Deuteronomio 16

Ja k'in b'a sya'al k'inali

1Ja Moisesi, ti cho yala yab' ja kristyano'i:

Ja b'a yixawil Abib,#16:1 yixawil Abib: Ja iti, ja sb'ajtanil ixaw b'a jab'il yuj ja judio jumasa. Jaxa b'a jtiempo ke'ntiki b'a snalan ja ixaw b'a marso sok snalan ja yixawil abrili. Ja' oj ja k'u'lukex ja k'in b'a sya'al k'inal b'a oj ja toy'ex ja sb'i'il ja Dyosi. Na'awik t'unuk ja yajni ya' elanik b'a yib' k'ab'al b'a Egipto.

2-7—Ja sb'ajtanil k'ak'u ja k'ini, b'a yoj a'kwal t'ilan ti oj wajanik b'a na'its wax ajyi ja tsomjel b'a oj waj a wa'wex yi ja smajtan ja Dyosi, jun wakax sok jun chej. Ja chante jumasa iti, mi ti oj ja wa'wex yi ja Dyos ja b'a lu'um oj ya' wi'exi', kechan oj b'ob' a wa'wex yi b'a na'its wax ajyi ja tsomjeli, a'wik yi b'a och ita a'kwal, yuj ja jach'ni elyex ja we'nlex b'a Egipto'a. Oj b'ob' a wabyex ja sb'ak'tel ja chante jumasa jawi kechani sok waj b'a mey yi'oj levadura, sok mi jas oj ja wa'wex kan ja sb'a pilan k'ak'u, t'ilan oj ch'ak a wabyex spetsanil.

—Ja k'ini wake k'ak'u oj alb'uk, spetsanil ja k'ak'u jumasa jawi kechan oj b'ob' a wabyex waj b'a mey yi'oj levadura ja jastal a wabyex ja jun a'kwalil it ajnel jomol elyex b'a Egipto. Ja waj jawi sb'i'ilan, Waj b'a yoj wokol. Spetsanil mak'e oj ja wabyex ja waj jawi, t'ilan a jak a k'ujolex ja jastal ajyi wa wokolex b'a Egipto, sok ja jastal elyex ja tiwi. Spetsanil ja k'ak'u jumasa b'a k'ini, mini t'un levadura oj ajyuk ja b'a yoj a chonab'ilexa.

—B'a pilan k'ak'u tsilawik ja wa wa'elex it a wa'wexta yi ja Dyosi, ab'anik yajni xch'ak wa'aniki, kumxanik b'a wa najex. 8Jaxa pilan wake k'ak'u, jani oj ja wabyex ja waj it mey slevadura'ili. Ja b'a sjukil k'ak'u mini ma oj a'tijuk, kechan oj a tsom a b'ajex b'a oj toy'ex ja sb'i'il ja Dyosi.

Ja sk'inil wa jas a b'ajexi

9-11—Man sb'ajtanil k'ak'u oj k'e a noch'ex yi stuljel wa jas ab'ajexi ajtab'anik juke semana, b'a jach' oj ja na'ex jas k'ak'u oj ja k'u'lukex ja sk'inil wa jas a b'ajex b'a oj ja toy'ex ja sb'i'il ja Dyosi. Ja k'in jawi ti oj a k'u'lukex b'a snajtsil ja tsomjeli.

—Ja b'a k'in jawi, sok spetsanil wa k'ujolexi oj ja wa'wex yi jun slimosna ja Dyosi. Jani chikan janek' ya'wi'ex ja Dyosi: Yuj k'a yuj a'ay ya'wi'ex, jach'ni ja we'nlexi ojni cho a wa'wex yi a'ay ja smajtana. Ja b'a k'ini oj ch'ak a wi'ex och spetsanil wa wuntikilex sok ja ma yib' k'ab'al aya wujilexi. Oj cho a lok ex och ja ma'tik meb'a sok ja chamel tatam jumasa, ja k'ole jumasa sb'a Levi, sok ja ma'tik majan ay b'a wa chonab'ilexi.

12—K'u'anik ja ab'al jumasa iti, mok ch'ay a k'ujolex ja jastal yib k'ab'al ajyiyexi ja we'nlex b'a Egipto.

K'in sb'a lejchupat jumasa

13-15Yajni xch'ak a jach'ex wa jas a b'ajexi, sok ja yajni xch'ak a pits'ex ja ya'lel ja ts'usub'i, jel t'ilan oj ja toy ex ja sb'i'il ja Dyos ja b'a sk'inil ja lejchupat jumasa. Ja k'in jawi oj alb'uk juke k'ak'u, sok jelni tsamal oj ja wa'wex ek'uka. Ti oj ja k'u'lukex b'a sna'itsil tsomjel sok spetsanil wa wuntikilexi, ja ma tey a wujilex b'a yib k'ab'al, ja meb'a sok ja chamel tatam jumasa. Ojni cho a lok ex ja k'ole jumasa sb'a Levi sok ja ma'tik majan aye' b'a wa lu'umexi. B'a jach' jel oj ya'wi'ex wa jas a b'ajex ja Dyosi, sok spetsanil ja wa wa'telexi jelni lek oj wajanik soka.

Ja oxe k'ini

16-17—B'a jun jab'il ay oxe k'in b'a mini jun kerem mi oj juluk ja b'a ay yi'oj lajchawe jab'ili: K'in b'a sya'al k'inal, sk'inil ja jastik a b'ajexi, sok sk'inil ja lejchupati. Ja k'in jumasa iti ti'ni oj k'u'laxuk b'a sna'itsil tsomjela, mini jun ma mi oj yi' och yi ja slimosna ja Dyosi. Ay k'a ma jitsan a'jiyi ja jas sb'aj yuj ja Dyosi, jach'ni jitsan oj cho ya' ja ye'na.

Tojb'esnum ab'al k'umal jumasa

18-19—Ja Dyosi, oj ya'yi schonab'il b'a jujune' k'ole, b'a jujune' chonab' oj stsa'e ma oj ya'we och matik oj stojb'es ja ab'al jumasa jach'ni sok ma oj yi' ya'tel, t'ilan oj yil sb'aje junxta yab'ale. Oj stalnaye sok oj sk'el'e toj lek ja schonab'ili, mi lek oj yil'e ta ay ma oj sman sok tak'in jun smoj, yuj ja jastal jawi ay ma wax jom ja sneb'jel yuji.

20—Ilawik lek spetsanil ja kristyano jumasa. Ja jachuki, jel lek oj ek'uk a wujilex ojni a b'ajukex ja lu'um it oj ya' wi'ex ja Dyosi.

Ja jastal oj toyxuk ja Dyosi

21-22Ja Moisesi, cho yala yab' ja kristyano'i:

—Ja yajni oj ja k'u'lukex ja altar b'a oj ja toy'ex ja sb'i'il ja Dyos kujtiki, mok waj a wa'wex lajan sok ja k'u'lub'al dyos Astarte sok mini jun pilan k'u'lub'al dyos. —Ja jastal jawi mini lek xyila ja Dyosi.

Currently Selected:

Deuteronomio 16: YABD

Highlight

Copy

Compare