Deuteronomio 17

1—Ta oj k'a a wa'wex yi jun swaw wakax ma jun chej b'a smajtan ja Dyosi, k'elawik ta lek ay, jasyuj ja Dyosi jun smajtan b'a mi lekuk mi sk'ana.

2-3—Ja jtatik Dyosi, ojni ya'wi'ex ja wa lu'umex b'a oj ajyaniki. Ja'yuj ay ma oj k'e stoy k'u'lub'al dyos. Ja jastal ja k'ak'u, ja nan ixawi ja k'anali, ja jachuki wa'nex ni ya'jel kan pilan ja Dyosi, sok wa'nex ni sk'okjel ja jas chapa it a wa'oj jex soka. 4Yajni xa wabyex ay ma wa'n sk'u'lajel a wujilex ja jastal jawi, b'ajtan job'owik ta yujni merana. Ta yujni k'a smeranila, wa'n sch'ikjel sb'a sok jun niwan mulala, 5i'ajik och b'a sti' sat ja ma ay ya'tel b'a chonab'i, ye'n oj yal ta lek ma mi lekuk oj cham ch'ojob'al sok ton.

6—Lek ay, mini jun kristyano jumasa oj b'ob' ch'ayxuk sna'jel ta yuj k'a kechan june ja ma wax yala ja smuli. Kechan ta ay k'a chab'e ma oxe ja ma wax yala ja mulal jawi, ojni b'ob' milxuk ja ma wa sta'a smula. 7Jaxa ma wax yala ja mulal jawi, ye'n b'ajtan oj sts'a ja toni; tsa'an ti oj och spetsanil ja kristyano jumasa. B'a jach' oj sch'ay sna'jel ja ma mi lekuk ja jas wan k'ulajeli yujile'i.

8—Kechan ta ay k'a b'a jel wokol stojb'esjel ja jastal ja ma wax milwani, ma jun niwan ab'al k'umal b'a ay ma yajb'i, t'ilan ti oj wajanik b'a na'its wax ajyi tsomjel. 9B'a ye'n oj ja k'umuk a b'ajex sok ja pagre jumasa, cho jach'ni ja ma oj stojb'es ja ab'al k'umal jumasa oj yal'e a wabyex yuj ja jas ek'i. Ye'n oj yal'e jas oj sk'u'luke sok ja ma sta' oj smuli. 10-11Ja we'nlexi, k'u'anik spetsanil ja jastal oj yal'e b'a oj ja tup'ex ja wa mulexi.

12—Ta ay k'a ma wa sk'ana oj sk'u'l sb'a winikil mi oj sk'u'uk ja jas oj yal'e ja ma oj stojb'es ja k'umal jumasa, yuj ja ya'tijume ni Dyos ja ye'nle'i, ojni ch'ayjuk sna'jel ja winik ja wa.

—Ta wan k'axa k'u'anex ja ab'al jumasa iti, mi jas b'a mi lekuk oj ajyuk ja b'ay ja israelenio jumasa, 13ja kristyano jumasa wa xiwye, sok wax yabye sb'ej mi ma niwan oj ya' sb'aj.

Ja ab'al jumasa sb'a niwak mandaranumi

14Ja Moisesi, ti cho yala'a:

—Yajni la ochyex ja b'a lu'um oj ya' wi'ex ja Dyosi, yajni ti'xa ayex b'a jujune wa lu'umexi, oj ja k'an'ex oj ajyuk jun a mandaranumex ja jastal ay yi'oj ja tuk chonab' jumasa. 15Ta yuj k'a jach' jastal jawi, kechan oj ja wal'ex yab' oj och xchol ja israelenio ma oj stsa' ja Dyosi. Ja ma b'a tuk jakeli, mi oj b'ob' och xchol ja israelenio jumasa.

16—Ja ma oj och xcholi, mi oj b'ob' sman jitsan kawu, sok mi oj waj b'a Egipto oj waj sle', yuj ja mi sk'ana ja Dyos oj kumxukotikon ja b'a chonab' jawi. 17Sok mini oj b'ob' ajyuk jitsan sche'um, yuj ja oj b'ob' ch'ayjuk sk'ujol b'a mi oj sk'u'uk ja Dyosi. Ja ma ay xchol jawi, cho mi oj b'ob' snol jitsan tak'in.

18-20—Yajni xk'e' a'tijuk ja ma ay xchol oj ja wa'wex ochuki, oj yal a wabyex oj ja wa'wex yi jun skopia'il ja b'a ts'ijb'anub'al ja yab'al jumasa ja Dyosi. Ja kopia jawi oj ka b'a sts'e'el, spetsanil ja k'ak'u jumasa ojni sk'umuka. B'a jach' oj sneb' mi masuk niwan ja ye'n yuj ja tuk israelenio jumasa, jach' oj sneb' jastal oj sk'u'uk ja Dyosi. Sok oj skis spetsanil ja ab'al jumasa. Ta wan k'a snocho ja ab'al jumasa it ja ma ay xcholi, ja ye'n sok ja yintil jumasa ye'nani oj yal e jasunk'a oj sk'u'luke spetsanil k'ak'u ja israelenio jumasa'a. Ja sb'ajtanil ju'un b'a ts'ijb'anub'al ja yab'al ja Dyosi, spetsanil k'ak'u ye'n wa stalnaye ja pagre jumasa.

Currently Selected:

Deuteronomio 17: YABD

Highlight

Copy

Compare