Deuteronomio 21
21
Ja cham winik mix naxi jastal chami
1Ti cho yala ja Moisesi:
—Ja yajni ti'xa ayex b'a lu'um oj ya' wi'ex ja Dyosi, ta ay k'a ma sta'a jun cham winik b'a wits, mi ma yila ma smila jach' oj a k'u'lukex jastal iti:
2-3—Ja ma'tik ay ya'teli, sok ja matik wa stojb'es ja ab'al k'umal jumasa b'a chonab'i, oj sk'el'e jas b'ej ja wa xkan mojan sok ja cham winik jawi. Oj yal'e yab' ja ma'tik ay ya'tel b'a chonab' jaw a yi'e' och jun yal wakax b'a mito yilojuk a'tel. 4B'a jun loman b'a mi alajuk, b'a jun uk'um b'a ay ya'lel b'a mi xchak ja ya'leli. Ti oj sk'uts'e yi tiw ja snuk' ja yal wakax jawi.
5—Ja a'tel jumasa iti, t'ilan ja oj i'xuk och yi ja pagre jumasa. Yujni ye'n tsa'ub'ale yuj ja Dyos b'a oj stoy'e, jach'ni b'a oj sta'e ti' lek ja kristyano jumasa b'a sb'i'il ja jtatik Dyosi, chikan jas ab'al k'umalil ma tiro'anel, ye'n wa sna'awe jastal oj stojb'ese. 6Jaxa ma'tik ay ya'tel b'a chonab'i, ti sak'a ja sk'ab'e b'a sb'ak'tel ja cham wakaxi, 7-9ti oj yal'e'a:
Jtatikon Dyos,
jun winik mey smul ti cham b'a yoj jlu'umtikon;
—mok ke'n wa jtuptikon yuj ja chami—
mix na'atikon ma smila.
—Mok wa jtuptikon
—W'ena jas Dyos ja israelenio jumasa.
—We'n wa elkotikon b'a sk'ab'e
ja yajni ti ajyitikon b'a yib k'ab'al b'a Egipto.
—Ta wan k'axa k'u'anex ja Dyosi, cho wan k'axa k'u'lanex spetsanil ja jastal iti, ja Dyosi, mini oj sta'a mulexa.
Ja ixuke ma lutane yu ja tiro'aneli
10—Yajni xyila ja jtatik Dyos wajumexa b'a tiro'aneli, t'ilan ni oj ya'a b'ob'uk a wujilexa, cho ay ma oj ja ta'ex, ti'xa ni oj kan a mokexa. 11Jaxa we'nlexi, ta ay k'a ma xyila a wujilex junuk ja yixukile jel tsamal sok wa sk'ana oj nupanuk sok, jach' oj sk'u'luk jastal iti:
12—A yi'och b'a snaj jaxa ixuk jawi, oj sjox ja tso'otsil s'olomi, a sk'uts lek ja yechi. 13Tsa'an oj cho sop ja sk'u' b'a lapan yuji, oj slap b'a yajk'achil, ti'xa ni oj kan tiwa. Oj yi' jun ixaw, ta wa sk'ana a ok'uk yuj ja ya'kan ja snan stati; yajni x'ek' ja k'ak'u jawi, ja winik israelenio ojxa b'ob' nupanuk sok ja ixuk jawi.
14—Oj ek'uk k'ak'u ja winik jawi, mixa sk'ana oj sche'umuk, jayuj a ya' eluk. Mi oj b'ob' schone sok mi oj b'ob' ya och ya'tijum ixuk, yuj ja lom sche'um ajyi'.
Ja b'ajtan untikal jumasa
15-17—Ay k'a jun winik chab'e ja sche'umi, b'a schab'il ay yuntikil sok, ja juni wa syajta jaxa juni miyuk, jaxa b'ajtan yuntikil ajyi ja' sok ja ixuk mi wa syajta, yajni xwaj ya'yi ja sdote ja yuntikil jumasa, jaxa yunin jawi oj ya'yi cha mak'e smoj yuj ja tuk jumasa'a, yuja ye'n b'ankilali.
—Jaxa b'ajtan yunin sok ja ixuk it wa syajtani, mini oj b'ob' ya'yi cha mak'e smoja, yuj ja mi ye'nuk b'ankilali. Ja ma yujni ye'n b'ankilal merani, ye'nani sb'ej oj yi' cha mak'e smoj yuj ja ye'n b'ajtan manxi'i. Ta yuj k'a mi jach' a k'u'lanex jastal iti, wanixa k'ulanex yi b'a mi lekuk ja ma yujni ye'n b'ankilal merana.
Ja untik jumasa b'a mix k'okxiye'i
18—Ta ay k'a jun a wuntikilex jel ch'u'uy wa xya'a sb'aj ma yuj jel kalax, mi sk'u'an ja yab'al ja snan stati a'nima wax mak'ji, jach' oj k'u'laxuk yi jastal iti:
19—Oj eluke el sok ja snan stat b'a sti chonab'. Yuj ja ti' k'ajyel wa stsomo sb'aje tiw ja ma'tik ay ya'tel b'a chonab'i. 20Ja nanal tatali, ti oj yal'e yab' ja ma'tik ay ya'teli, Ja kaltikon iti, jel ch'u'uy, sok jel kalax. Mini t'un sk'u'an ja jas wax kaltikon yab'a. —Kechan ayuk ja swa'eli, spetsanil k'ak'u yakb'el ay.
21—Ti alji yabye'a, ja ma mi sk'u'an ab'al jastal jawi, ja oj miljuk yuj ja kristyano jumasa b'a chonab'i. B'a jach' mi oj pojxuk ja ma mi oj sk'u'uk ab'al ja b'a schonab'il ja israelenio jumasa, sok ojni xiwuke'a mixa ojto sk'u'luke jachuk ja tuk jumasa'a.
Ja jastik spetsanil oj k'ulaxuki
22Ti cho yala ja Moisesi:
—Ta ay k'a ma sta'a jun niwan smul, wa x'a'ji k'e' jiman te' b'a ti oj chamuka, 23mi sb'ejuk ti oj kan jiman te' snajtil a'kwal ja sb'ak'teli, oj mukxuk ja jun xta k'ak'u chami. Spetsanil ja ma wa xcham jiman te'i, mini t'un lek wax ilji yuj ja Dyosi. Ta yuj k'a ti oj kan lokan te' ja sb'ak'teli, spetsanil ja kristyano jumasa swinkil ja chonab'i mini lek oj iljuke yuj ja Dyosi. Ja'yuj mok je waj a jom'ex ja lu'um b'a oj ya' wi'ex ja Dyosi.
Currently Selected:
Deuteronomio 21: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
