Deuteronomio 18

Ja jas oj b'ob' sta ja pagre jumasa

1-2Ja Moisesi, ti cho yala'a:

—Spetsanil ja israelenio jumasa, ojni ch'ak sta' slu'ume'a, jaxa pagre jumasa ma tey sok ja k'ole sb'a Levi; mini xe'n lu'um oj yi'e'a, ja ye'nle'i, Dyos oj talnajuke yuj, spetsanil ja jas oj makunuk yujile'i, ye'nani oj ya' ja Dyosi. Jaxa jas oj yabye'i, ti oj ya'we eluk b'a smajtan ja Dyos it oj ya'we ja israelenio jumasa.

3—Ja b'ak'et jumasa wax a'xiyi ja Dyosi, oj b'ob' sk'ux'e ja pagre jumasa kechan ja sb'ak'tel spatiki, sb'ak'tel skarraka, sok b'a sb'ak'tel yib' slukumi. 4Oj b'ob' syam'e' b'a oj yabye ja sb'ajtanil sat trigo wa xya'we ja kristyano jumasa, jach'ni ja ya'lel ts'usub' sok ja aceite, cho jach'ni ja sb'ajtanil sk'u' chej wax sjoxji oj b'ob' ya'we makunuk. 5Ye'n ja jtatik Dyos ja stsa'a ja k'ole sb'a Levi sok ja yintile jumasa oj stalnaye jastal oj toyxuk ja sb'i'ili.

6—Ta ay k'a jun pagre wa sk'ana oj waj b'a pilan na'its b'a oj ajyuk tsomjel, yelel sk'ujol wa sjipakan ja schonab'ili, mok a kom'ex. 7Sb'ej oj ja koltayex jastal oj b'ob' sk'u'luk ja ya'tel jastal wa'n sk'u'lajel ja tuk smoj jumasa b'a sna'itsil tsomjeli. 8Ja pagre jawi, ojni cho b'ob' yi' ja jas oj yab' ja ye'na, ja janek' oj yi' ja smoj jumasa, ja' janek' oj yi' ja ye'ni, jach'ni ja jas yi'oji oj b'ob' schone, oj b'ob' sk'ul sok ja jas wa sk'ana sok jas tak'ini.

A'jel na'tik ja jastik b'a mi lekuki

9-14Ti cho yala ja Moisesi:

—Yajni la ochyex ja b'a lu'um b'a oj ya' wi'ex ja Dyosi, oj ja ta'ex a b'ajex sok ja kristyano ti aye tiwi, jel tuk ja jastale'i mi skisawe ja Dyosi. Jach' jastal it, ja kristyano jumasa jawi, wax ya'awe' yi b'a oj tsik'e yi b'a sti sat ja sk'u'lub'al sdyose ja yuntikile'i. Wa sk'u'ane ja brujo jumasa sok ja k'intanum jumasa was cho sna'awe ja jas oj ek'uki, cho wax sjob'owe yi ja cham winik jumasa jas oj sk'uluke'i. Jaxa we'nlexi k'u'anik ja Dyos kujtik b'a spetsanil, k'elawik b'a mi oj ja noch'ex ja jas wa sk'ulane'i jaxa ja Dyos kujtiki mi lek xyila jayuj was k'ana oj ya eluk ja b'a lu'um iti.

Jun pilan aluman Dyos

15-17—Ja Dyosi, oj k'ot jun k'ak'u b'a a petsanilex oj stsa' jun aluman Dyos ja jastal ja ke'n. Ja yajni ti ajyitik b'a wits Horebi, we'n a walawex jel la xiwyex ja oj ja wabyex ja sk'umal ja Dyosi, sok mixa k'ana oj ja wil'ex ja k'ak' it wa x'ajli b'a wax k'umani, b'a jach' mi oj chamanika. Lek ay ja jtatik Dyosi, oj ya'wi'ex ja aluman Dyos it a k'anawexi, kechan ja jas oj yali ojni ch'ak a k'u'ukex spetsanila.

18—Ja Dyosi, ti oj stsa' b'a we'nlex ja aluman Dyos jawi, ja ma oj och aluman Dyosili june ni jmoj ke'ntik, jach'ni oj cho sk'u'luk ja ye'n ja jastal wax k'u'lan ja ke'ni; ja jas oj yali spetsanil ye'n oj ch'ak aljuk yab' yuj ja Dyosi. 19Ja jas oj yal ja aluman Dyos jawi, ay k'a ma mi oj sk'u'uk, ojni a'ji stup yuj ja Dyosi.

20—Ta ay k'a ma wa sje'a sb'aj aluman Dyos, jaxa smeranili mi k'a yuj ye'nuk wa'n sjekjel ja Dyosi, milawik ele. Cho jach'ni oj k'u'laxuk yi' ja aluman Dyos ma oj och sta' ti' pilan dyosi.

21—Lek ay, ta ay k'a ma oj ek' sk'ujol jastal oj jna'tikon ta sb'a Dyos ma mi sb'ajuk Dyos ja jas oj yal'e kab'tikoni, ta la chiyex k'a, maklayik lek ja jas oj kal a wabyexi: 22Ja aluman Dyos jawi, wa'n k'ax yala ay jas oj ek'uk mi k'ax ek' meran, ti oj ja na'ex mi ye'nuk wa'n yaljel meran ja Dyosi. Ja winik jastal jawi kechan wa'n stoyjel sb'aj, ja jas wax yala ye'n ita wax ya el b'a s'olom, jaxa we'nlexi mi sb'ejuk oj xiwanik yuj.

Currently Selected:

Deuteronomio 18: YABD

Highlight

Copy

Compare