sok, sok pilan winik oj nupanuk sok. Tik'a wa sta'a sb'aje b'a yoj chonab', sok mi awani ja ixuk b'a oj sk'an skoltajel, schawanile oj i'juke och b'a sti' sat ja ma' ay ya'teli. B'a ti oj miljuke schawanile tiwi. Oj miljuk ja winiki yuj ja lom syama yi ja sche'um ja pilan winiki; jach'ni ja ixuki oj miljuk ja ye'n yuj ja lom mi sk'ana skoltajeli. Ta wan k'axa k'u'lanex ja jastal iti, mixa ni ma oj sk'u'l b'a mi lekuk ja b'a yoj ja chonab'ilexa.
25-27—Jayuj la kaltik mi b'i ti'uk sta'a sb'aje b'a yoj chonab' ti b'i b'a yoj k'ul, jaxa winiki och st'en lu'um b'a oj sta' sb'aj sok, a'nima awani ja ixuk b'a wa sk'ana skoltajel, mi ma yab'i. Ja'yuj oj a'jukan sak'an ja ye'n, jaxa winiki ojni miljuka. Ja ma oj miljuk yuji, ja lajan sok ja yajni wax och k'e' tiro'anel cha'wane, man oj miljuk ja juni.
28—Lek ay, la kaltik jun winik sta'a sb'aj sok jun ak'ix mini ma wa xtaji yuj ja, jaxa winiki t'ilan st'ena b'a oj sk'u'l sok. Ta yuj k'a iljiye, yuj ja mini smakb'enuk jun winik b'a oj nupanuk sok ja ixuka, 29ja'yuj ja winik jawi, oj stupyi jun multa ja stat ja ak'ixi, chab' tajb'e sok lajune (50) sat tak'in b'a toj sakal tak'in, sok oj ni cho nupanuk soka. Yuj ja t'e'nub'al sta'a sb'aj soki, ja'yuj mini oj b'ob' spil sb'aje'a.
30—Mini jun ma oj b'ob' sta' sb'aj sok ja sche'um ja stati. Ja jastal jawi mini jun sb'eja, ja' wa xk'u'lantik yi jun niwan b'a mi lekuk ja jtatiki.
Currently Selected:
Deuteronomio 22: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
